ଭୁବନେଶ୍ୱର, ୨୩।୯(ବ୍ୟୁରୋ):ବିଜୁ ଜନତା ଦଳ(ବିଜେଡି) ମଙ୍ଗଳବାର ଲୋକ ସଭାରେ ଆଗତ କରାଯାଇଥିବା ଶ୍ରମିକ ସମ୍ବନ୍ଧୀୟ ୩ଟି ବିଲ୍କୁ ସମର୍ଥନ ଦେଇଛି। ସେହି ବିଲ୍ଗୁଡିକ ହେଲା ଅକୁପେଶନାଲ ସେଫ୍ଟି , ହେଲ୍ଥ ଆଣ୍ଡ ଓ୍ବାର୍କିଂ କଣ୍ଡିଶନସ୍ କୋଡ୍-୨୦୨୦, ଇଣ୍ଡଷ୍ଟ୍ରିୟାଲ ରିଲେଶନ କୋଡ ବିଲ୍-୨୦୨୦ ଏବଂ ସାମାଜିକ ସୁରକ୍ଷା ବିଲ୍-୨୦୨୦। ଏହା ସପକ୍ଷରେ ବିଜେଡି ଭୋଟ ଦେଇଛି। ବୁଧବାର ଏହି ବିଲ୍ ରାଜ୍ୟ ସଭାରେ ଆଗତ କରାଯିବ। ତେବେ ଏହି ବିଲ୍ରେ ରାଜ୍ୟ ସରକାରଙ୍କ ଅଧିକାରକୁ ଏକ ପ୍ରକାର ସଙ୍କୁଚିତ କରାଯାଇଛି। ମଳିଥିବା ସୂଚନା ଅନୁଯାୟୀ ଶ୍ରମିକ ବିଲ୍ରେ ନିର୍ମାଣ ଶ୍ରମିକ କଲ୍ୟାଣ ବୋର୍ଡକୁ କେନ୍ଦ୍ର ସରକାର ନିଜ ଅଧୀନକୁ ନେବା ଲାଗି ସମସ୍ତ ବ୍ୟବସ୍ଥା କରିଛନ୍ତି। ଏହାଛଡା ଶ୍ରମିକ ପଞ୍ଜୀକରଣ ନେଇ ମଧ୍ୟ ବିଲ୍ରେ କେତେକ ସଂଶୋଧନ କରାଯାଇଛି। ଏହି ବିଲ୍ରେ ଶ୍ରମିକ ପଞ୍ଜୀକରଣ ରାଜ୍ୟରେ ଥିବା କେନ୍ଦ୍ର ଶ୍ରମ କମିଶନରଙ୍କ ଅଧୀନକୁ ଚାଲିଯିବ। ଏହାଛଡା ଶ୍ରମିକମାନଙ୍କର କଲ୍ୟାଣ ପାଇଁ ରାଜ୍ୟ ସରକାର ବିଭିନ୍ନ ନିର୍ମାଣ ସଂସ୍ଥାରୁ ସେସ୍ ଆଦାୟ କରୁଛନ୍ତି। ଶ୍ରମିକମାନଙ୍କ କଲ୍ୟାଣ ପାଇଁ ଏହାକୁ ଖର୍ଚ୍ଚ କରାଯାଉଛି। ତେବେ ସେହି ସେସ୍ କେନ୍ଦ୍ର ସରକାରଙ୍କ ଅଧୀନକୁ ଚାଲିଯିବ। ଯଦ୍ଦ୍ବାରା ରାଜ୍ୟ ସରକାର ଶ୍ରକିମମାନଙ୍କ କଲ୍ୟାଣ ପାଇଁ କରୁଥିବା ବିଭିନ୍ନ ଯୋଜନା ଲାଗି ଅର୍ଥର ଅଭାବ ରହିବ। ରାଜ୍ୟ ସଭାରେ ଏହି ବିଲ୍ରେ କେତେକ ସଂଶୋଧନ ଆଣିବାକୁ ବୁଧବାର ପ୍ରସ୍ତାବ ଦିଆଯିବ ବୋଲି ରାଜ୍ୟ ସଭା ସଦସ୍ୟ ସୁବାସ ସିଂ କହିଛନ୍ତି। ରାଜ୍ୟ ସରକାର ଏହି ବିଲ୍କୁ ସମ୍ପୂର୍ଣ୍ଣ ସମର୍ଥନ କରୁନାହାନ୍ତି। ବିଲ୍ରେ ଥିବା କେତେକ ଅସଙ୍ଗତି ଦୂର କରିବାକୁ ପ୍ରସ୍ତାବ ଦିଆଯିବ ବୋଲି ସେ କହିଛନ୍ତି।
