ଭିଏନା, ୧୩।୪: ନିକଟରେ ବୈଜ୍ଞାନିକମାନେ ୧୫୦୦ ବର୍ଷ ପୂର୍ବରୁ ଲେଖାଯାଇଥିବା ବାଇବେଲର ଏକ ଲୁକ୍କାୟିତ ଅଧ୍ୟାୟର ଠାବ କରିଛନ୍ତି। ସେହି ପୃଷ୍ଠାରେ ମେଥ୍ୟୁର ୧୧ରୁ ୧୨ ଅଧ୍ୟାୟ ରହିଛି। ଯେଉଁଥିରେ ଏବେର ଲେଖାଠାରୁ ଅଧିକ ତଥ୍ୟ ରହିଛି। ଭାଟିକାନ ଲାଇବ୍ରେରିରେ ରଖାଯାଇଥିବା ଏହି ବାଇବେଲରେ ଅତିବାଇଗଣି ରଶ୍ମି ପକାଇବାରୁ ବୈଜ୍ଞାନିକଙ୍କୁ ଏହି ଅଧ୍ୟାୟ ବିଷୟରେ ଜଣାପଡିଥିଲା। ଏଥିରେ ଲେଖିଥିବା ସିରିଆଇ ଭାଷାର ଅନୁବାଦ ସମ୍ପୂର୍ଣ୍ଣ କରାଯାଇନାହିଁ। ହେଲେ କିଛି ତଥ୍ୟ ସର୍ବସମ୍ମୁଖକୁ ଅଣାଯାଇଛି। ମେଥ୍ୟୁର ଅଧ୍ୟାୟ ୧୨ରେ ତଥ୍ୟକୁ ଗ୍ରୀକ୍ ଭାଷାରେ ଲେଖାଯାଇଛି। ସେଥିରେ ଏକ ତଥ୍ୟ ରହିଛି, ଯିଶୁ ଦିନେ ତାଙ୍କ ଶିଷ୍ୟଙ୍କ ସହ ଏକ ଧାନକ୍ଷେତ ଦେଇ ଯାଉଥିଲେ। ସେତେବେଳେ ତାଙ୍କ ଶିଷ୍ୟଙ୍କୁ ଭୋକ ଲାଗିଲା। ଯିଶୁ ସେହି କ୍ଷେତରୁ ଧାନ ଗଛ ଭାଙ୍ଗିଲେ ଏବଂ ଶିଷ୍ୟଙ୍କୁ ଦେବା ସହ ନିଜେ ଖାଇଥିଲେ। ହେଲେ ସିରିଆଇ ଅନୁବାଦରେ, ଧାନ ଗଛର ଧାନକୁ ଭାଙ୍ଗିଲେ, ତାକୁ ହାତରେ ଦଳି ଶିଷ୍ୟ ଏବଂ ନିଜେ ଖାଇଥିଲେ ବୋଲି ଉଲ୍ଲେଖ ରହିଛି। ଏହି ପ୍ରଥମ ଲେଖା ତୃତୀୟ ଶତାବ୍ଦୀ ସମୟରେ ଲେଖାଯାଇଥିଲା। ପରେ ସେହି ଲେଖାକୁ ଲିଭାଇ ଦିଆଯାଇଥିଲା। ସେତେବେଳେ ପଶୁ ଚମଡ଼ାରୁ ପ୍ରସ୍ତୁତ କାଗଜ ବହୁତ ମହଙ୍ଗା ଥିଲା। ସେଥିପାଇଁ ତାକୁ ପୁନଃ ବ୍ୟବହାର କରିବାକୁ ଏପରି କରାଯାଉଥିଲା। ଏହାକୁ ଠାବ କରିଥିବା ଅଷ୍ଟ୍ରିଆନ ଏକାଡେମିକ ଅଫ୍ ସାଇନ୍ସର ବୈଜ୍ଞାନିକ ଗ୍ରିଗୋରି କେସେଲ କହିଛନ୍ତି, ପୁନଃ ବ୍ୟବହାର କରାଯାଇଥିବା ଏହି ପାଣ୍ଡୁଲିପିରେ ଲେଖାଯାଇଥିବା ସମସ୍ତ ତଥ୍ୟ ପୁରୁଣା ସିରିଆଇ ଭାଷା ସହିତ ସାମିଲ ଅଛି। ଏହି ସିରିଆଇ ଅନୁବାଦ ପ୍ରମାଣ କରୁଛି କି ଆଜିର ଶାସ୍ତ୍ର (ଯିଶୁଖ୍ରୀଷ୍ଟଙ୍କ ଧର୍ମବାଣୀ)ର ଲେଖାଠାରୁ ବହୁତ ଅଲଗା। ଅତିବାଇଗଣି ରଶ୍ମି ଦ୍ୱାରା କାଗଜରେ ଲୁଚି ରହିଥିବା ଲେଖା ନୀଳ ରଙ୍ଗ ହୋଇଉଠେ। ଏହା ବୈଜ୍ଞାନିକଙ୍କ ମଧ୍ୟରେ ଅଧିକ ଲୋକପ୍ରିୟ । ସେହି କାଗଜକୁ ଯେତେ ଥର ପୁନଃ ବ୍ୟବହାର କରାଯାଇଥିଲେ ମଧ୍ୟ ଅତିବାଇଗଣି ରଶ୍ମିରେ ତାହା ଦେଖାଯାଇଥାଏ। ସର୍ବ ପ୍ରଥମରେ ଲେଖା ଯାଇଥିବା ଲେଖାକୁ ମଧ୍ୟ ଏହି ରଶ୍ମି ସାହାଯ୍ୟରେ ପଢାଯାଇପାରିବ। ଶାସ୍ତ୍ରରେ ଲେଖିଥିବା ପୁରୁଣା ସିରିଆଇ ଅନୁବାଦକୁ ‘ପୋଶିଟା’ ବୋଲି କୁହାଯାଉଥିଲା। ପରେ ୫ମ ଶତାବ୍ଦୀରେ ସିରିଆଇ ଚର୍ଚ୍ଚରେ ଏହାକୁ ବହୁଳ ଭାବେ ବ୍ୟବହାର କରାଗଲା।
