ନୂଆଦିଲ୍ଲୀ,୨୨।୧: କ୍ରିକେଟ ଇତିହାସର ଅନେକ ଅଭିଜ୍ଞ ଖେଳାଳିଙ୍କ ମଧ୍ୟରୁ ବେରୀ ରିଚାର୍ଡସ୍ ଅନ୍ୟତମ। ୧୯୭୦ ମସିହା ଆଜିର ଦିନରେ ଦକ୍ଷିଣ ଆଫ୍ରିକା ପାଇଁ ବେରି ଅନ୍ତରାଷ୍ଟ୍ରୀୟ କ୍ରିକେଟ କ୍ୟାରିୟର ଆରମ୍ଭ କରିଥିଲେ। ପଦାର୍ପଣ ପରେ ନିଜର ଦମ୍ଦାର ବ୍ୟାଟିଂକୁ ନେଇ ସେ ସମସ୍ତଙ୍କ ହୃଦୟ ଜିଣିଥିଲେ। ହେଲେ ଦୁର୍ଭାଗ୍ୟବଶତଃ ବେରିଙ୍କ କ୍ୟାରିୟର ମାତ୍ର ୭ ସପ୍ତାହ ପାଇଁ ଥିଲା।
ବେରି ପ୍ରଥମ ମ୍ୟାଚ୍ର ପ୍ରଥମ ପାଳିରେ ୨୯ ଏବଂ ଦ୍ୱିତୀୟ ପାଳିରେ ୩୨ ରନ୍ କରିଥିଲେ। ଏହାପରେ ସେ ଆଗାମୀ ୩ ଟେଷ୍ଟ ମ୍ୟାଚ୍ରେ ୧୪୦,୬୫,୩୫,୮୧ ଏବଂ ୧୨୧ ରନ୍ କରିଥିଲେ। ଫର୍ମରେ ଥିବା ଯୋଗୁ ସେ ଧୂଆଁଧାର ବ୍ୟାଟିଂ କରୁଥିଲେ। ହେଲେ ୪ ଟେଷ୍ଟ ମ୍ୟାଚ୍ ଖେଳାଯିବା ପରେ ଦକ୍ଷିଣ ଆଫ୍ରିକା କ୍ରିକେଟ୍ ଟିମ୍କୁ ବର୍ଣ୍ଣବୈଷମ୍ୟ ବିବାଦ ଯୋଗୁ ବ୍ୟାନ କରିଦିଆଯାଇଥିଲା। ଫଳରେ ବେରି ଅନ୍ତରାଷ୍ଟ୍ରୀୟ କ୍ରିକେଟ ଖେଳିପାରି ନ ଥିଲେ। ସେ ନିଜର ପ୍ରଥମ ମ୍ୟାଚ୍ ୧୯୭୦ ଜାନୁଆରୀ ୨୨ରୁ ୨୭ ମଧ୍ୟରେ ଖେଳିଥିବା ବେଳେ ଶେଷ ମ୍ୟାଚ୍ ୫ରୁ ୧୦ ମାର୍ଚ୍ଚ ମଧ୍ୟରେ ଖେଳିଥିଲେ। ଏଭଳି ଦେଖିଲେ ମାତ୍ର ୭ ସପ୍ତାହ ପର୍ଯ୍ୟନ୍ତ ସେ ନିଜକୁ ପ୍ରମାଣ କରିପାରିଥିଲେ।
ମାତ୍ର ୪ ମ୍ୟାଚ୍ ପର୍ଯ୍ୟନ୍ତ ସୀମିତ ଥିଲେ ହେଁ ୧୯୬୪ରୁ ୧୯୮୩ ମଧ୍ୟରେ ବେରି ପ୍ରଥମ ଶ୍ରେଣୀ କ୍ରିକେଟରେ ଚମକି ଥିଲେ। ସେ ମୋଟ ୩୩୯ ମ୍ୟାଚ୍ ଖେଳିଥିବା ବେଳେ ୨୮,୩୫୮ ରନ୍ କରିଥିଲେ। ୫୪.୭୪% ହାରରେ ସେ ଏହା କରିଦେଖାଇଥିଲେ। ନିଜର ପ୍ରଥମ ଶ୍ରେଣୀ କ୍ୟାରିୟରରେ ସେ ୮୦ ଶତକ ଏବଂ ୧୫୨ ଅର୍ଦ୍ଧଶତକ କରିଥିଲେ। ଏହାଛଡ଼ା ବୋଲିଂ କରି ୭୭ ଉଇକେଟ ମଧ୍ୟ ନେଇଥିଲେ।
