ନାଉଗାଁ,୬ା୪(ସ୍ବ.ପ୍ର.): ରାଶନ କାର୍ଡ ହିତାଧିକାରୀଙ୍କୁ ଖାଦ୍ୟ ସାମଗ୍ରୀ ଯୋଗାଇ ଦେବାକୁ ଖାଦ୍ୟ ସୁରକ୍ଷା ଯୋଜନା ଆରମ୍ଭ ଢ଼େହାଇଛି। ଏହି ଯୋଜନା ମାଧ୍ୟମରେ ପ୍ରତି ମାସରେ ହିତାଧିକାରୀଙ୍କୁ ୫ କିଲୋ ଖାଦ୍ୟ ସାମଗ୍ରୀ ପ୍ରଦାନ କରାଯାଉଛି। କିନ୍ତୁ ନାଉଗାଁ ବ୍ଲକର ହିତାଧିକାରୀ ଏହି ଯୋଜନାରେ ଠିକ୍ ସମୟରେ ଖାଦ୍ୟ ସାମଗ୍ରୀ ପାଇ ପାରୁନାହାନ୍ତି। ଏ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ବ୍ଲକ ଯୋଗାଣ ଅଧିକାରୀଙ୍କ କାର୍ଯ୍ୟାଳୟରୁ ମିଳିଥିବା ତଥ୍ୟ ଅନୁସାରେ, ବ୍ଲକରେ ସମୁଦାୟ ୧୬ ହଜାର ୭ଶହ ୮୨ଟି ରାଶନ କାର୍ଡ ରହିଛି। ସେଥିମଧ୍ୟରୁ ଅନ୍ତ୍ୟୋଦୟ ଯୋଜନାରେ ୨ ହଜାର ୧ ଶହ ୫୪ କାର୍ଡ ରହିଥିବା ବେଳେ ପିଏଚ୍ଏଚ୍ରେ ୧୪ ହଜାର ୬ଶହ ୨୮ କାର୍ଡ ରହିଛି। ଉକ୍ତ କାର୍ଡରେ ସମୁଦାୟ ୬୧ ହଜାର ୫ଶହ ୮୬ ଜଣ ହିତାଧିକାରୀ ସାମିଲ ହୋଇଛନ୍ତି। ଏ ସମସ୍ତ ହିତାଧିକାରୀଙ୍କ ପାଇଁ ୨୫ ହଜାର କୁଇଣ୍ଟାଲ ଚାଉଳ, ୯ଶହ ୪୯ କୁଇଣ୍ଟାଲ ଗହମ ପ୍ରଦାନ କରାଯାଉଛି। ମାତ୍ର ଦାୟିତ୍ୱରେ ଥିବା ଠିକାଦାର ଠିକ୍ ସମୟରେ ଡିଲରଙ୍କୁ ଏହା ପ୍ରଦାନ କରୁ ନ ଥିବାରୁ ହିତାଧିକାରୀ ଅସୁବିଧାରେ ପଡ଼ୁଛନ୍ତି। ସମ୍ପୃକ୍ତ ଠିକାଦାର ଆରଆରସି ତରଡ଼ାପଡା ଜଗତସିଂହପୁରରୁ ଖାଦ୍ୟ ସାମଗ୍ରୀ ଆଣି ପ୍ରତ୍ୟେକ ଡିଲର କେନ୍ଦ୍ରରେ ପହଞ୍ଚାଇବାର ନିୟମ ରହିଛି। କିନ୍ତୁ ବ୍ଲକରେ ଥିବା ୨୮ ଡିଲର ପଏଣ୍ଟରେ ଠିକ୍ ସମୟରେ ଖାଦ୍ୟ ସାମଗ୍ରୀ ପହଞ୍ଚତ୍ ପାରୁନାହିଁ ବୋଲି କେତେଜଣ ଡିଲର ନାମ ଗୋପନ ରଖି ପ୍ରକାଶ କରିଛନ୍ତି। କେବଳ ସେତିକି ନୁହେଁ ପ୍ରଦାନ କରାଯାଉଥିବା ଚାଉଳ ଓ ଗହମର ଓଜନ ମଧ୍ୟ ଠିକ୍ ରହୁ ନ ଥିବା ସେମାନେ ଅଭିଯୋଗ କରିଛନ୍ତି। ସାରା ଦେଶରେ ଓ୍ବାନ ନେଶନ କାର୍ଡ ପ୍ରଚଳିତ ହେବା ପରଠାରୁ ଦାୟିତ୍ୱରେ ଥିବା ଠିକାଦାରଙ୍କୁ ୨ଟି ପର୍ଯ୍ୟାୟରେ ରାଶନ ସାମଗ୍ରୀ ଉଠାଇବାକୁ ନିର୍ଦ୍ଦେଶନାମା ଦିଆଯାଇଛି। ପ୍ରଥମ ପର୍ଯ୍ୟାୟରେ ଶତକଡା ୮୦ ଭାଗ ସାମଗ୍ରୀ ଓ ୨ୟ ପର୍ଯ୍ୟାୟରେ ଅବଶିଷ୍ଟ ୨୦ ଭାଗ ଉଠାଇ ଡିଲର କେନ୍ଦ୍ରରେ ପହଞ୍ଚାଇବ ପାଇଁ ନିୟମ ରହିଛି। କିନ୍ତୁ ନିଯୁକ୍ତ ଠିକାଦାରମାନେ ମନଇଚ୍ଛା ୪ ରୁ ୫ଟି ପର୍ଯ୍ୟାୟରେ ସାମଗ୍ରୀ ପ୍ରଦାନ କରୁଛନ୍ତି। ଫଳରେ ସାମଗ୍ରୀ ନେବା ପାଇଁ ଡିଲର କେନ୍ଦ୍ରରେ ହିତାଧିକାରୀ ଅପେକ୍ଷା କରୁଥିବାବେଳେ ଆବଶ୍ୟକ ସାମଗ୍ରୀ ରହୁ ନ ଥିବା ଜଣାଯାଇଛି। ଏ ସମ୍ପର୍କରେ ବ୍ଲକ ଯୋଗାଣ ଅଧିକାରୀ ଅମିୟ ରଞ୍ଜନ ପ୍ରଧାନ କୁହନ୍ତି, ଏବିଷୟରେ ଆମେ ଅବଗତ ହେବା ପରେ ବାରମ୍ବାର ଠିକାଦାରଙ୍କୁ ଠିକ୍ ସମୟରେ ସାମଗ୍ରୀ ପ୍ରଦାନ କରିବାକୁ ନିର୍ଦ୍ଦେଶ ଦେବା ସହ ଜିଲା ପ୍ରଶାସନକୁ ମଧ୍ୟ ଅବଗତ କରାଯାଇଛି।
