ଚଣ୍ଡିଗଡ଼,୧୭।୩ : ପଞ୍ଜାବରେ ନୂଆ ସରକାରଙ୍କ କ୍ଷମତା ଦଖଲ ପରେ ଆମ୍ ଆଦ୍ମୀ ପାର୍ଟି (ଏଏପି)ପାଇଁ ଚ୍ୟାଲେଞ୍ଜ୍ ସୃଷ୍ଟି କରିଛି ରାଜ୍ୟର ନିଶାକ୍ତଙ୍କ ସମସ୍ୟା। ଆମ୍ ଆଦ୍ମୀ ପାର୍ଟି ପକ୍ଷରୁ ନିର୍ବାଚନ ସମୟରେ ପ୍ରଦାନ କରାଯାଇଥିବା ପ୍ରତିଶ୍ରୁତି ମଧ୍ୟରେ ଏକ କୋଟି ମହିଳାଙ୍କୁ ମାସକୁ ୧୦୦୦ ଟଙ୍କା ଆର୍ଥିକ ସହାୟତା, ୧୬ ହଜାର ମୋହଲା କ୍ଲିନିକ ସ୍ଥାପନ ଏବଂ ବିଦ୍ୟୁତ୍ ଦେୟ ଛାଡ ଆଦି ରହିଛି। ଏସବୁ ପ୍ରତିଶ୍ରୁତି ଆଧାରରେ ଆମ ଆଦମୀ ପାର୍ଟି କ୍ଷମତା ଗ୍ରହଣ କରିଛି।
ତେବେ ଡ୍ରଗ୍ସ ଏବଂ ଡ୍ରଗ ମାଫିଆକୁ ଦୂର କରିବା ଆମ୍ ଆଦ୍ମୀ ପାର୍ଟି ସରକାରଙ୍କ ସାମ୍ନାରେ ଏକ ବଡ ଆହ୍ବାନ ସୃଷ୍ଟି କରିଛି ବୋଲି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ପଞ୍ଜାବରେ ୨ ଲକ୍ଷରୁ ଅଧିକ ନିଶାଶକ୍ତ ଅଛନ୍ତି। ରାଜ୍ୟରେ ଦିନକୁ ୧୭ କୋଟିରୁ ଅଧିକ ଟଙ୍କାର ନିଶା କାରବାର ହେଉଛି। ଅର୍ଥାତ୍ ଗୋଟିଏ ବର୍ଷରେ ଡ୍ରଗ୍ସ ପାଇଁ ପ୍ରାୟ ୬୫୦୦ କୋଟି ଟଙ୍କା ଖର୍ଚ୍ଚ କରୁଛନ୍ତି।
ଏଥିରୁ ଅନୁମାନ କରାଯାଇପାରେ ଯେ ପଞ୍ଜାବରେ ଡ୍ରଗ କାରବାରର ଆକାର କେତେ ବଡ଼। ୨୦୧୫ ଏବଂ ୨୦୧୬ ବର୍ଷ ପର୍ଯ୍ୟନ୍ତ କରାଯାଇଥିବା ସର୍ବେକ୍ଷଣ ଅନୁଯାୟୀ, କେବଳ ୯୯ ପ୍ରତିଶତ ପୁରୁଷ ନିଶାଶକ୍ତ ଥିଲେ, କିନ୍ତୁ ବର୍ତ୍ତମାନ ମହିଳାମାନେ ମଧ୍ୟ ନିଶା କାରବାରରେ ଜଡ଼ିତ ହେବାରେ ଲାଗିଛନ୍ତି । ଭାରତ ସରକାରଙ୍କ ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରଣାଳୟର ଏକ ରିପୋର୍ଟ ଅନୁଯାୟୀ ପଞ୍ଜାବରେ ଡ୍ରଗ ବ୍ୟବହାରକାରୀଙ୍କ ସଂଖ୍ୟା ୨,୩୨,୮୫୬ ରହିଛି। ଏହି ସର୍ବେକ୍ଷଣରେ ଦର୍ଶାଯାଇଛି ଯେ ୫୩ ପ୍ରତିଶତ ଲୋକ ଅର୍ଥାତ୍ ୧୨୩୪୧୩ ଜଣ ହିରୋଇନ ନିଶା କରିଥାନ୍ତି।
