ବରଗଡ଼,୭।୮(ପ୍ରେମାନନ୍ଦ ଖମାରୀ): ବରଗଡ଼ ଜିଲା କଂଗ୍ରେସର ଏକ ଗୁରୁତ୍ୱପୂର୍ଣ୍ଣ କାର୍ଯ୍ୟକାରିଣୀ ବୈଠକ ଶୁକ୍ରବାର ଅନୁଷ୍ଠିତ ହୋଇଯାଇଛି। ଉକ୍ତ ବୈଠକରେ ପ୍ରଦେଶ ଏବଂ ଜାତୀୟ ସ୍ତରର ପ୍ରମୁଖ ଦଳୀୟ ନେତୃବୃନ୍ଦ ଯୋଗଦେଇ ସ୍ଥାନୀୟ କାର୍ଯ୍ୟକର୍ତ୍ତାମାନଙ୍କୁ ସଂଗଠନକୁ ମଜଭୁତ କରିବା ପାଇଁ ବିଭିନ୍ନ ଗୁରୁତ୍ୱପୂର୍ଣ୍ଣ ପରାମର୍ଶ ଦେଇଛନ୍ତି।
ଅଖିଳ ଭାରତୀୟ କଂଗ୍ରେସ କମିଟିର ସାଧାରଣ ସମ୍ପାଦକ ତଥା ଓଡ଼ିଶା ପ୍ରଦେଶ କଂଗ୍ରେସ ପ୍ରଭାରୀ ଲାଲଜୀ ଦେଶାଇ ବୈଠକରେ ମୁଖ୍ୟ ଅତିଥି ଭାବେ ଯୋଗଦେଇ କଡ଼ା ଚେତାବନୀ ଦେଇ କହିଥିଲେ ଯେ, ପାରମ୍ପରିକ ଢାଞ୍ଚାରେ ଆଉ ଦଳ ଚାଲିବ ନାହିଁ। ବିଭିନ୍ନ ପଦପଦବୀରେ ରହିଥିବା ବ୍ୟକ୍ତିମାନେ କଠିନ ପରିଶ୍ରମ କରିବା ଏକାନ୍ତ ଜରୁରୀ। ଯେଉଁମାନେ ଦାୟିତ୍ୱ ନେଉଛନ୍ତି, ସେମାନଙ୍କୁ ନିଜ କାର୍ଯ୍ୟ ସମ୍ପାଦନ କରିବାକୁ ପଡ଼ିବ, ନଚେତ୍ ପଦ ଛାଡ଼ି ଅନ୍ୟମାନଙ୍କ ପାଇଁ ବାଟ ଛାଡ଼ିବାକୁ ପଡ଼ିବ ବୋଲି ସେ ସ୍ପଷ୍ଟ ଭାବେ ମତବ୍ୟକ୍ତ କରିଥିଲେ।
ସେହିପରି ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ଭକ୍ତ ଚରଣ ଦାସ କହିଥିଲେ ଯେ, ଏକଦା ବରଗଡ଼ ଜିଲାକୁ କଂଗ୍ରେସର ଏକ ଦୃଢ଼ଗଡ଼ ବୋଲି କୁହାଯାଉଥିଲା, କିନ୍ତୁ ୨୦୧୦ ମସିହାରୁ ଏହାର କ୍ରମଗତ ଅବକ୍ଷୟ ଘଟି ଚାଲିଛି। ଦଳକୁ ପୁଣିଥରେ ଏହାର ପୂର୍ବ ସ୍ଥାନକୁ ଫେରାଇ ଆଣିବା ପାଇଁ ଏହାହିଁ ସଠିକ୍ ସମୟ ବୋଲି ସେ କହିଥିଲେ। ଜନସାଧାରଣଙ୍କ ଆଶା ଓ ଆକାଂକ୍ଷା ପୂରଣ କରିବା ନିମନ୍ତେ ସମସ୍ତେ ଏକଜୁଟ ହୋଇ କାର୍ଯ୍ୟ କରିବାକୁ ସେ ଦଳୀୟ କର୍ମକର୍ତ୍ତାଙ୍କୁ ଆହ୍ୱାନ କରିଥିଲେ। ବର୍ତ୍ତମାନ ଜିଲାରେ ଚାଷୀ ସମସ୍ୟା, ପାନୀୟ ଜଳ, ବିଦ୍ୟୁତ ସମସ୍ୟା ଏବଂ ବ୍ୟାପକ ଦୁର୍ନୀତି ଭଳି ଅନେକ ଜ୍ୱଳନ୍ତ ସମସ୍ୟା ରହିଛି ଏବଂ ଦଳ ଏସବୁ ପ୍ରସଙ୍ଗକୁ ନେଇ ରାଜରାସ୍ତାରେ ଆନ୍ଦୋଳନକୁ ଓହ୍ଲାଇବ ବୋଲି ସେ ଚେତାବନୀ ଦେଇଥିଲେ।
ଜିଲା କଂଗ୍ରେସ କମିଟି ସଭାପତି ହରଦିପ ସିଂହଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ରାଜ୍ୟ କଂଗ୍ରେସ ସହ-ପ୍ରଭାରୀ ତଥା ଏଆଇସିସି ସମ୍ପାଦକ ଜଟ୍ଟି କୁସୁମ କୁମାର ମଧ୍ୟ ଯୋଗଦେଇ ମିଳିତ ଭାବେ ସଂଗଠନକୁ ଆଗକୁ ବଢ଼ାଇବାକୁ ପରାମର୍ଶ ଦେଇଥିଲେ।
ଏହି କାର୍ଯ୍ୟକ୍ରମରେ ଓଡ଼ିଶା ପ୍ରଦେଶ କଂଗ୍ରେସ କମିଟି ଉପ-ସଭାପତି (ସଂଗଠନ) ସନ୍ତୋଷ ସିଂ ସାଲୁଜା, ଗଣମାଧ୍ୟମ ବିଭାଗ ଅଧ୍ୟକ୍ଷ ଅରବିନ୍ଦ ଦାସ, ପିସିସି ସମ୍ପାଦକ ଦିଲୀପ ଦୂରିଆ, ବିଜୟାନନ୍ଦ ଚାଉଳିଆ, ପୂର୍ବତନ ବିଧାୟକ ସାଧୁ ଚରଣ ନେପାକ, କିଶୋର ଦଫାଦାର, ବ୍ରହ୍ମା ମହାକୁଡ଼, ଟଙ୍କଧର ସାହୁ, ଅଭିଷେକ ସେଠ୍, ଅନନ୍ତ ଶୟନ ପାଢ଼ୀ ଏବଂ ଅମିତ୍ ଆଚାର୍ଯ୍ୟ ପ୍ରମୁଖ ମଞ୍ଚାସୀନ ଥିଲେ। ଜିଲାର ସମସ୍ତ ବ୍ଲକ ଓ ନଗର କଂଗ୍ରେସ ସଭାପତିଙ୍କ ସମେତ ବହୁ ସଂଖ୍ୟାରେ କର୍ମକର୍ତ୍ତା ଓ କର୍ମୀ ଏଥିରେ ଯୋଗଦେଇଥିବାବେଳେ କଂଗ୍ରେସ ନେତା ନିପନ ଦାଶ ଧନ୍ୟବାଦ ଅର୍ପଣ କରିଥିଲେ।
