ଭୁବନେଶ୍ୱର,୬।୧(ବ୍ୟୁରୋ): ଦିଲ୍ଲୀରେ ହେବାକୁ ଥିବା ଜାତୀୟ ସାଧାରଣତନ୍ତ୍ର ଦିବସ କାର୍ଯ୍ୟକ୍ରମରେ ଯୋଗଦେବେ ନୂଆପଡ଼ା ଜିଲାର ଆଦିବାସୀ ଦମ୍ପତି। ରାଷ୍ଟ୍ରପତି ଭବନରୁ ଏନେଇ ନିମନ୍ତ୍ରଣ ପାଇବା ପରେ ଲାଲଗଡ଼ ଭାବେ ପରିଚିତ ସୁନାବେଡା ଅଭୟାରଣ୍ୟରେ ଥିବା ଆଦିବାସୀ ସମ୍ପ୍ରଦାୟ ମଧ୍ୟରେ ଖୁସିର ଲହରି ଖେଳିଯାଇଛି। ଅଭୟାରଣ୍ୟର ଆଦିମ ଜନଜାତି କୋଚଟିଆ ଭୁଞ୍ଜିଆ ସମ୍ପ୍ରଦାୟର ଭୁଜବଳ ମାଝୀ ଓ ସ୍ତ୍ରୀ କୁଞ୍ଜିବାଈ ମାଝୀ ୨୦୨୩ ସାଧାରଣତନ୍ତ୍ର ଦିବସ କାର୍ଯ୍ୟକ୍ରମରେ ଅତିଥି ଭାବେ ଯୋଗଦେବା ନେଇ ଚିଠି ଆସିବା ପରେ ଏଥିପାଇଁ ପ୍ରଶାସନିକ ପ୍ରସ୍ତୁତି ଆରମ୍ଭ ହୋଇଛି। ପାରମ୍ପରିକ ବେଶଭୂଷା ପରିଧାନ କରି ଖାଲି ପାଦରେ ବିମାନ ଯୋଗେ ୨୨ ତାରିଖରେ ଏହି ଦମ୍ପତି ଦିଲ୍ଲୀରେ ପହଞ୍ଚତ୍ବେ। ଫେବୃୟାରୀ ୨ରେ ସେମାନେ ଦିଲ୍ଲୀରୁ ଫେରିବେ ବୋଲି ଜଣାପଡ଼ିଛି। ଭୁଞ୍ଜିଆ ଦମ୍ପତିଙ୍କ ଦିଲ୍ଲୀ ଗସ୍ତ ପାଇଁ ଜିଲାପାଳଙ୍କ ଦ୍ବାରା ଗାଇଡ୍ ଅଫିସର ହିମାଂଶୁ କୁମାର ମହାପାତ୍ର ନିଯୁକ୍ତ ହୋଇଛନ୍ତି। ସେ ସେମାନଙ୍କ ସହ ଦିଲ୍ଲୀ ଗସ୍ତ କରିବେ। ଗସ୍ତର ସମସ୍ତ ଖର୍ଚ୍ଚ ମଧ୍ୟ ପ୍ରଶାସନ ବହନ କରିବ। ଏହି ଦମ୍ପତି ସେଠାରେ ସାଧାରଣତନ୍ତ୍ର ଦିବସରେ ସାମିଲ ହେବା ସହ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କୁ ସାକ୍ଷାତ କରିବାର କାର୍ଯ୍ୟକ୍ରମ ରହିଛି।
ସୂଚନାଯୋଗ୍ୟ, ମାଓବାଦୀ ପ୍ରବଣ ସୁନାବେଡା ଅଭୟାରଣ୍ୟର ପରିବ୍ୟାପ୍ତ ଅଞ୍ଚଳ ମଧ୍ୟରେ ପ୍ରାୟ ଛୋଟ ବଡ ୫୪ଟି ଗ୍ରାମ ରହିଛି। ଏସବୁ ଗ୍ରାମରେ ଆଦିମ ଜନଜାତି କୋଚଟିଆ ଭୁଞ୍ଜିଆ ସମ୍ପ୍ରଦାୟର ଲୋକେ ବସବାସ କରନ୍ତି। ଏମାନଙ୍କ ଖାଦ୍ୟ, ପାନୀୟ ଓ ଭିନ୍ନ ସରଳ ଜୀବନଶୈଳୀ ଏମାନଙ୍କୁ ରାଜ୍ୟର ପ୍ରମୁଖ ଆଦିମ ଜନଜାତି ମଧ୍ୟରୁ ଅନ୍ୟତମ ଭାବେ ମଧ୍ୟ ପରିଚୟ ଦେଇଛି। ସହରୀ ଜୀବନ ଓ ଆଧୁନିକତାଠାରୁ ବେଶ ଦୂରରେ ଥିବା ଏହି ସମ୍ପ୍ରଦାୟର ଜୀବନ ଜୀବିକାର ଦୁଃଖ ସହ ସୁନାବେଡା ଅଞ୍ଚଳର ବିକାଶ ଦିଗରେ ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କୁ ଭୁଜବଳ ଓ କୁଞ୍ଜିବାଈ ଅବଗତ କରାଇବେ ବୋଲି ସ୍ଥାନୀୟ ଲୋକେ ଆଶା ବାନ୍ଧିଛନ୍ତି। ଏହି ଭୁଞ୍ଜିଆ ଦମ୍ପତି ସେମାନଙ୍କ ପାରମ୍ପରିକ ଖାଦ୍ୟ ମାଣ୍ଡିଆ ପିଠା, ଝାରି ଗୁର୍ଜି, ବାଜରା ଜାତୀୟ ଶସ୍ୟରେ ପ୍ରସ୍ତୁତ ବିଭିନ୍ନ ସ୍ବାଦିଷ୍ଟ ବ୍ୟଞ୍ଜନ ରାଷ୍ଟ୍ରପତି, ପ୍ରଧାନମନ୍ତ୍ରୀଙ୍କୁ ପରଷି ପାରନ୍ତି।
