ନୂଆଦିଲ୍ଲୀ,୬।୮: ପୂର୍ବତନ କେନ୍ଦ୍ରମନ୍ତ୍ରୀ ତଥା ଭାଜପାର ବରିଷ୍ଠ ନେତ୍ରୀ ସୁଷମା ସ୍ବରାଜଙ୍କ ଆଜି ପୂଣ୍ୟତିଥି। ଏହି ଅବସରରେ ସୁଷମା ସ୍ବରାଜଙ୍କ ଝିଅ ବାଂସୁରୀ ସ୍ବରାଜ ତାଙ୍କୁ ମନେପକାଇଛନ୍ତି। ଏଥିସହ ସେ ଏକ ଭାବପ୍ରବଣ ପୋଷ୍ଟ ଟୁଇଟ କରିଛନ୍ତି। ମା’ ସୁଷମାଙ୍କ ଏକ ଫଟୋ ଶେୟାର କରି ବାଂସୁରୀ କ୍ୟାପସନ୍ରେ ଲେଖିଛନ୍ତି, ଆଜି ବି ମା’ ତମେ ମୋର ଶକ୍ତି ହୋଇ ଶିରାପ୍ରଶିରାରେ ପ୍ରବାହିତ ହେଉଛ। ତୁମର ବିବେକ ମୋ ନିଷ୍ପତ୍ତି ସହ ଜଡିତ ଏବଂ ତୁମର ଆଦର୍ଶ ମୋ ଜୀବନ ପଥକୁ ପ୍ରଜ୍ୱଳିତ କରୁଛି। ହେ କୃଷ୍ଣ, ତୁମେ ତ ମୋଠୁଁ ମା’ଙ୍କୁ ଚୋରାଇନେଲ ଏବେ ତାଙ୍କୁ ସାଇତି ରଖିବ ବୋଲି ବାଂସୁରୀ ଉକ୍ତ ପୋଷ୍ଟରେ ଉଲ୍ଲେଖ କରିଛନ୍ତି। ସୂଚନାଯୋଗ୍ୟ, ୨୦୧୯ରେ ୬୭ ବର୍ଷ ବୟସରେ ହୃଦଘାତ ଯୋଗୁ ପୂର୍ବତନ ବର୍ହିବ୍ୟାପାରମନ୍ତ୍ରୀ ସୁଷମା ସ୍ବରାଜଙ୍କ ଦେହାନ୍ତ ହେଇଥିଲା। ସୁଷମା ହରିୟାଣାଠାରୁ ନିଜର ରାଜନୈତିକ କ୍ୟାରିଅର ଆରମ୍ଭ କରିଥିଲେ। ୧୯୭୭ ରେ ପ୍ରଥମ ଥର ପାଇଁ ହରିୟାଣା ବିଧାନସଭା ନିର୍ବାଚନରେ ଜିତିଥିଲେ। ୨୫ ବର୍ଷ ବୟସରେ ସେ ଚୌଧୁରୀ ଦେବୀ ଲାଲ ସରକାରରେ ରାଜ୍ୟର ଶ୍ରମମନ୍ତ୍ରୀ ହୋଇଥିଲେ। ଏଥିସହ ହରିୟାଣା ସରକାରରେ ସୁଷମା ସର୍ବ କନିଷ୍ଠ କ୍ୟାବିନେଟ ମନ୍ତ୍ରୀ ରହିଥିଲେ। ଏତଦ୍ ବ୍ୟତୀତ ଦେଶର ରାଜଧାନୀ ଦିଲ୍ଲୀର ପ୍ରଥମ ମହିଳା ମୁଖ୍ୟମନ୍ତ୍ରୀ ହୋଇଥିଲେ ସୁଷମା ସ୍ବରାଜ। ଡିସେମ୍ବର ୧୯୯୮ ପର୍ଯ୍ୟନ୍ତ ସୁଷମା ଦିଲ୍ଲୀର ମୁଖ୍ୟମନ୍ତ୍ରୀ ଭାବେ ରହିଥିବା ବେଳେ ସେ ଦିଲ୍ଲୀର ପଞ୍ଚମ ମୁଖ୍ୟମନ୍ତ୍ରୀ ହୋଇଥିଲେ।
