ଭୁବନେଶ୍ୱର,୨୯।୧୦: ଆଗକୁ ଝାଡଖଣ୍ଡ ନିର୍ବାଚନ। ଏନେଇ ରାଜ୍ୟର ଶାସକ ଦଳ ଓ ବିରୋଧୀ ଦଳ ଅଣ୍ଟା କଷିଲେଣି। ଶାସକ ଝାଡଖଣ୍ଡ ମୁକ୍ତି ମୋର୍ଚ୍ଚା କଂଗ୍ରେସ ଓ ଆରଜେଡି ସହ ମେଣ୍ଟ କରି ମଇଦାନକୁ ଓହ୍ଲାଇଛି। ସେହିପରି ଭାରତୀୟ ଜନତା ପାର୍ଟି ମଧ୍ୟ ଏଥର ଶାସନ କ୍ଷମତାକୁ ଆସିବାକୁ ଜୋରଦାର ରଣନୀତି ପ୍ରସ୍ତୁତ କରୁଛି। ତେବେ ଏହାରି ଭିତରେ ସବୁଠାରୁ ବଡ଼ କଥା ହେଉଛି ଜଣେ ପୂର୍ବତନ ଟାଣୁଆ ନେତା ପୁଣି ସକ୍ରିୟ ହୋଇଯାଇଛନ୍ତି। ସେ ହେଲେ ମୟୂରଭଞ୍ଜ ଜିଲା ବିଜେଡି ସଭାପତି ତଥା ଗତ ବିଜେଡି ସରକାରର ସବୁଠାରୁ ଟାଣୁଆ ମନ୍ତ୍ରୀ ସୁଦାମ ମାରାଣ୍ଡି।
ତେବେ କିଛିଦିନର ନିରବତା ପରେ ପୁଣିଥରେ ସୁଦାମଙ୍କୁ ସକ୍ରିୟ ହୋଇଥିବା ଦେଖିବାକୁ ମିଳିଛି। ଯାହା ଏବେ ଖାଲି ଜିଲା ରାଜନୀତି ନୁହେଁ ଓଡ଼ିଶା ସମେତ ଝାଡଖଣ୍ଡ ରାଜନୀତିକୁ ମଧ୍ୟ ହଲଚଲ କରିଛି। ଚଳିତ ନିର୍ବାଚନରେ ମୟୂରଭଞ୍ଜ ବାଙ୍ଗିରିପୋଷିରେ ତାଙ୍କର ସ୍ଥିତି ଦୃଢ ଥିବାରୁ ତାଙ୍କୁ ସେଠାରୁ ହିଁ ଟିକେଟ୍ ମିଳିବ ବୋଲି ଆଶା କରାଯାଉଥିଲା। କିନ୍ତୁ ଦଳର ଶୀର୍ଘ ନେତୃତ୍ୱ ତାଙ୍କୁ ଲୋକ ସଭା ଟିକେଟ୍ ଦେଇଥିଲେ। ଅନିଚ୍ଛା ସତ୍ତ୍ୱେ ତାଙ୍କୁ ବିଧାନସଭା ଛାଡି ଲୋକ ସଭା ଆସନରେ ଲଢିଥିଲେ। ତେବେ ବିଜେଡି ଲୋକ ସଭା ଓ ବିଧାନସଭା ଆସନକୁ ହାତେଇବା ପାଇଁ ସୁଦାମଙ୍କ ସ୍ତ୍ରୀ ରଞ୍ଜିତାଙ୍କୁ ବାଙ୍ଗିରିପୋଷିରୁ ଟିକେଟ୍ ଦେଇଥିଲା। ତେବେ ରାଜନୀତିରେ ସମୂର୍ଣ୍ଣ ନୂଆ ଓ ଶିକ୍ଷୟତ୍ରୀ ସ୍ତ୍ରୀଙ୍କ ପାଇଁ ଏହା କଷ୍ଟ ହୋଇଥିଲେ ମଧ୍ୟ ସୁଦାମଙ୍କ ଲୋକ ସମର୍ଥନରେ ସେ ବିଜୟୀ ହେବେ ବୋଲି ଏକପ୍ରକାର ଦୃଢବିଶ୍ୱାସ ରଖିଥିଲେ। ପ୍ରଥମ ଥର ପାଇଁ ମାରାଣ୍ଡି ଦମ୍ପତିଙ୍କୁ ନିର୍ବାଚନରେ ଏକାଠି ଦେଖିବାକୁ ମିଳିଥିଲା। କିନ୍ତୁ ମୟୂରଭଞ୍ଜରେ ଭାଜପାର ଲହର ଯୋଗୁ ଉଭୟ ମାରାଣ୍ଡି ଦମ୍ପତି ବଡ଼ ପରାଜୟର ସମ୍ମୁଖୀନ ହୋଇଥିଲେ। ଭାଜପାର ନବଚରଣ ମାଝୀଙ୍କ ପାଖରୁ ସୁଦାମ ଓ ନବାଗତା ସଞ୍ଜଲୀ ମୁର୍ମୁଙ୍କ ପାଖରୁ ସ୍ତ୍ରୀ ରଞ୍ଜିତା ମାରାଣ୍ଡି ପରାଜିତ ହୋଇଥିଲେ।
