ମହାକାଳପଡ଼ା,୨୯ା୮(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ସଭାଗୃହରେ ଜିଲାପାଳଙ୍କ ମିଳିତ ଜନଶୁଣାଣି ଶିବର ସୋମବାର ଅନୁଷ୍ଟିତ ହୋଇଯାଇଛି। ବ୍ଲକର ପେଟଛେଲା ପଞ୍ଚାୟତର ଜନଜାତି ବର୍ଗର ଶବରପଲ୍ଲୀ ଗାଁ ରହିଛି। ଏହି ଗାଁକୁ ସ୍ବାଧୀନତାର ଦୀର୍ଘ ୭୭ ବର୍ଷ ବିତି ଯାଇଥିଲେ ମଧ୍ୟ ସବୁଦିନିଆ ରାସ୍ତାଟିଏ ନାହିଁ। ବର୍ଷାଦିନ ଆସିଲେ ଲୁଗା ଦୋଳିରେ ଗର୍ଭବତୀ, ଗୁରୁତର ରୋଗୀଙ୍କୁ ବୋହି ନେବାକୁ ପଡ଼େ। ବାପା ଜେଜେ ବାପାଙ୍କ ଅମଳରୁ ଆମେ ଜଙ୍ଗଲ କାଟି ଦୀର୍ଘବର୍ଷ ହେବ ବସବାସ କରିଆସୁଛୁ। ଫଳରେ ଆମ ପିଲାମାନଙ୍କ ପାଠ ପଢ଼ିବାରେ ଅସୁବିଧା ହେଉଛି। ବାବୁ ଆମକୁ ରାସ୍ତା କେବେ ଦେବୁ, କାହିଁକି ହୋଇନି ଏଭଳି ଏକ ସଙ୍ଗୀନ ଅଭିଯୋଗ ଗାଁର ଅନୁସୂଚିତ ଜନଜାତିର ବୃଦ୍ଧା ଦୁଃଖୀ ଭକ୍ତା (୬୫) ଖଣ୍ଡେ ଦରଖାସ୍ତ ଧରି ଶିବିରରେ ଉପସ୍ଥିତ ପ୍ରଶାସନିକ ଅଧିକାରୀଙ୍କ ନିକଟରେ ଦୁଃଖ ବଖାଣି ଥିଲେ। ବୃଦ୍ଧାଙ୍କର ଦାବି ଶୁଣି ଉପସ୍ଥିତ ଥିବା ଜିଲାସ୍ତରୀୟ ପ୍ରଶାସନିକ ଅଧିକାରୀଙ୍କ ହଡବଡେଇ ଯାଇଥିଲେ। ଏହି ଅଭିଯୋଗକୁ ଗୁରୁତ୍ୱର ସହ ନେଇ ପ୍ରଶାସନିକ ଅଧିକାରୀ ୨୪ ଘଣ୍ଟା ମଧ୍ୟରେ ଗାଁ ପରିଦର୍ଶନ କରି ରାସ୍ତା ବ୍ୟବସ୍ଥା କରାଯିବ ବୋଲି ବୃଦ୍ଧାଙ୍କୁ ପ୍ରତିଶ୍ରୁତି ଦିଆଯାଇଥିଲା।
ବ୍ଲକ ଅଧୀନ ପେଟଛେଲା ପଞ୍ଚାୟତର ଜଙ୍ଗଲ ଘେରା ଶବରପଲ୍ଲୀ ଗଁା ରହିଛି। ଶବରପଲ୍ଲୀର ୪୦ରୁ ଅଧିକ ଜନଜାତି ପରିବାରର ୨ ଶହରୁ ଅଧିକ ଲୋକ ବସବାସ କରୁଛନ୍ତି। ସେମାନଙ୍କ ମୌଳିକ ସମସ୍ୟାର ସମାଧାନ ଆଜି ପର୍ଯ୍ୟନ୍ତ ହୋଇପାରୁନାହିଁ। ଏ ନେଇ ରାଜନେତାଠାରୁ ପ୍ରଶାସନ ପର୍ଯ୍ୟନ୍ତ ଏହି ଜନଜାତି ପରିବାରମାନଙ୍କ ଦୁଃଖ ଜଣାଇଥିଲେ ମଧ୍ୟ କିଛି ସୁଫଳ ମିଳୁନାହିଁ ସ୍ଥାନୀୟ ଲୋକମାନେ ବୋଲି କହିଛନ୍ତି। ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଜନଜାତିଙ୍କ ବିକାଶ ପାଇଁ ଯୋଜନା ଘରେ ଯୋଜନା କରୁଛନ୍ତି। କିନ୍ତୁ ସ୍ଥାନୀୟ ଜନ ପ୍ରତିନିଧି ଓ ପ୍ରଶାସନ ଅବହେଳା ଯୋଗୁ ଆମେମାନେ ଦୁର୍ଦ୍ଦିନରେ ଦିନ କାଟୁଛୁ ବୋଲି କହିଛନ୍ତି ଅଭିଯୋଗକାରୀଙ୍କ ମଧ୍ୟରେ ପଇଡ଼ ଭକ୍ତା, ସୁମନ୍ତ ଭକ୍ତା, ମିଟ ନାୟକ, ସଚି ଆହାଡ଼ି, ସୁଦନ ଭକ୍ତା, ଗୌର ମଲିକ ପ୍ରମୁଖ। ସେମାନେ କହିବା କଥା ନିର୍ବାଚନ ଆସିଲେ ଜନ ପ୍ରତିନିଧିମାନେ ଆମକୁ ବିଭିନ୍ନ ପ୍ରତିଶ୍ରୁତି ଦେଇ ନିରୀହ ଆଦିବାସୀ ଶବରମାନଙ୍କଠାରୁ ଭୋଟ ନେଇଥାନ୍ତି। କିନ୍ତୁ ନିର୍ବାଚିତ ହେଲା ପରେ ଆମକୁ ଠକି ଦେଇଥାନ୍ତି। ଶବରପଲ୍ଲୀ ଲୋକେ ଏହି ମିଳିତ ଜନଶୁଣାଣିରେ ୪୦ ଅଭିଯୋଗ ପତ୍ରର ଶୁଣାଣି ହୋଇଥିଲା। ଶିବିରରେ ଅତିରିକ୍ତ ଜିଲାପାଳ (ରାଜସ୍ବ) ନିଲୁ ମହାପାତ୍ର, ଏସ୍ପି ମଡକର ସନ୍ଦିପ ସମ୍ପଦ, ପ୍ରୋଜେକ୍ଟ ଡାଇରେକ୍ଟର ରାଜେନ୍ଦ୍ର ପଣ୍ଡା, ଉପଜିଲ୍ଲାପାଳ ନିରଞ୍ଜନ ବେହେରା, ବିଡିଓ ସାଗର କୁମାର ନନ୍ଦ, ତହସିଲଦାର ମାନସ ରଞ୍ଜନ ତ୍ରିପାଠୀ, ବ୍ଲକ ସହକାରୀ ଯନ୍ତ୍ରୀ ସ୍ମୃତିରେଖା ଖଟୁଆ , ଜିଲା ମୁଖ୍ୟ ଚିକିତ୍ସା ଅଧିକାରିଣୀ ଅନିତା ପଟ୍ଟନାୟକଙ୍କ ସମେତ ବିଭିନ୍ନ ଲାଇନ୍ ଡିପାର୍ଟ ମେଣ୍ଟର ଅଧିକାରୀମାନେ ଉପସ୍ଥିତ ଥିଲେ।
