ସାଲେମ(ତାମିଲନାଡୁ), ୧୭।୯: ରୋହନ କୁନ୍ନୁମ୍ମାଲ ଓ ଅଧିନାୟକ ହନୁମା ବିହାରୀଙ୍କ ପରେ ଉଇକେଟକିପର ରିକି ଭୁଇଙ୍କ ଶତକ ସହାୟତାରେ ଦକ୍ଷିଣାଞ୍ଚଳ ଏଠାରେ ଚାଲିଥିବା ଦୁଲୀପ ଟ୍ରଫି କ୍ରିକେଟ ସେମିଫାଇନାଲରେ ଏହାର ପ୍ରଥମ ଇନିଂସକୁ ୬୩୦/୮ରେ ଘୋଷଣା କରିଛି। ଶୁକ୍ରବାର ଦ୍ୱିତୀୟ ଦିବସ ଖେଳ ଶେଷ ବେଳକୁ ଉତ୍ତରାଞ୍ଚଳ କୌଣସି ଉଇକେଟ ନ ହରାଇ ୨୪ ରନ ସଂଗ୍ରହ କରିଛି। ପ୍ରତିଭା ସମ୍ପନ୍ନ ୟାଶ୍ ଧୁଲ ୮ ଓ ମନନ ଭୋରା ୧୧ ରନରେ ଅପରାଜିତ ଅଛନ୍ତି। ସମସ୍ତ ଉଇକେଟ ସୁରକ୍ଷିତ ଥିବାବେଳେ ଉତ୍ତରାଞ୍ଚଳ ୬୦୬ ରନ ପଛରେ ରହିଛି।
ପ୍ରଥମ ଦିବସର ଅସମାପ୍ତ ସ୍କୋର ୩୨୪/୨ରୁ ଖେଳ ଆରମ୍ଭ କରିଥିବା ଦକ୍ଷିଣାଞ୍ଚଳ ଆଉ ୫୦ ରନ ଯୋଗ କରିବା ପରେ ହନୁମାଙ୍କ ଉଇକେଟ ହରାଇଥିଲା। ୨୫୫ ବଲ୍ ଖେଳିଥିବା ହନୁମା ୧୦ ଚୌକା ଓ ୨ ଛକା ସହାୟତାରେ ୧୩୪ ରନ କରିଥିଲେ। ଦ୍ୱିତୀୟ ଦିବସରେ ଆକର୍ଷଣର କେନ୍ଦ୍ରରେ ରହିଥିଲେ ଭୁଇ। ସେ ୧୭୦ଟି ବଲ୍ ଖେଳି ୧୦ ଚୌକା ଓ ୨ ଛକା ସହ ୧୦୩ ରନକରି ଅପରାଜିତ ରହିଥିଲେ। ବାବା ଇନ୍ଦ୍ରଜିତ ଅର୍ଦ୍ଧଶତକ ହାସଲ କରି ୬୫ ରନ କରିଥିଲେ। ଟେଲ୍ ଏଣ୍ଡର କ୍ରିଷ୍ଣାପ୍ପା ଗୋଥାମ ୪୮ ଓ ରବି ତେଜା ୪୨ ରନର ଉପଯୋଗୀ ଇନିଂସ ଖେଳିବାରୁ ଦକ୍ଷିଣାଞ୍ଚଳ ବୃହତ୍ ସ୍କୋରରେ ପହଞ୍ଚତ୍ ଯାଇଥିଲା। ପ୍ରଥମ ଦିବସରେ ଓପନର ରୋହନ କୁନ୍ନୁମ୍ମାଲ ୧୪୩ ରନର ଇନିଂସ ଖେଳିଥିଲେ। ଉତ୍ତରାଞ୍ଚଳ ବୋଲରଙ୍କ ମଧ୍ୟରେ ମୟଙ୍କ ଡାଗର ୩ଟି, ନିଶାନ୍ତ ସିନ୍ଧୁ ଓ ପୁଲକିତ ନାରଙ୍ଗ ୨ଟି ଲେଖାଏ ଏବଂ ନବଦୀପ ସଇନୀ ଗୋଟିଏ ଉଇକେଟ ନେଇଥିଲେ।
