ଭଞ୍ଜନଗର,୨୮। ୪(ବାବୁଲା ପ୍ରଧାନ)-ଗଞ୍ଜାମ ଜିଲା ଭଞ୍ଜନଗର ଠାକୁରାଣୀ ଯାତ୍ରା ମଙ୍ଗଳବାର ହେଉଛି ତୃତୀୟ ଦିବସ। ଗତ ରବିବାର ବ୍ୟାଘ୍ରଦେବି ଏବଂ ଠାକୁରାଣୀଙ୍କୁ ନିମନ୍ତ୍ରଣ କରି ଅସ୍ଥାୟୀ ମଣ୍ଡପକୁ ଅଣାଯାଇଥିଲା। ସୋମବାର ଦେବୀ ଵିଶ୍ରାମ ନେଇଥିଲେ। ଆଜି ରାତି ୮ ଟା ରେ ଦେବୀ ଅସ୍ଥାୟୀ ମଣ୍ଡପରୁ ପୂର୍ବ ମୁଖା ହୋଇ ବାହାରିବା ପରେ ଥାନା ଛକ ପର୍ଯ୍ୟନ୍ତ ଯାଇଥିଲେ। ସେଠାରୁ ଦକ୍ଷିଣ ମୁଖା ହୋଇ ମସଜିଦ ଛକ ପର୍ଯ୍ୟନ୍ତ ଯାଇଥିଲେ। ସେଠାରୁ ପଶ୍ଚିମ ମୁଖା ହୋଇ ଶିବାନନ୍ଦ ସାହି ହୋଇ ପୂର୍ବତନ ବାଚସ୍ପତି ସ୍ୱର୍ଗତ ସୋମନାଥ ରଥଙ୍କ ବାସଭବନ ଦେଇ ନାରାୟଣ ମନ୍ଦିର ସାହି ପର୍ଯ୍ୟନ୍ତ ଯାଇଥିଲେ। ସେଠାରେ ପ୍ରଦ୍ୟୁମ୍ନ କୁମାର ଭଞ୍ଜଦେଓଙ୍କ ବାସଭବନଠାରେ ବ୍ୟାଘ୍ରଦେବୀଙ୍କୁ ପୂଜାର୍ଚ୍ଚନା କରାଯାଇଥିଲା । ଏହାପରେ ଉଭୟ ଦେବୀ ଡେରା ସାହି ଅଭିମୁଖେ ଯାଇଥିଲେ। ସେଠାରେ ଦେଶୀ ବେହେରାଙ୍କ ବାସଭବନରେ ଠାକୁରାଣୀଙ୍କୁ ପୂଜାର୍ଚ୍ଚନା କରାଯାଇଥିଲା । ଏହାପରେ ଦେବୀ ପୁରୁଣା ବଜାର ସାହି ହୋଇ ବିଳମ୍ବିତ ରାତ୍ରିରେ ଅସ୍ଥାୟୀ ମଣ୍ଡପରେ ବିଶ୍ରାମ ନେବାର କାର୍ଯ୍ୟକ୍ରମ ରହିଛି। ପାରମ୍ପରିକ ନୃତ୍ୟ ଏବଂ ବାଦ୍ୟ ଓ ଆତସବାଜି ଯାତ୍ରାକୁ ଆକର୍ଷଣୀୟ କରିଛି। ଦେବୀଙ୍କ ଆଜି ନଗର ଭ୍ରମଣର ପ୍ରଥମ ଦିବସ ଥିବା ଯୋଗୁ ଲୋକଙ୍କ କିଛିଟା ଭିଡ ଥିଲା। ଯାତ୍ରାକୁ ଶାନ୍ତି ଶୃଙ୍ଖଳାର ସହ ପରିଚାଳନା କରିବା ପାଇଁ ଯାତ୍ରା କମିଟି ଏବଂ ପୋଲିସ ପ୍ରଶାସନ ସବୁ ପ୍ରକାର ପଦକ୍ଷେପ ନେଇଛି। ଅପରପକ୍ଷେ ସର୍କସ, ରାମ ଦୋଳି, ଅପେରା ସମେତ ଅନ୍ୟାନ୍ୟ ସାଂସ୍କୃତିକ କାର୍ଯ୍ୟକ୍ରମ ଗୁଡିକ ମଧ୍ୟ କିଛିଦିନ ମଧ୍ୟରେ ଆରମ୍ଭ ହୋଇଯିବ। ପ୍ରଶାସନିକ ଅନୁମୋଦନ ମିଳିବା ପରେ ତାହା ଆରମ୍ଭ ହେବ।
ବୁଧବାର ଦେବୀ ଅସ୍ଥାୟୀ ମଣ୍ଡପ ରୁ ପୂର୍ବ ମୁଖା ହୋଇ ବାହାରିବା ପରେ ଟାଉନ୍ ହଲ୍ ପର୍ଯ୍ୟନ୍ତ ଯିବେ। ସେଠାରୁ ପଶ୍ଚିମ ମୁଖା ହୋଇ ମ୍ୟୁନିସିପାଲଟି ଛକ ପର୍ଯ୍ୟନ୍ତ ଆସିବେ। ସେଠାରୁ ରେଡକ୍ରସ ରୋଡ ହୋଇ ମରାଠୀ ସାହି ଛକ ପର୍ଯ୍ୟନ୍ତ ଯିବେ। ସେଠାରୁ ଜଗନ୍ନାଥ ରିସର୍ଟ ଯାଇ ସେଠୀ ଦେବୀ ପୂଜା ପାଇବେ। ଏହାପରେ ପାତ୍ର କଲୋନୀ ହୋଇ ୟୁବି ହାଇସ୍କୁଲ ଛକ ପର୍ଯ୍ୟନ୍ତ ଯିବେ। ସେଠାରୁ ଅନ୍ୟାନ୍ୟ ଅଞ୍ଚଳ ଦେଇ ଦେବୀ ମୁଖ୍ୟ ସଡ଼କକୁ ବାହାରି ଅସ୍ଥାୟୀ ମଣ୍ଡପରେ ବିଶ୍ରାମ ନେବାର କାର୍ଯ୍ୟକ୍ରମ ରହିଛି। ଚଳିତ ବର୍ଷ ଯାତ୍ରାରେ ବହୁ ପୁର୍ବରୁ ଯାନବାହନ ଚଳାଚଳକୁ ସମ୍ପୂର୍ଣ୍ଣ ବନ୍ଦ କରିଦିଆଯାଇଛି। ଏହାଦ୍ବାରା ଲୋକେ ବହୁ ଦୂରରେ ଯାନବାହାନ ରଖି ଦେବୀଙ୍କ ଦର୍ଶନ କରିବାକୁ ଉଚିତ୍ ଭାବୁ ନାହାନ୍ତି। ମୁଖ୍ୟ ସଡକ ପାଇଁ ଟ୍ରାଫିକ ବ୍ୟବସ୍ଥା କଡାକଡି ହେବାଦ୍ୱାରା ଦେବୀଙ୍କ ନଗର ଭ୍ରମଣ ଆରମ୍ଭରୁ ଶାନ୍ତି ଶୃଙ୍ଖଳାର ସହ ଚାଲିଛି।