ତେବେ ନିର୍ବାଚନ ଫଳାଫଳ ବିଜେଡି ପାଇଁ ଯେପରି ଆକସ୍ମିକ ଥିଲା ସୁଦାମ ମାରାଣ୍ଡିଙ୍କ ପାଇଁ ସେମିତି ଅପ୍ରତ୍ୟାଶିତ ଥିଲା। ଏଥିପାଇଁ ସାଧାରଣ ଜନଜୀବନରୁ ସେ ବେଶ୍ ଦୂରେଇ ଯାଇଥିଲେ। କୌଣସି ସଭା ସମିତିରେ ମଧ୍ୟ ତାଙ୍କୁ ଦେଖିବାକୁ ମିଳିଲାନି। ପରେ ସେ ଡାକିଥିବା ଜିଲା ବିଜେଡି ବୈଠକରେ ଜିଲାର ବହୁ ବରିଷ୍ଠ ନେତା ଯୋଗ ଦେଲେନି। ଏହାପରେ ବିଜେଡିର ଜିଲାସ୍ତରୀୟ ସମୀକ୍ଷା ବୈଠକରେ ମଧ୍ୟ ମାରାଣ୍ଡି ଦମ୍ପତିଙ୍କୁ ଦେଖିବାକୁ ମିଳିଲାନି। ଏହାକୁ ନେଇ ତାଙ୍କ ସମର୍ଥକଙ୍କ ମଧ୍ୟରେ ସସପେନ୍ସ ଲାଗି ରହିଲା। କିନ୍ତୁ ହଠାତ୍ ଅକ୍ଟୋବର ୧୩ରୁ ୧୯ ତାରିଖ ସୁଦାମ ମାରାଣ୍ଡିଙ୍କୁ ଦିଲ୍ଲୀରୁ ଡକରା ହୋଇଥିଲା। ଆଉ ସେଠାରୁ ସେ ଆସିବା ପରେ ହଠାତ୍ ସକ୍ରିୟ ହୋଇଯାଇଛନ୍ତି। ତେବେ ତାଙ୍କୁ ଦିଲ୍ଲୀକୁ କିଏ ଡକରା ପଠେଇଥିଲେ ଏନେଇ ସ୍ପଷ୍ଟ ସୂଚନା ନାହିଁ। କିନ୍ତୁ ନିକଟରେ ଦେଇଥିବା ତାଙ୍କ ବୟାନ ଆଗାମୀ ଝାଡଖଣ୍ଡ ନିର୍ବାଚନ ଚର୍ଚ୍ଚାକୁ ତାଙ୍କର ଉପସ୍ଥିତି ରହିପାରେ ବୋଲି କୁହାଯାଉଛି। ସେ ଗଣମାଧ୍ୟମକୁ କହିଛନ୍ତି, ମୁଁ ଓ ମୋ ସ୍ତ୍ରୀ ଏବେ ସମରସଜ୍ଜା କରୁଛୁ। ଆସନ୍ତା ନିର୍ବାଚନରେ ମୁଁ ପୁଣି ବଳ ଗୋଟାଇ ଫେରିବି।
ସୂଚନାଥାଉ କି, ସୁଦାମ ମାରାଣ୍ଡି ଝାଡଖଣ୍ଡ ମୁକ୍ତିମୋର୍ଚ୍ଚାରୁ ନିଜର ରାଜନୈତିକ କ୍ୟାରିୟର ଆରମ୍ଭ କରିଥିଲେ। ଏହାପରେ ୨୦୦୪ରୁ ସେହି ଦଳରୁ ଲୋକ ସଭା ଏମପି ହୋଇଥିଲେ। ୨୦୧୪ରେ ସେ ବିଜେଡିରେ ଯୋଗ ଦେଇ ଜିଲା ବିଜେଡିର ମଙ୍ଗ ଧରିଥିଲେ। ଏହାପରେ ୨-୨ ଥର ବାଙ୍ଗିରିପୋଷି ଆସନରୁ ବିଧାୟକ ହୋଇଥିଲେ। ଏହି ସମୟରେ ସେ ବିଜେଡିର ବହୁ ଗୁରୁତ୍ୱପୂର୍ଣ୍ଣ ବିଭାଗ ସ୍କୁଲ ଓ ଗଣଶିକ୍ଷା ଏବଂ ରାଜସ୍ବ ଓ ବିପର୍ଯ୍ୟୟ ମନ୍ତ୍ରୀ ଥିଲେ।
