ବେଙ୍ଗାଲୁରୁ,୨୬।୧୧: ଯୌନ ନିର୍ଯାତନା ଦେଉଥିବା ବାପାଙ୍କୁ ବୟଫ୍ରେଣ୍ଡ ଓ ତାଙ୍କର ୩ ସାଙ୍ଗଙ୍କ ସହାୟତାରେ ହତ୍ୟା କରିଛି ଝିଅ। ଏଭଳି ଘଟଣା ବେଙ୍ଗାଲୁରୁରେ ଘଟିଛି। ମୃତକ ଜଣଙ୍କ ଏକ ଶିକ୍ଷାନୁଷ୍ଠାନର ସିକ୍ୟୁରିଟି ମ୍ୟାନେଜର ଥିଲେ। ପୋଲିସ କହିବା ଅନୁଯାୟୀ, ହତ୍ୟାକାରୀ ଯୁବତୀ ଜଣେ କଲେଜ ଛାତ୍ରୀ। ତାଙ୍କ ସାନ ଭଉଣୀ ସ୍କୁଲରେ ପଢ଼ନ୍ତି।
ରବିବାର ରାତିରେ ମା’ ଘରୁ ଚାଲିଯିବା ପରେ ବାପାଙ୍କୁ ହତ୍ୟା କରିବାକୁ ଯୋଜନା କରିଥିଲା ଝିଅ। ଯୋଜନାବଦ୍ଧ ଭାବେ ରାତି ୧୨ଟା ୩୦ରେ ବୟଫ୍ରେଣ୍ଡଙ୍କ ସମେତ ୪ ଯୁବକଙ୍କ ସହାୟତାରେ ହତ୍ୟା କରିଥିଲେ। ପ୍ରାୟ ୧ଟା ୩୦ରେ ବାପାଙ୍କୁ କିଛି ଯୁବକ ଆକ୍ରମଣ କରୁଥିବା ଚିତ୍କାର କରି ପଡ଼ୋଶୀଙ୍କୁ ଡାକ ପକାଇଥିଲେ।
ପରେ ସୂଚନା ପାଇ ପୋଲିସ ରକ୍ତ ଜୁଡ଼ୁବୁଡ଼ୁ ଅବସ୍ତାରେ ମୃତଦେହ ଉଦ୍ଧାର କରିଥିଲା। ”ତାଙ୍କୁ ଅନେକ ଥର ଛୁରା ମାରି ହତ୍ୟା କରାଯାଇଥିଲା। ମୃତକଙ୍କ ଝିଅ ବାରମ୍ବାର ବୟାନ ବଦଳାଇବାରୁ ଆମର ସନ୍ଦେହ ସୃଷ୍ଟି ହୋଇଥିଲା। ପଚରାଉଚରାରୁ ଜଣାପଡ଼ିଥିଲା ତାଙ୍କ ପାଇଁ ତାଙ୍କ ବନ୍ଧୁମାନେ ହତ୍ୟା କରିଛନ୍ତି ବୋଲି ପୋଲିସ ଅଧିକାରୀ କହିଥିଲେ।
ସୂଚନା ମୁତାବକ, ବାପା ଯୌନ ନିର୍ଯାତନା ଦେଉଥିବା ସମ୍ପର୍କରେ ବୟଫ୍ରେଣ୍ଡଙ୍କୁ ଜଣାଇଥିଲେ ଯୁବତୀ। ଏଥିଯୋଗୁ ତାଙ୍କ ବୟଫ୍ରେଣ୍ଡ ୩ ଜଣଙ୍କ ସହ ମିଶି ହତ୍ୟାକାଣ୍ଡ ଭିୟାଇଥିଲେ। ସମସ୍ତେ ଯୁବତୀଙ୍କ କ୍ଲାସମେଟ ଓ ନାବାଳକ।
