ମୋହନା,୧୪ା୫(ମନ୍ମଥ ମିଶ୍ର): ଭାରସାମ୍ୟ ହରାଇ ରାସ୍ତା ଉପରୁ ୧୫ ଫୁଟ ତଳକୁ ଏକ ବାଇକ୍ ଖସିପଡ଼ିବାରୁ ଭଉଣୀ-ଭାଇ ଗୁରୁତର ହୋଇଥିବାବେଳେ ଜଣେ ଆହତ ହୋଇଛନ୍ତି। ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ଗଜପତି ଜିଲା ମୋହନା ଥାନା ଅନ୍ତର୍ଗତ ରେକାମେରା ଗାଁ ନିକଟସ୍ଥ ବୁଲାଣି ରାସ୍ତାରେ। ଭାଇ ବିକ୍ରମ ବଳିୟାରସିଂ ( ୨୮) ଦୁଇ ଭଉଣୀ ରୁବି ନାୟକ ( ୨୨), ଫେଲସିତା ନାୟକ(୧୫) ଏକ ବାଇକ୍ରେ ମୋହନାଠାରୁ ଖ୍ରୀଷ୍ଟପୁର ଗାଁ ୟକୁ ଗଲାବେଳେ ଏହି ଦୁର୍ଘଟଣା ଘଟିଛି। ବୁଲାଣି ରାସ୍ତା ହୋଇଥିବାରୁ ବାଇକ ଆରୋହୀ ଜଣକ ଭାରସାମ୍ୟ ହରାଇ ୧୫ ଫୁଟ ରାସ୍ତା ତଳକୁ ଛିଟିକି ପଡ଼ିଥିଲେ। ଯାହା ଫଳରେ ସେଠାରେ ଥିବା କିଛି ସ୍ଥାନୀୟ ଲୋକେ ଉଦ୍ଧାର କରି ୧୦୮ରେ ତିନି ଜଣଙ୍କୁ ମୋହନା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ପ୍ରାଥମିକ ଚିକିତ୍ସା ପରେ ଭାଇ ବିକ୍ରମଙ୍କ ମୁଣ୍ଡ ଏବଂ ଛାତିରେ ଗଭୀର ଆଘାତ ଲାଗିଥିବା ବେଳେ ଭଉଣୀ ରୁବିଙ୍କ ଛାତିରେ ଗଭୀର ଆଘାତ ଲାଗିଥିବା ହେତୁ ଅଧିକ ଚିକିତ୍ସା ପାଇଁ ଡାକ୍ତର ସିମରନ ବିଶୋୟୀ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତରିତ କରିଥିବାବେଳେ ଅନ୍ୟ ଭଉଣୀ ଫେଲସିତା ମୋହନା ମେଡିକାଲରେ ଚିକିତ୍ସିତ ହେଉଛନ୍ତି।
