ବ୍ରହ୍ମପୁର ଅଫିସ,୧୯।୫: ରେଶମ ସହର ବ୍ରହ୍ମପୁରରେ ଗ୍ରୀଷ୍ମ ପ୍ରଭାବରେ ପ୍ରତିଦିନ ଉତ୍ତାପ ବଢ଼ୁଥିବାରୁ ପ୍ରବଳ ଗରମ ଅନୁଭୂତ ହେବା ସହ ପାରଦ ବଢ଼ିଚାଲିିଛି। ଅନ୍ୟପଟେ ବଜାରରେ କିଛି ଦିନ ହେବ ପ୍ରବେଶ କରିଛି ଖରାଦିନିଆ ଫଳ ଲିଚୁ। ଲିଚୁରେ ପ୍ରବଳ ମାତ୍ରାରେ ଭିଟାମିନ ସି, ବି-୬, ନିୟାସିନ, ଫୋଲେଟ, ମ୍ୟାଗ୍ନେସିୟମ, ଫସ୍ଫରସ୍, ରାଇବୋପ୍ଲୋବିନ ସମେତ ଅନେକ ପ୍ରକାର ପୋଷକ ତତ୍ତ୍ୱ ଥାଏ। ଯାହା ଶରୀରକୁ ଥଣ୍ଡା ରଖିବା ସହ ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବାରେ ମଧ୍ୟ ସହାୟକ ହୋଇଥାଏ। ଏହି କାରଣରୁ ବଜାରରେ ଲିଚୁର ଚାହିଦା ସର୍ବଦା ଅଧିକ ରହିଥାଏ, କିନ୍ତୁ ଚଳିତ ବର୍ଷ ଚାହିଦା ଅପେକ୍ଷା ଲିଚୁ ଦର ଅହେତୁକ ବୃଦ୍ଧି ପାଇଥିବାରୁ ବିକ୍ରି କମ ହେଉଥିବା ଦେଖିବାକୁ ମିଳିଛି। ବ୍ରହ୍ମପୁର ବଜାରରେ ବିକ୍ରି ହେଉଥିବା ଲିଚୁ ମୁଖ୍ୟତଃ ପଡ଼ୋଶୀ ରାଜ୍ୟ ପଶ୍ଚିମବଙ୍ଗ,ବିହାର ଓ ଉତ୍ତରପ୍ରଦେଶରୁ ଅଧିକ ଆମଦାନୀ ହେବା ସହ ଓଡ଼ିଶାର ଫୁଲବାଣୀ ଓ ସମ୍ବଲପୁରରେ ଉପତ୍ାଦିତ ହେଉଥିବା ଲିଚୁ ମଧ୍ୟ ବ୍ରହ୍ମପୁର ବଜାରରେ ଉପଲବ୍ଧ ହୋଇପାରୁଛି। କିନ୍ତୁ ବିହାରରୁ ଆମଦାନୀ ହେଉଥିବା ଲିଚୁ ଦେଖିବାକୁ ଆକର୍ଷଣୀୟ ଓ ବେଶ୍ ସ୍ବାଦଯୁକ୍ତ ହୋଇଥିବାରୁ ଏହା କେଜି ପିଛା ସର୍ବାଧିକ ୧୬୦ ଟଙ୍କାରେ ବିକ୍ରି ହେବା ସହ ଏହାର ଚାହିଦା ରହିଛି। ବ୍ରହ୍ମପୁର ବଜାରରେ ବଡ଼ବଜାର, ସାନବଜାର ଛକ, ବିଭିନ୍ନ ଫଳ ଦୋକାନ ବ୍ୟତୀତ ଖଲ୍ଲିକୋଟ ବିଶ୍ୱବିଦ୍ୟାଳୟ ଖେଳପଡ଼ିଆ ରାସ୍ତା, ଅନ୍ନପୂର୍ଣ୍ଣା ବଜାରରେ ଲିଚୁ ବେଶି ପରିମାଣରେ ବିକ୍ରି ହେଉଥିବା ଦେଖିବାକୁ ମିଳୁଛି। ବିଗତ ବର୍ଷ ବଜାରରେ ଲିଚୁ କିଲୋ ପିଛା ୮୦ -୧୦୦ ଟଙ୍କା ଦରରେ ବିକ୍ରି ହେଉଥିବା ବେଳେ ଚଳିତ ବର୍ଷ ଦର ୧୩୦- ୧୬୦ ଟଙ୍କା ପ୍ରତି କିଲୋ ରହିଛି। ପୂର୍ବ ବର୍ଷମାନଙ୍କରେ ନିୟମିତ ପ୍ରାୟ ୫୦ରୁ ୭୦ କେଜି ଲିଚୁ ଦୈନିକ ଖୁଚୁରାରେ ବିକ୍ରି ହେଉଥିଲା। କିନ୍ତୁ ଚଳିତ ବର୍ଷ ମାତ୍ର ୨୦ରୁ ୩୦ କେଜି ବିକ୍ରି ହୋଇପାରୁଛି। ଗତ ବର୍ଷ ତୁଳନାରେ ଚଳିତ ବର୍ଷ ଲିଚୁ ଦରବୃଦ୍ଧି ପାଇଛି ଯାହାଦ୍ୱାରା ଇଚ୍ଛା ଥିବା ସତ୍ତ୍ୱେ ଗ୍ରାହକ କିଣିବାକୁ ପଛଘୁଞ୍ଚା ଦେଉଥିବା ଖୁଚୁରା ବେପାରୀମାନଙ୍କଠାରୁ ପ୍ରକାଶ।
