ନୂଆଦିଲ୍ଲୀ,୨୧ା୮: ପଟାୟାଠାରେ ଅନୁଷ୍ଠିତ ଥାଇଲାଣ୍ଡ ପାରା ବ୍ୟାଡ୍ମିଣ୍ଟନ ଇଣ୍ଟରନ୍ୟାଶନାଲ ଟୁର୍ନାମେଣ୍ଟରେ ଭାରତୀୟ ପାରା ବ୍ୟାଡ୍ମିଣ୍ଟନ ଖେଳାଳି ଓଡ଼ିଶାର ପ୍ରମୋଦ ଭଗତ ଗୋଟିଏ ଲେଖାଏଁ ସ୍ବର୍ଣ୍ଣ, ରୌପ୍ୟ ଓ ବ୍ରୋଞ୍ଜ ପଦକ ଜିତିଛନ୍ତି। ସେ ଓ ତାଙ୍କ ପାର୍ଟନର ସୁକାନ୍ତ କଦମ ପୁରୁଷ ଡବଲ୍ସ ସ୍ବର୍ଣ୍ଣ ପଦକ ହାସଲ କରିଛନ୍ତି। ଶନିବାର ଅନୁଷ୍ଠିତ ଏସଏଲ୍୩-ଏସ୍ଏଲ୍୪ କାଟାଗୋରି ଫାଇନାଲରେ ସେମାନେ ଇଣ୍ଡୋନେସିଆର ଡ୍ବିୟୋକୋ ଡ୍ବିୟୋକୋ ଓ ଫ୍ରିଦି ସେଟିଆଓ୍ବାନଙ୍କୁ ୨୧-୧୮, ୨୧-୧୩ ଗେମ୍ରେ ହରାଇ ଦେଇଛନ୍ତି। ପୂର୍ବରୁ ପୁରୁଷ ସିଙ୍ଗଲ୍ସରେ ଭଗତ ଓ କଦମ ସେମାନଙ୍କ ଫାଇନାଲ ମ୍ୟାଚ ହାରି ରୌପ୍ୟ ପଦକ ପାଇଛନ୍ତି। ପ୍ରମୋଦ ଇଂଲଣ୍ଡର ଡାନିଲ ବେଥଲଙ୍କଠାରୁ ୧୩-୨୧, ୧୯-୨୧ରେ ଏବଂ କଦମ ୨-୨୧, ୧୭-୨୧ରେ ଫ୍ରାନ୍ସର ଲୁକାସ ମାଜୁରଙ୍କଠାରୁ ହାରିଯାଇଛନ୍ତି। ମିକ୍ସଡ ଡବଲ୍ସରେ ଭଗତ ଓ ମନିଷା ରାମଦାସ ଯୋଡ଼ି ସେମିଫାଇନାଲ ରେ ଫ୍ରାନ୍ସ ଯୋଡ଼ି ଲୁକାସ ମାଜୁର୍ ଓ ଫଷ୍ଟିନ୍ ନୋଏଲ୍ଙ୍କ ଠାରୁ ୧୩-୨୧,୦୯-୨୧ ରେ ପରାଜୟ ହୋଇ ବ୍ରୋଞ୍ଜ ପଦକ ପାଇଛନ୍ତି। ଅନ୍ୟତମ ଓଡ଼ିଆ ଅନ୍ତର୍ଜାତୀୟ ଖେଳାଳି ଦୀପ ରଞ୍ଜନ ବିଶୋଇ ଡବଲ୍ସ ସେମିଫାଇନାଲରେ ରେ ନିଜ ଦେଶର ପ୍ରମୋଦ ଭଗତ ଓ ସୁକାନ୍ତ କଦମ ନିକଟରୁ ୧୦-୨୧,୨୧-୧୪,୧୪-୨୧ ରେ ପରାଜିତ ହୋଇ ବ୍ରୋଞ୍ଜ ହାସଲ କରିଛନ୍ତି।