ହାରାହାରି, ଜଣେ ଯୁବକ ହିରୋଇନ ନିଶା କରିବା ପାଇଁ ପ୍ରତିଦିନ ୧୪୦୦ ଟଙ୍କା ଆବଶ୍ୟକ କରିଥାନ୍ତି। ୨୦୧୫ରେ, ପଞ୍ଜାବରେ ଡ୍ରଗ ଉପରେ ନିର୍ଭରଶୀଳ ବ୍ୟକ୍ତିଙ୍କ ସଂଖ୍ୟା ଜାଣିବା ପାଇଁ ଭାରତ ସରକାରଙ୍କ ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରଣାଳୟ ଦ୍ୱାରା ଏକ ଅଧ୍ୟୟନ ପାଇଁ ନିର୍ଦ୍ଦେଶ ଦିଆଯାଇଥିଲା। ପଞ୍ଜାବ ସରକାରଙ୍କ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ସହଯୋଗରେ ସୋସାଇଟି ଫର ପ୍ରମୋସନ ଅଫ ୟୁଥ ଆଣ୍ଡ ମାସ ଏବଂ ନ୍ୟାଶନାଲ ଡ୍ରଗ ନିର୍ଭରଶୀଳ ଚିକିତ୍ସା କେନ୍ଦ୍ର୍ ଏବଂ ଏମ୍ସ୍ ଅନୁସନ୍ଧାନକାରୀଙ୍କ ଏକ ଟିମ ଦ୍ୱାରା ଏହି ସର୍ଭେ କରାଯାଇଥିଲା।
ଏହି ସର୍ଭେରେ ଭଟିଣ୍ଡା, ଫିରୋଜପୁର, ଜଳନ୍ଦର, କାପୁରତାଲା, ଗୁରୁଦାସପୁର, ହୋଶିଆରପୁର, ପଟିଆଲା, ସଙ୍ଗରିଆ, ମୋଗା ଏବଂ ତରନ ତାରନ ଜିଲାକୁ ଅନ୍ତର୍ଭୁକ୍ତ କରାଯାଇଥିଲା। ବିଶେଷଜ୍ଞମାନେ କହିଛନ୍ତି ଯେ ପଞ୍ଜାବରେ ମଦ୍ୟପାନ ବୃଦ୍ଧି ପାଇଛି, ଏହା ହ୍ରାସ ପାଇନାହିଁ। ବଡ଼ ବଡ଼ ଅପରାଧୀ ଧରା ପଡ଼ି ନାହାନ୍ତି। ପୋଲିସ କେବଳ ଛୋଟ ଅପରାଧୀଙ୍କୁ ଧରି ଜେଲ୍ରେ ଭର୍ତ୍ତି କରିଛି।
ପଞ୍ଜାବରେ ୭୬ ପ୍ରତିଶତ ନିଶାଶକ୍ତଙ୍କ ବୟସ ୧୮ ରୁ ୩୫ ବର୍ଷ ମଧ୍ୟରେ। ସର୍ଭେରେ ଏହା ମଧ୍ୟ ଜଣାପଡିଛି ଯେ ଯେଉଁମାନେ ଡ୍ରଗ୍ସ ନେଉଛନ୍ତି ସେମାନଙ୍କ ମଧ୍ୟରୁ ୮୯ ପ୍ରତିଶତ ଶିକ୍ଷିତ । ୮୩ ପ୍ରତିଶତ ଡ୍ରଗ୍ସ ନେବା ସମୟରେ ଡ୍ୟୁଟି କରୁଛନ୍ତି। ନିଶାଶକ୍ତଙ୍କ ମଧ୍ୟରୁ ୫୬ ପ୍ରତିଶତ ଗାଁରେ ବାସ କରୁଛନ୍ତି। ସର୍ବେକ୍ଷଣରୁ ଏହା ମଧ୍ୟ ଜଣାପଡିଛି ଯେ ୮୦ ପ୍ରତିଶତରୁ ଅଧିକ ଡ୍ରଗ ଛାଡିବାକୁ ଚେଷ୍ଟା କରନ୍ତି, ମାତ୍ର ପ୍ରାୟ ୩୦ ପ୍ରତିଶତ ପ୍ରକୃତରେ ଏହାକୁ ଛାଡ଼ିବାରେ ସକ୍ଷମ ହେଉଛନ୍ତି।
