ପାରାଦୀପ, ୧୭।୫(ସ୍ବ.ପ୍ର.): ଜଗତ୍ସିଂହପୁର ଜିଲା ପାରାଦୀପର ଅଠରବାଙ୍କୀ ଆଶ୍ରୟ କେନ୍ଦ୍ରରେ ଅଛନ୍ତି ୩ ଜଣ ବାଂଲାଦେଶୀ ଧୀବର। ୨୦୨୨ ଅକ୍ଟୋବର ୨୮ରୁ ସେମାନେ ଏଠାରେ ରହୁଛନ୍ତି। ପୋଲିସ ସେମାନଙ୍କୁ ଜଗୁଥିବାବେଳେ ଜିଲା ପ୍ରଶାସନ ପକ୍ଷରୁ ଖାଦ୍ୟ,ପୋଷାକ, ଔଷଧ ଠାରୁ ଆରମ୍ଭ କରି ଅନ୍ୟାନ୍ୟ ଆବଶ୍ୟକତା ପୂରଣ କରାଯାଉଛି। କିନ୍ତୁ ସେମାନଙ୍କ ଫେରିବା ବିଳମ୍ବ ହେବାରେ ଲାଗିଛି। କେବେ ଯିବେ ତା’ମଧ୍ୟ ଠିକଭାବେ କୁହାଯାଇପାରୁନାହିଁ। ସମାନ ସମୟରେ ଧାମରାରେ ଥିବା ୧୬ ଜଣ ବାଂଲାଦେଶୀ ଧୀବର ଗତ ସପ୍ତାହରେ ସ୍ବଦେଶ ଫେରିଗଲେଣି। କିନ୍ତୁ ପାରାଦୀପରେ ଥିବା ୩ ଜଣ ୬ ମାସରୁ ଊର୍ଦ୍ଧ୍ୱ ହେବ ଘରକୁ ଫେରିପାରୁନାହାନ୍ତି। ଫେରିବା ପାଇଁ ସେମାନଙ୍କ ବ୍ୟାକୁଳ ଭରା ଅନୁରୋଧ ସରକାରୀ କ୍ଲିୟରାନ୍ସ ଅଭାବରୁ ପୂରଣ ହୋଇପାରୁନାହିଁ। ସେମାନଙ୍କ ମଧ୍ୟରେ ମହମ୍ମଦ ମିରାଜ ନାମକ ଧୀବରଙ୍କ ମା’ ଇତିମଧ୍ୟରେ ଆରପାରିକୁ ଚାଲିଯାଇଛନ୍ତି। ମାତ୍ର ମହମ୍ମଦ ତାଙ୍କର ଶେଷଦର୍ଶନ କରିପାରି ନ ଥିବା କହି କାନ୍ଦୁଛନ୍ତି।
୨୦୨୨ ଅକ୍ଟୋବର ୨୬ରେ ବାତ୍ୟା ସିତରଙ୍ଗ ହୋଇଥିଲା। ଏହି ବାତ୍ୟାରେ ବାଂଲାଦେଶର ୩ ମାଛଧରା ଡଙ୍ଗା ସମୁଦ୍ର ଗର୍ଭରେ ଭାଙ୍ଗି ଯାଇଥିଲା। ଫଳରେ ଅନେକ ଧୀବର ପାଣିରେ ଭାସିଥିଲେ। ସାଗରଦ୍ୱୀପ ଠାରୁ ୯୦ ନଟିକାଲ ମାଇଲ (୧୬୨କିମି)ସମୁଦ୍ର ପାଣିରେ ଭାସୁଥିବା ବେଳେ ଭାରତୀୟ ତଟରକ୍ଷୀ ବାହିନୀ ୧୮ ଜଣଙ୍କୁ ଉଦ୍ଧାର କରିଥିଲା। ସେମାନଙ୍କ ସମ୍ପର୍କରେ ଯାଞ୍ଚ କରିବା ପରେ ବାଂଲାଦେଶ କୋଷ୍ଟଗାର୍ଡକୁ ହସ୍ତାନ୍ତର କରାଯାଇଥିଲା। ସେହିପରି ୧୬ ଜଣଙ୍କୁ ଧାମରା ଅଞ୍ଚଳର ମାଛଧରା ବୋଟ ଉଦ୍ଧାର କରି ସ୍ଥାନୀୟ ପୋଲିସକୁ ହସ୍ତାନ୍ତର କରିଥିଲା। ୩ ଜଣଙ୍କୁ ବାଲେଶ୍ୱରର ରଘୁନାଥ ନାମକ ବୋଟ ଉଦ୍ଧାର କରି ପାରାଦୀପ ମେରାଇନ ପୋଲିସକୁ ହସ୍ତାନ୍ତର କରିଥିଲା। ମାତ୍ର ଏହି ୩ ଜଣଙ୍କ ପାଖରେ କିଛି ପ୍ରମାଣପତ୍ର ନ ଥିଲା। ମୁମୂର୍ଷୁ ଅବସ୍ଥାରେ ପୋଲିସ ପ୍ରାଥମିକ ଚିକିତ୍ସା କରି ଆଶ୍ରୟକେନ୍ଦ୍ରରେ ଥଇଥାନ କରିଛି। ପରେ ସମସ୍ତ ସୁରକ୍ଷା ଏଜେନ୍ସି ଯାଞ୍ଚ କରି ସାରିଛନ୍ତି। ମାତ୍ର ସେମାନେ ଘରକୁ ଫେରିପାରୁନାହାନ୍ତି। ସେମାନଙ୍କ ଫେରିବା ସମ୍ପର୍କରେ ସ୍ଥାନୀୟ ଅତିରିକ୍ତ ଜିଲାପାଳ କାହ୍ନୁଚରଣ ଧିର କୁହନ୍ତି ପ୍ରଶାସନ ପକ୍ଷରୁ ଏହା ମଧ୍ୟରେ ଏକାଧିକ ବାର ଚିଠି ଲେଖାଯାଇଛି। ସରକାର ମଧ୍ୟ ଏ ବିଷୟରେ ଅବଗତ ଅଛନ୍ତି। ବୈଦଶିକସ୍ତରରେ କ୍ଲିୟରାନ୍ସ ଆସି ନ ଥିବାରୁ ସେମାନଙ୍କୁ ସସମ୍ମାନେ ରଖାଯାଇଛି। ଜିଲା ପ୍ରଶାସନ ପକ୍ଷରୁ ଖାଦ୍ୟ ପୋଷାକ ଆଦି ଯୋଗାଇ ଦିଆଯାଇଛି। ସବୁଠାରୁ କୌତୂହଳ ହେଲା ଯେତେବେଳେ ସେମାନେ ଉଦ୍ଧାର ହୋଇଥିଲେ ସେମାନଙ୍କ ଭାଷା ବୁଝି ହେଉ ନ ଥିଲା। ଏବେ ସେମାନେ ଓଡ଼ିଆ ଭାଷା ବୁଝିବା ସହ ଆଂଶିକ ଭାବେ କହିପାରୁଛନ୍ତି।