ଦୃଢ଼ ସ୍ଥିତିରେ ପଶ୍ଚିମାଞ୍ଚଳ
କୋଏମ୍ବାଟୁରଠାରେ ଚାଲିଥିବା ଅନ୍ୟ ସେମିଫାଇନାଲରେ କେନ୍ଦ୍ରାଞ୍ଚଳ ବିପକ୍ଷରେ ପଶ୍ଚିମାଞ୍ଚଳ ନିଜର ସ୍ଥିତି ସୁଦୃଢ଼ କରିଛି। ପ୍ରଥମ ଦିବସର ଅସମାପ୍ତ ସ୍କୋର ୨୫୨/୯ରୁ ଖେଳ ଆରମ୍ଭ କରିଥିବା ପଶ୍ଚିମାଞ୍ଚଳ ଆଉ ୫ ରନ ଯୋଗକରି ଅଲ୍ଆଉଟ ହୋଇ ଯାଇଥିଲା। କେନ୍ଦ୍ରାଞ୍ଚଳ କିନ୍ତୁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ପ୍ରଥମ ଇନିଂସରେ ମାତ୍ର ୧୨୮ ରନରେ ଅଲ୍ଆଉଟ ହୋଇ ଯାଇଥିଲା। ଅଧିନାୟକ କରନ ଶର୍ମା ସର୍ବାଧିକ ୩୪ ରନ କରିବାକୁ ସକ୍ଷମ ହୋଇଥିଲେ। ପଶ୍ଚିମାଞ୍ଚଳ ବୋଲରଙ୍କ ମଧ୍ୟରେ ଜୟଦେବ ଉନାଡକଟ ଓ ତନୁଶ କୋଟିଆନ ୩ଟି ଲେଖାଏ, ଅତୀତ ସେଠ୍ ୨ଟି ଏବଂ ଚିନ୍ତାନ ଗାଜା ଓ ଶାମ୍ସ ମୁଲାନୀ ଗୋଟିଏ ଲେଖାଏ ଉଇକେଟ ନେଇଥିଲେ। ଦ୍ୱିତୀୟ ଦିବସ ଖେଳ ଶେଷ ବେଳକୁ ପଶ୍ଚିମାଞ୍ଚଳ ଦ୍ୱିତୀୟ ଇନିଂସରେ ୩ ଉଇକେଟ ହରାଇ ୧୩୦ ରନ ସଂଗ୍ରହ କରିଛି। ଓପନର ପୃଥ୍ବୀ ଶ’ ଶତକ (୧୦୪ ରନ) ହାସଲ କରି ଅପରାଜିତ ରହିଛନ୍ତି। ଫଳରେ ୭ ଉଇକେଟ ସୁରକ୍ଷିତ ଥାଇ ପଶ୍ଚିମାଞ୍ଚଳ ମୋଟ ୨୫୯ ରନରେ ଅଗ୍ରଣୀ ହାସଲ କରିଛି। କେନ୍ଦ୍ରାଞ୍ଚଳର ଅଙ୍କିତ ରାଜପୁତ ୨ଟି ଓ ଅନିକେତ ଚୌଧାରୀ ଗୋଟିଏ ଉଇକେଟ ନେଇଛନ୍ତି।
ସଂକ୍ଷିପ୍ତ ସ୍କୋର
ଦକ୍ଷିଣାଞ୍ଚଳ ପ୍ରଥମ ଇନିଂସ: ୬୩୦/୮ (ଘୋଷଣା)। ଉତ୍ତରାଞ୍ଚଳ ପ୍ରଥମ ଇନିଂସ ୨୪/୦। ପଶ୍ଚିମାଞ୍ଚଳ ପ୍ରଥମ ଇନିଂସ: ୨୫୭/ଅଲ୍ଆଉଟ। କେନ୍ଦ୍ରାଞ୍ଚଳ ପ୍ରଥମ ଇନିଂସ: ୧୨୮/ଅଳ୍ଆଉଟ। ପଶ୍ଚିମାଞ୍ଚଳ ଦ୍ୱିତୀୟ ଇନିଂସ: ୧୩୦/୩।
