ଭୁବନେଶ୍ୱର,୭।୪(ବ୍ୟୁରୋ): ବରମୁଣ୍ଡା ଆନ୍ତଃରାଜ୍ୟ ବସ୍ ଟର୍ମିନାଲ (ଆଇଏସ୍ବିଟି)ର ନିର୍ମାଣ କାର୍ଯ୍ୟ ଏବେ ଶେଷ ପର୍ଯ୍ୟାୟରେ ପହଞ୍ଚତ୍ଛି। ଇତିମଧ୍ୟରେ ମୁଖ୍ୟ ବିଲ୍ଡିଂ ନିର୍ମାଣ କାମ ଶେଷ ହୋଇଥିବାବେଳେ ଏହାର ଇଣ୍ଟେରିଅର କାମ ଚାଲୁ ରହିଛି। ବସ୍ଷ୍ଟାଣ୍ଡର ପାରିପାଶର୍ବିକ ବିକାଶ କାର୍ଯ୍ୟ କିପରି ତ୍ୱରାନ୍ବିତ ହୋଇପାରିବ ସେ ନେଇ ଭୁବନେଶ୍ବର ଉନ୍ନୟନ କର୍ତ୍ତୃପକ୍ଷ (ବିଡିଏ) ପକ୍ଷରୁ ଗୁରୁତ୍ୱ ଦିଆଯାଇଛି। ବିଡିଏ ଉପାଧ୍ୟକ୍ଷ ବଲୱନ୍ତ ସିଂହଙ୍କ ନିର୍ଦ୍ଦେଶକ୍ରମେ ମିଶନ୍ ମୋଡରେ କିପରି ଆଇଏସ୍ବିଟି ବରମୁଣ୍ଡାର ବିକାଶ କାର୍ଯ୍ୟ ଶେଷ କରାଯାଇ ଏହାକୁ ସର୍ବସାଧାରଣଙ୍କ ଲାଗି କାର୍ଯ୍ୟକ୍ଷମ କରାଯାଇପାରିବ ସେନେଇ କର୍ତ୍ତୃପକ୍ଷ ଯୋଜନା କରୁଛନ୍ତି। ଏହି ପରିପ୍ରେକ୍ଷୀରେ ଗୁରୁବାର ବସ୍ଷ୍ଟାଣ୍ଡର ପ୍ରସ୍ଥାନ ପଟରେ ଟିମ୍ ପ୍ରାଇଡ ଉଚ୍ଛେଦ କରିଛି। ଉଠାଦୋକାନୀଙ୍କ ପ୍ରବଳ ବିରୋଧ ସତ୍ତ୍ବେ ରାସ୍ତା ସମ୍ପ୍ରସାରଣରେ ବାଧକ ସାଜିଥିବା ଅବୈଧ ନିର୍ମାଣକୁ ଭଙ୍ଗାଯାଇଛି। ନୂଆ ଉଚ୍ଛେଦ ଅଧିକାରୀ ଡ. ଶ୍ୱେତ କୁମାର ଦାଶଙ୍କ ନେତୃତ୍ୱରେ ଟିମ୍ ପ୍ରାଇଡ ଓ ପୋଲିସ ବରମୁଣ୍ଡାରେ ପହଞ୍ଚତ୍ଥିଲେ। ସେମାନଙ୍କୁ ପ୍ରାୟ ୧୦ ଜଣ ଉଠାଦୋକାନୀ ବିରୋଧ କରିଥିଲେ। ଜେସିବି ଆଗରେ ଉଠାଦୋକାନୀମାନେ ବସି ରହିବାରୁ ଉଚ୍ଛେଦ ବାଧାପ୍ରାପ୍ତ ହୋଇଥିଲା। ପରେ ପୋଲିସ ସମସ୍ତ ଉଠାଦୋକାନୀଙ୍କୁ ହଟାଇବା ସହ ସ୍ଥିତି ନିୟନ୍ତ୍ରଣକୁ ଆଣିବା ପରେ ଉଚ୍ଛେଦ କାର୍ଯ୍ୟ ଆରମ୍ଭ ହୋଇଥିଲା। ଗୋଟିଏ ପ୍ଲଟ ଉପରେ ଜିଏ ବିଭାଗ ପକ୍ଷରୁ ଓପିପି ମାମଲା ରହିଥିବାବେଳେ ସନ୍ଧ୍ୟାରେ ବର୍ଷା ହେବାରୁ ଉଚ୍ଛେଦ ବନ୍ଦ ରଖାଯାଇଥିଲା। ସୋମବାର ଟିମ ପ୍ରାଇଡ ବିଭାଗକୁ ଓପିସି ମାମଲା ହଟାଇବାକୁ ଚିଠି ଲେଖାଯିବ। ମାମଲା ହଟିବା ପରେ ପରବର୍ତ୍ତୀ ଉଚ୍ଛେଦ କରାଯିବ ବୋଲି ସୂଚନା ଦିଆଯାଇଛି।
ଅପରପକ୍ଷେ ଉଚ୍ଛେଦ ପ୍ରକ୍ରିୟାରେ ୨୯ଟି ଆଜବେଷ୍ଟସ୍ ଘର, ୩ଟି ଚାଳ ଘର, ୪ଟି ଲୁହାଗେଟ, ୫ଟି ପଲିଥିନ ତିଆରି ଘର, ୪ଟି କ୍ୟାବିନ ଓ ୨୫୦ ଫୁଟର ପାଚେରୀକୁ ଭଙ୍ଗାଯାଇଛି। ଆଇନଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଏକ ପ୍ଲାଟୁନ ରିଜର୍ଭ ପୋଲିସ ଓ ଗୋଟିଏ ସେକ୍ସନ ମହିଳା ପୋଲିସ ମୁତୟନ କରାଯାଇଥିଲା। ଉଚ୍ଛେଦବେଳେ ବିଡିଏ ଏନଫୋର୍ସମେଣ୍ଟ ଅଫିସର ଡ. ଦାଶଙ୍କ ସମେତ ବିଡିଏ ଲିଆସନ ଅଫିସର ଶୁଭ୍ରାଂଶୁ ଶେଖର ମହାନ୍ତି, ଡିଭିଜନ-୧ର ସହକାରୀ ଯନ୍ତ୍ରୀ ଜ୍ୟୋତିରଞ୍ଜନ ସାହୁ, ଭରତପୁର ଆଇଆଇସି ବିଭୁଦତ୍ତ ରାଉତରାୟ ପ୍ରମୁଖ ଉପସ୍ଥିତ ଥିଲେ। ଗୁରୁବାର ୬୦ ପ୍ରତିଶତ ଜବରଦଖଲ ହଟିଥିବାବେଳେ ଆସନ୍ତା ସପ୍ତାହରେ ବଳକା ଜବରଦଖଲ ହଟାଯିବ ବୋଲି ସୂଚନା ଦିଆଯାଇଛି।
