ମହାକାଳପଡ଼ା, ୩୦ା୩(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲାର ମହାକାଳପଡ଼ା ବ୍ଲକର ୩୧ ପଞ୍ଚାୟତ ଓ ମାର୍ଶାଘାଇ ବ୍ଲକର ୧୭ ପଞ୍ଚାୟତକୁ ନେଇ ୨୦୦୯ରେ ମହାକାଳପଡ଼ା ବିଧାନସଭା ନିର୍ବାଚନମଣ୍ଡଳୀ ଗଠିତ ହୋଇଥିଲା। ଏଠାରେ ୨ଲକ୍ଷରୁ ଅଧିକ ଭୋଟର ଅଛନ୍ତି। ଏହି ନିର୍ବାଚନମଣ୍ଡଳୀରେ ସବୁବର୍ଗର ଭୋଟର ରହିଛନ୍ତି। ବିଶେଷକରି ଆଦିବାସୀ, ବଙ୍ଗୀୟ, ସଂଖ୍ୟାଲଘୁ ଯଥା ମୁସଲିମ ଓ ଖ୍ରୀଷ୍ଟିଆନ ଭୋଟର ରହିଛନ୍ତି। ଏଠାରେ ୧୦ରୁ ଅଧିକ ପଞ୍ଚାୟତରେ ୬୦ ହଜାରରୁ ଅଧିକ ବଙ୍ଗୀୟ ଭୋଟର ଅଛନ୍ତି। ଏହି ବଙ୍ଗୀୟ ଭୋଟରମାନେ ନିର୍ବାଚନରେ ନିର୍ଣ୍ଣାୟକ ଭୂମିକା ଗ୍ରହଣ କରିଥାନ୍ତି। ସେହିପରି ୨୦୦୯ରେ ନିର୍ବାଚନମଣ୍ଡଳୀ ଗଠନ ହେବା ପରେ ବିଧାୟକ ଅତନୁ ସବ୍ୟସାଚୀ ନାୟକ ଅଦ୍ୟାବଧି ଲଗାତର ବିଜୟ ଲାଭ କରିଆସୁଛନ୍ତି। ଚଳିତ ନିର୍ବାଚନରେ ବିଜେଡି ପକ୍ଷରୁ ପୁଣି ଅତନୁ ପ୍ରାର୍ଥୀ ହୋଇଛନ୍ତି। ହେଲେ କଂଗ୍ରେସ ଓ ଭାଜପା ପ୍ରାର୍ଥୀ ଘୋଷଣାରେ ପଛରେ ପଡିଛନ୍ତି।
କଂଗ୍ରେସ ଏକଲା ଚାଲୋ ନୀତିରେ ଜିଲା କଂଗ୍ରେସ ସଭାପତି ଲୋକନାଥ ମହାରଥୀ ଚର୍ଚ୍ଚାକୁ ଆସିଛନ୍ତି। ଫଳରେ କଂଗ୍ରେସ ଦଳର କର୍ମୀମାନେ ଉତ୍ସାହିତ ହୋଇଛନ୍ତି। ଏହି ଅଞ୍ଚଳରେ ତାଙ୍କ ନିଜ ଘର ହୋଇଥିବାରୁ ତାଙ୍କ ପ୍ରାର୍ଥୀ ହେବା ଯଥେଷ୍ଟ ସମ୍ଭାବନା ରହିଛି ବୋଲି ଦଳୀୟ କର୍ମୀମାନଙ୍କ ପକ୍ଷରୁ କୁହାଯାଇଛି। ସେହିପରି ଏହି ବିଧାନସଭା ନିର୍ବାଚନମଣ୍ଡଳୀରୁ ଭାଜପାର ୮ରୁ ଅଧିକ ଆଶାୟୀ ପ୍ରାର୍ଥୀ ନେଇ ଚର୍ଚ୍ଚା ଜୋର ଧରିଛି। କାହାକୁ ଦଳୀୟ ଟିକେଟ ମିଳିବ ସେଥିପାଇଁ ଏବେ ଦଳରେ ଆଶାୟୀ ପ୍ରାର୍ଥୀଙ୍କ ମଧ୍ୟରେ ଅଙ୍କକଷାକୁ ନେଇ ପଲ୍ଲୀରୁ ଦିଲ୍ଲୀ ପର୍ଯ୍ୟନ୍ତ ଚର୍ଚ୍ଚା ଓ ଆଲୋଚନା ଜୋର ଧରିଛି। ଏହି କ୍ଷେତ୍ରରୁ ଭାଜପା ମୁଖପାତ୍ର ଇଂ. ଜ୍ଞାନଦେବ ବେଉରା, ଜିଲା ଉପସଭାପତି ଯୁବନେତା ସଞ୍ଜୟ ରଥ, ଜିଲା ସଭାପତି କିଶୋର ପଣ୍ଡା, ଶିକ୍ଷାବିତ ଭୁବନ ମୋହନ ଜେନା, ରାଜ୍ୟ କାର୍ଯ୍ୟକାରିଣୀ ସଦସ୍ୟ ବିଷ୍ଣୁ ଦାସ, ସୌଭାଗ୍ୟ କୁମାର ପରିଡ଼ା, ଦୁର୍ଗାପ୍ରସନ୍ନ ନାୟକ, ନାରୀ ନେତ୍ରୀ ଜାନକୀ ପ୍ରଧାନ ଓ ନୂତନ ଭାବେ ଦଳରେ ମିଶିଥିବା ପୂର୍ବତନ କେନ୍ଦ୍ରାପଡ଼ା ସାଂସଦ ଅର୍ଚ୍ଚନା ନାୟକଙ୍କ ନାମ ଆଲୋଚନା ଜୋର ଧରିଛି। ଦେଖିବାକୁ ରହିଲା ଭାଜପାର କେନ୍ଦ୍ରୀୟ କମିଟି କାହାକୁ ଟିକେଟ ଦେଉଛନ୍ତି। ବିଜେଡିର ବିଧାୟକ ଅତନୁ ସବ୍ୟସାଚୀ ନାୟକଙ୍କ ସହ ଭାଜପା ପ୍ରାର୍ଥୀ ମଧ୍ୟରେ ଲଢ଼େଇ ଜୋର୍ଦାର ହେବ ବୋଲି ଅଧିକ ଚର୍ଚ୍ଚା ହେଉଛି। କାରଣ ଏହି ନିର୍ବାଚନମଣ୍ଡଳୀରେ ବିଜେଡିର ସାଙ୍ଗଠନିକ ସ୍ଥିତି ବେଶ୍ ଭଲ ରହିଛି। ଅପରପକ୍ଷରେ ବିଜେଡି ପକ୍ଷରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିକାଶର ଧାରା ଅବ୍ୟାହତ ରହିଛି। ବିଜେଡି ବିକାଶ କ୍ଷେତ୍ରରେ ଯଥେଷ୍ଟ ଆଗରେ ରହିଛି ବୋଲି କହିଛନ୍ତି ଦଳୀୟ ସଙ୍ଗଠନର କର୍ମକର୍ତ୍ତା। ସେହିପରି ଭାଜପା ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିକାଶର ଗ୍ୟାରେଣ୍ଟି କହି ନିର୍ବାଚନ ବୈତରଣୀ ପାରହେବାକୁ ଭାଜପା ନେତୃମଣ୍ଡଳୀ ପ୍ରୟାସ ଆରମ୍ଭ କରିଛନ୍ତି। ଅପରପକ୍ଷରେ ହାଟ ବଜାର ଚା’ ଖଟିରେ ଏହି ନିର୍ବାଚନ ଏକ ନୂଆ ସମୀକରଣ ଓ ଉଭୟ ଦଳ ମଧ୍ୟରେ ବଡ଼ ଟକ୍କର ହେବ ବୋଲି ଆଲୋଚନା ଜୋର ଧରିଛି।
