ଗୁଡାରି,୨୬।୭(ପ୍ରମୋଦ କୁମାର ପତି ): ରବିବାର ଗୁଡାରି ବ୍ଲକ ଅଙ୍ଗନବାଡି ସଂଘ ପକ୍ଷରୁ ସ୍ଥାନୀୟ ଦୁର୍ଗାପୂଜା ମଣ୍ଡପରେ ଏକ ବୈଠକ ଅନୁଷ୍ଠିତ ହୋଇଯାଇଛି। ଜିଲା ସଙ୍ଘର ନିଷ୍ପତ୍ତି କ୍ରମେ ବିଭିନ୍ନ ଦାବି ନେଇ ଆସନ୍ତା ୭ ତାରିଖରେ ଗୁଡାରିରେ ବ୍ଲକ ଅଙ୍ଗନବାଡି କର୍ମୀ ଓ ସହାୟିକାମାନେ ଏକ ରାଲି କରିବେ ବୋଲି ନେତ୍ରୀ ମୋହିନୀ ପାଲକା ସୂଚନା ଦେଇଛନ୍ତି। ସରକାରଙ୍କ ସମସ୍ତ ଯୋଜନାକୁ ସଫଳ ରୂପାୟନ ଦେବାରେ ଅଙ୍ଗନବାଡିକର୍ମୀଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିବାବେଳେ ସେମାନଙ୍କୁ ବାରମ୍ବାର ଅଣଦେଖା କରାଯାଉଛି ବୋଲି ଶ୍ରମିକ ନେତା ତଥା ଭାରତୀୟ ମଜଦୁର ସଂଘ ରାଜ୍ୟ ଉପସଭାପତି ଯୋଗେଶ୍ୱର ଦାସ କହିଛନ୍ତି। ସେ କହିବାନୁଯାୟୀ ରାଜ୍ୟର ଅନେକ ଜିଲାରେ ଅଙ୍ଗନବାଡି କର୍ମୀଙ୍କ ଅବସର ବୟସ ୬୨ ରହିଥିବା ବେଳେ ରାୟଗଡା ଜିଲାରେ ୬୦ ରହିଛି। ତେଣୁ ଜିଲାରେ କାର୍ଯ୍ୟରତ ସମସ୍ତ ଅଙ୍ଗନବାଡି କର୍ମୀଙ୍କ ଅବସର ବୟସ ସୀମା ୬୦ ରୁ ୬୨ ବର୍ଷକୁ ବୃଦ୍ଧି କରିବା ନିମନ୍ତେ ସେ ପ୍ରଶାସନ ନିକଟରେ ଦାବି ରଖିଛନ୍ତି। ଆସନ୍ତା ୭ ତାରିଖରେ ଏହା ମୁଖ୍ୟ ଦାବି ରହିବା ସହ ଅନ୍ୟାନ୍ୟ ଦାବି ମଧ୍ୟ ଉପସ୍ଥାପନା କରାଯିବ ବୋଲି ସଂଘ ତରଫରୁ ସୂଚନା ମିଳିଛି ଏବଂ ସିଡିପିଓଙ୍କ ଜରିଆରେ ଏହି ଦାବିପତ୍ର ଜିଲାପାଳଙ୍କୁ ପ୍ରଦାନ କରାଯିବ।ଏହି ବୈଠକରେ ବ୍ଲକର ସମସ୍ତ ଅଙ୍ଗନବାଡି କର୍ମୀ ଓ ସହାୟିକା ଯୋଗଦେଇଥିଲେ।
Odisha’s No.1 Odia Daily
