ଓ୍ବେଲିଂଟନ,୧୩।୫(ଏପି): ନ୍ୟୁଜିଲାଣ୍ଡ ଉଇକେଟକିପର ବ୍ୟାଟ୍ସମ୍ୟାନ ବିଜେ ଓ୍ବାଟଲିଂ ଅବସର ନେବେ ବୋଲି ଘୋଷଣା କରିଛନ୍ତି। ଆସନ୍ତା ମାସରେ ଇଂଲଣ୍ଡର ସାଉଥାମ୍ପଟନଠାରେ ଆୟୋଜନ ହେବାକୁ ଥିବା ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ପରେ ସେ ସବୁପ୍ରକାର କ୍ରିକେଟରୁ ଅବସର ଘୋଷଣା କରିବେ ବୋଲି କହିଛନ୍ତି।
ଆଗାମୀ ସେସନ ପାଇଁ ନ୍ୟୁଜିଲାଣ୍ଡ କ୍ରିକେଟ ୨୦ ଜଣିଆ ଚୁକ୍ତିବଦ୍ଧ ଖେଳାଳିଙ୍କ ତାଲିକା ପ୍ରକାଶ କରିବା ପରେ ଦକ୍ଷିଣ ଆଫ୍ରିକା ଜନ୍ମିତ ଓ୍ବାଟଲିଂ ଏହି ଗୁରୁତ୍ୱପୂର୍ଣ୍ଣ କଥା ଘୋଷଣା କରିଛନ୍ତି। ଟେଷ୍ଟ ଫର୍ମାଟ୍ରେ ନ୍ୟୁଜିଲାଣ୍ଡ ଭଲ ଉନ୍ନତି କରିଛି ଓ ଏଥିରେ ଓ୍ବାଟଲିଂଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିଆସିଛି। ୨୦୦୯ରେ ସେ ଓପନିଂ ବ୍ୟାଟ୍ସମ୍ୟାନ ଓ ଜଣେ ପାର୍ଟଟାଇମ୍ ଉଇକେଟକିପର ଭାବେ କ୍ୟାରିୟର ଆରମ୍ଭ କରିଥିଲେ। ତେବେ ୨୦୧୩ରେ ବ୍ରେଣ୍ଡନ ମ୍ୟାକଲମ ଅବସର ନେବା ପରେ ସେ ଟେଷ୍ଟରେ ମୁଖ୍ୟ ଉଇକେଟକିପର ଭାବେ ଦାୟିତ୍ୱ ନିର୍ବାହ କରିଥିଲେ। ସେବେଠାରୁ ସେ ନ୍ୟୁଜିଲାଣ୍ଡ ଦଳର ନିୟମିତ ସଦସ୍ୟ ରହିଆସିଥିଲେ। ୭୩ଟି ଟେଷ୍ଟ ଖେଳି ସେ ୩୮.୧୧ ରନ ହାରରେ ୩,୭୭୩ ରନ ସଂଗ୍ରହ କରିଥିଲେ ଓ ୮ଟି ଶତକ ସହ ୧୯ଟି ଅର୍ଦ୍ଧଶତକ ଅର୍ଜନ କରିଥିଲେ। ନ୍ୟୁଜିଲାଣ୍ଡର ୨୫୭ଟି ଉଇକେଟକିପିଂ ଡିସ୍ମିସାଲ ରେକର୍ଡରେ ତାଙ୍କର ଭୂମିକା ରହିଥିଲା। ଏଥିରେ ୨୪୯ଟି କ୍ୟାଚ୍ ସାମିଲ ରହିଥିଲା। ତେବେ ସୀମିତ ଓଭର କ୍ରିକେଟରେ ସେ ସେତେଟା ସକ୍ରିୟ ନ ଥିଲେ। କ୍ୟାରିୟରରେ ସେ ମାତ୍ର ୨୮ଟି ଦିନିକିଆ ଓ ୫ଟି ଟି୨୦ ମ୍ୟାଚ୍ ଖେଳିଛନ୍ତି।
