ଭୁବନେଶ୍ୱର,୧୭ା୨(ବ୍ୟୁରୋ):ଷଣ୍ଢପଣିଆ ଦେଖାଉଛି। ଗୋଟିଏ ଚାପୁଡ଼ା ପଡ଼ିଗଲେ ସେ ସେଇଠି ପଡ଼ିଯିବ। ଖଣ୍ଡାଫଣ୍ଡା ଦରକାର ନାହିଁ, ତାକୁ ଗୋଟିଏ ଜାବଡା ଦରକାର। ପୋଲିସ ଭାଇଙ୍କୁ ଟିକେ ଚାନ୍ସ ଦେଇଦିଅ, ସେମାନେ ହଟାଇଦେବେ। ଗୁରୁବାର ବିଏମ୍ସି ଅଫିସ ସମ୍ମୁଖରେ ବିଜେଡି ପ୍ରତିବାଦ ସଭାରେ ବିଜେଡି ନେତା ଅରୂପ ପଟ୍ଟନାୟକ ଏପରି କଡ଼ା ମନ୍ତବ୍ୟ ଦେଇଛନ୍ତି। ମହିଳା ଆଇଆଇସିଙ୍କୁ ଧକ୍କା ମାରିବା ପ୍ରସଙ୍ଗରେ କାହାର ନାଁ ନ ନେଇ ସେ ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କୁ ପରୋକ୍ଷରେ ଶାଣିତ ଆକ୍ରମଣ କରିଛନ୍ତି।
ଅରୂପ କହିଛନ୍ତି, ୩୬ ବର୍ଷ ଧରି ପୋଲିସ ଅଫିସର ଥିଲି। ମୋ’ ଆଗରେ ଯେଉଁ ପୋଲିସ ଭାଇମାନେ ଅଛନ୍ତି, ମୁଁ ତାଙ୍କ ଆଡ଼କୁ ଅନାଇପାରୁନି। ଯେଉଁ ଅଫିସରଙ୍କୁ ଧକ୍କା ମରାଯାଇଛି, ସେ ମାଆ ନୁହନ୍ତି, ଜଣେ ପୋଲିସ ଅଫିସର। ସେଇଟା ଭାବି କାର୍ଯ୍ୟକ୍ରମ କରିବ। ଗତକାଲି ଯେଉଁ ଲୋକଟା ଏମିତି କଲା, ଏବେ ମୋ ହାବୁଡ଼ରେ ପଡ଼ିଗଲେ, କ’ଣ ହେବ ସେ ଜାଣିନି ବୋଲି ଅରୂପ କହିଛନ୍ତି। ଆମ ଦଳର ଜଣେ ବିଧାୟକ କ’ଣ ଗୋଟେ ବଚସା କରିଥିଲେ। ତାଙ୍କୁ ସଙ୍ଗେ ସଙ୍ଗେ ନବୀନବାବୁ ଦଳରୁ ବହିଷ୍କାର କରିଦେଲେ। କିନ୍ତୁ ଏମାନେ ଏୟା କରୁଛନ୍ତି ଓ କହୁଛନ୍ତି। ଆମକୁ ଧକ୍କା ମାରିଲେ। ତାଙ୍କ ବିରୋଧରେ ନନ୍ବେଲେବୁଲ୍ ଦଫା ଲାଗିଛି। ଏହି ଦଫାରେ ମହାରାଷ୍ଟ୍ରରେ ବେଲ୍ ମିଳିବ ନାହିଁ। ହେଲେ ସେ ଲୋକଟା ବୁଲୁଛି କେମିତି। ତାହା ମୁଁ ବୁଝିପାରୁନାହିଁ। ମୁଁ ଏବେ ଜଣେ ରାଜନେତା ନୁହେଁ, ଜଣେ ପୋଲିସ ଭାବେ ଏ କଥା କହୁଛି। ୩୬ ବର୍ଷ ଧରି ମହାରାଷ୍ଟ୍ରରେ ଚାକିରି କରିଛି। ଯାହା ଟିକେ ପରିଚୟ ରହିଛି, ରାଜନେତା ନୁହେଁ, ପୋଲିସ ଅଧିକାରୀ ଭାବେ। ଏମାନେ ଯାହାକାଣ୍ଡ ଘଟାଇଲେ, ତାହାର ଜବାବ ଆମ ସରକାର ଭଲ ଭାବେ ଦେବେ ବୋଲି ମୋର ଆଶା ଓ ପ୍ରାର୍ଥନା ବୋଲି ଅରୂପ କହିଛନ୍ତି। ସୂଚନାଯୋଗ୍ୟ, ରାଜ୍ୟରେ ବିପର୍ଯ୍ୟସ୍ତ ଆଇନଶୃଙ୍ଖଳା ବିରୋଧରେ ବୁଧବାର ଭାଜପା ପକ୍ଷରୁ କରାଯାଇଥିବା ଆନ୍ଦୋଳନରେ ସାମିଲ ହୋଇ ସମ୍ବଲପୁର ବିଧାୟକ ତଥା ବିରୋଧୀ ଦଳ ନେତା ଜୟନାରାୟଣ ମିଶ୍ର ଧନୁପାଲି ଥାନା ଅଧିକାରୀ ଅନିତା ପ୍ରଧାନଙ୍କୁ ଧକ୍କା ମାରିବା ସହିତ ଗାଳିଗୁଲଜ କରିଥିବା ଅଭିଯୋଗ ହୋଇଛି। ଅନ୍ୟପକ୍ଷରେ ପ୍ରଧାନ ମଧ୍ୟ ପାଲଟା ଜୟନାରାୟଣଙ୍କୁ ମୁଥ ମାରିଥିବା ଅଭିଯୋଗ ହୋଇଛି। ଅନିତାଙ୍କ ଅଭିଯୋଗକ୍ରମେ ସମ୍ବଲପୁର ଟାଉନ ଥାନା ପୋଲିସ ଜୟନାରାୟଣଙ୍କ ବିରୋଧରେ ମାମଲା ରୁଜୁ କରିଛି। ପୂର୍ବରୁ ମଧ୍ୟ ଜୟନାରାୟଣଙ୍କ ନାଁରେ ମାମଲା ରହିଛି।
