ନୂଆଦିଲ୍ଲୀ,୧୦ା୨:ପ୍ରାକୃତିକ ବିପର୍ଯ୍ୟୟ ପ୍ରବଣ ଓଡ଼ିଶାକୁ ସ୍ବତନ୍ତ ଫୋକସ ପାହ୍ୟା ପ୍ରଦାନ ଲାଗି ବିଜେଡି ଗୁରୁବାର କେନ୍ଦ୍ର ସରକାରଙ୍କ ନିକଟରେ ଦାବି କରିଛି। ଲୋକ ସଭାରେ କେନ୍ଦ୍ର ବଜେଟ ଉପରେ ଆଲୋଚନା ବେଳେ ବରିଷ୍ଠ ବିଜେଡି ସଦସ୍ୟ ଭର୍ତ୍ତୃହରି ମହତାବ କୌଣସି ପ୍ରାକୃତିକ ବିପର୍ଯ୍ୟୟ ପରେ ଅନୂ୍ୟନ ୩ ବର୍ଷ ପାଇଁ ରାଜ୍ୟକୁ ସ୍ବତନ୍ତ୍ର ଫୋକସ୍ ମାନ୍ୟତା ପ୍ରଦାନ ଲାଗି କେନ୍ଦ୍ରକୁ ଅନୁରୋଧ କରିଥିଲେ। ଏହି ସମୟ ମଧ୍ୟରେ କେନ୍ଦ୍ର ରାଜ୍ୟ ଅନୁଦାନ ଅନୁପାତ ୯୦:୧୦ ହେବା ଆବଶ୍ୟକ, ଅର୍ଥାତ୍ କୌଣସି ଯୋଜନା ଲାଗି କେନ୍ଦ୍ର ସରକାର ୯୦ ପ୍ରତିଶତ ଅନୁଦାନ ଦେଲେ ରାଜ୍ୟ ଭାଗ ୧୦ ପ୍ରତିଶତ ରଖିବାକୁ ଭର୍ତ୍ତୃହରି କହିଥିଲେ। ଏଥିପାଇଁ ରାଜ୍ୟ ସରକାର ପୂର୍ବରୁ ନୀତି ଆୟୋଗ ବୈଠକରେ ଏବଂ ପ୍ରଧାନମନ୍ତ୍ରୀଙ୍କ ସହ ଆଲୋଚନା କରିଛନ୍ତି। ପିଏମ୍ କିଷାନ ଯୋଜନା ଏବଂ ଏମ୍ଜିଏନ୍ଆର୍ଇଜିଏରେ ବ୍ୟୟବରାଦ ହ୍ରାସ ପାଇଥିବା କଥା ମଧ୍ୟ କଟକ ଏମ୍ପି ଉଠାଇଥିଲେ। ସେ କହିଥିଲେ, ପୂର୍ବବର୍ଷ ତୁଳନାରେ ଏଥର ପିଏମ୍ କିଷାନ ଯୋଜନାରେ ୧୩.୩୩ ପ୍ରତିଶତ କମ୍ ବ୍ୟୟବରାଦ କରାଯାଇଛି। ଜାତୀୟ ଖାଦ୍ୟ ସୁରକ୍ଷା ଆଇନରୁ ଜନସଂଖ୍ୟାର ୪୦ ପ୍ରତିଶତରୁ ଅଧିକ ବାଦ୍ ପଡ଼ିଛନ୍ତି। ଅନେକ ଗାଁ ଓ ବସ୍ତିର ଉପେକ୍ଷିତ ଜାତି ଓ ସମ୍ପ୍ରଦାୟ ରାଶନ କାର୍ଡରୁ ବଞ୍ଚତ୍ତ। ରାଜ୍ୟ କାର୍ଡ ଦିଆଯାଇ ଏହି ଯୋଜନାରେ ଅଧିକ ଲୋକଙ୍କୁ ସାମିଲ କରାଯାଇଥିବା ଭର୍ତ୍ତୃହରି କହିଥିଲେ। ଓଡ଼ିଶା ସରକାର ଚାଷୀଙ୍କଠାରୁ ଧାନ ଓ ଉଷୁନା ଚାଉଳ କିଣୁଥିବାବେଳେ ଭାରତୀୟ ଖାଦ୍ୟ ନିଗମ ଓଡ଼ିଶାରୁ ଏହା କିଣୁ ନାହିଁ। ଓଡ଼ିଶା ପ୍ରତି କେନ୍ଦ୍ରର ବୈମାତୃକ ମନୋଭାବର କାରଣ କ’ଣ ବୋଲି ଭର୍ତ୍ତୃହରି ପ୍ରଶ୍ନ କରିଥିଲେ। କେନ୍ଦ୍ରାପଡ଼ା ଷ୍ଟେଶନକୁ ପାସେଞ୍ଜର ଟ୍ରେନ୍ ଚଳାଚଳ ପାଇଁ ସେ ରେଳ ମନ୍ତ୍ରଣାଳୟ ନିକଟରେ ଦାବି କରିଥିଲେ।
