ନୂଆଦିଲ୍ଲୀ,୩୦।୧୧: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ୨୦୨୨ ସଂସ୍କରଣରୁ ବ୍ୟାନ ହୋଇପାରନ୍ତି ଷ୍ଟାର ଭାରତୀୟ ଖେଳାଳି ଲୋକେଶ ରାହୁଲ ଓ ଆଫଗାନିସ୍ତାନର ପ୍ରସିଦ୍ଧ ସ୍ପିନର ରଶିଦ ଖାନ। ଦୁଇ ଖେଳାଳିଙ୍କ ବିରୋଧରେ ପଞ୍ଜାବ କିଙ୍ଗ୍ସ (ପିବିକେଏସ୍) ଓ ସନରାଇଜର୍ସ ହାଇଦ୍ରାବାଦ୍ (ଏସ୍ଆର୍ଏଚ୍) ବିସିସିଆଇ ନିକଟରେ ଅଭିଯୋଗ କରିଛନ୍ତି।
ଇନସାଇଡ୍ସ୍ପୋର୍ଟରେ ପ୍ରକାଶ ପାଇଥିବା ରିପୋର୍ଟ ମୁତାବକ, ଦୁଇ ଖେଳାଳି ନିଜ ଫ୍ରାଞ୍ଚାଇଜ ଛାଡ଼ି ଆର୍ପିଏସ୍ଜି ଗ୍ରୁପ ସମର୍ଥିତ ଲକ୍ଷ୍ନୌ ଫ୍ରାଞ୍ଚାଇଜରେ ଯୋଗ ଦେବା ପାଇଁ ଆଲୋଚନା କରିଛନ୍ତି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ ଏହି ଅଭିଯୋଗ ଉପରେ ତଦନ୍ତ କରୁଛି।
ଅଭିଯୋଗ ସମ୍ପର୍କରେ ବିସିସିଆଇ ସୂତ୍ରରୁ କୁହାଯାଇଛି, ଆମକୁ ଏପର୍ଯ୍ୟନ୍ତ କୌଣସି ଲିଖିତ ଅଭିଯୋଗ ମିଳିନାହିଁ। କିନ୍ତୁ ଲକ୍ଷ୍ନୌ ଦଳ ଖେଳାଳିଙ୍କୁ ପୋଚିଂ କରୁଥିବା ଦୁଇ ଫ୍ରାଞ୍ଚାଇଜ ମୌଖିକ ଭାବେ ଅଭିଯୋଗ କରିଛନ୍ତି। ଏହାର ତଦନ୍ତ ଚାଲିଛି। ଯଦି ଅଭିଯୋଗରେ ସତ୍ୟତା ଥିବା ପ୍ରମାଣିତ ହୁଏ, ତେବେ ଆମେ କାର୍ଯ୍ୟାନୁଷ୍ଠାନ ଗ୍ରହଣ କରିବୁ। ଆମେ ପୁରୁଣା ଦଳର ସନ୍ତୁଳନ ନଷ୍ଟ କରିବାକୁ ଚାହୁଁନାହିଁ। ମାତ୍ର ତୀବ୍ର ପ୍ରତିଦ୍ୱନ୍ଦ୍ୱିତା ବେଳେ ଏଭଳି ସମସ୍ୟାକୁ ଏଡ଼ାଯାଇ ପାରିବ ନାହିଁ।
ଉକ୍ତ ରିପୋର୍ଟ ମୁତାବକ, ରାହୁଲ ଓ ରଶିଦଙ୍କୁ ଆର୍ପିଏସ୍ଜି ସମର୍ଥିତ ଲକ୍ଷ୍ନୌ ଫ୍ରାଞ୍ଚାଇଜରେ ସାମିଲ ହେବା ପାଇଁ ଯଥାକ୍ରମେ ୨୦ ଓ ୧୬ କୋଟି ଟଙ୍କାର ପ୍ରସ୍ତାବ ଦିଆଯାଇଛି। ସନରାଇଜର୍ସ ଆଫଗାନ ସ୍ପିନରଙ୍କୁ ଦଳରେ ରଖିବାକୁ ଚାହୁଁଚି। ହେଲେ ତାଙ୍କୁ ୧୨ କୋଟିରୁ ଅଧିକ ଟଙ୍କା ଦେବାକୁ ଚାହୁଁନାହିଁ। ବର୍ତ୍ତମାନ ରଶିଦଙ୍କୁ ପ୍ରତ୍ୟେକ ସିଜନ ପିଛା ୯ କୋଟି ମିଳୁଥିବା ବେଳେ ରାହୁଲଙ୍କୁ ୧୧ କୋଟି ଟଙ୍କା ମିଳୁଛି।
ତେବେ ୨୦୧୦ରେ ପ୍ରଥମ ଥର ପାଇଁ ଆଇପିଏଲରେ ଖେଳାଳିଙ୍କ ପୋଚିଂ ଘଟଣା ସାମ୍ନାକୁ ଆସିଥିଲା। ସେତେବେଳେ ବର୍ଷକ ଲାଗି ବାସନ୍ଦ ହୋଇଥିଲେ ସିଏସ୍କେ ଅଲରାଉଣ୍ଡର ରବୀନ୍ଦ୍ର ଜାଡେଜା। ରାଜସ୍ଥାନ ରୟାଲ୍ସ ଦଳ ସହ ତାଙ୍କ ଚୁକ୍ତି ଶେଷ ହୋଇ ନ ଥିବା ବେଳେ ସେ ଅନ୍ୟ ଫ୍ରାଞ୍ଚାଇଜ ସହ ଆଲୋଚନା କରିଥିଲେ।
