ସେଞ୍ଚୁରିୟନ,୧୫।୪: ଦକ୍ଷିଣ ଆଫ୍ରିକା ବିପକ୍ଷ ତୃତୀୟ ଟି୨୦ ମ୍ୟାଚ୍ରେ ଭ୍ରମଣକାରୀ ପାକିସ୍ତାନ ୯ ଉଇକେଟରେ ବିଜୟ ହାସଲ କରିଛି। ସ୍ଥାନୀୟ ସୁପର ସ୍ପୋର୍ଟ ପାର୍କ ଗ୍ରାଉଣ୍ଡରେ ବୁଧବାର ଅନୁଷ୍ଠିତ ଏହି ହାଇସ୍କୋରିଂ ମୁକାବିଲାରେ ଅଧିନାୟକ ବାବର ଆଜମଙ୍କ ଦ୍ରୁତ ଶତକ ସହାୟତାରେ ପାକିସ୍ତାନ ଦୁଇ ଓଭର ବାକି ରଖି ମ୍ୟାଚ୍ ହାତେଇ ନେଇଛି। ଟସ୍ ହାରି ବ୍ୟାଟିଂ ପାଇଁ ଆମନ୍ତ୍ରଣ ପାଇଥିବା ଦକ୍ଷିଣ ଆଫ୍ରିକା ଜବରଦସ୍ତ ବ୍ୟାଟିଂ କରି ୨୦ ଓଭରରେ ୫ ଉଇକେଟ ହରାଇ ୨୦୩ ରନ ସଂଗ୍ରହ କରିଥିଲା। ଜବାବରେ ପାକିସ୍ତାନ ୧୮ ଓଭରରେ ମାତ୍ର ଗୋଟିଏ ଉଇକେଟ ହରାଇ ୨୦୫ ରନକରି ବାଜି ମାରିଛି। ଏଥିସହିତ ୪ ମ୍ୟାଚ୍ ବିଶିଷ୍ଟ ଏହି ସିରିଜରେ ପାକିସ୍ତାନ ୨-୧ରେ ଅଗ୍ରଣୀ ହାସଲ କରିଛି। ବାବର ପ୍ଲେୟର ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି।
୨୦୪ ରନର କଷ୍ଟସାଧ୍ୟ ଟାର୍ଗେଟର ପିଛା କରି ପାକିସ୍ତାନର ଦୁଇ ଓପନର ବାବର ଆଜମ ଓ କିପର ବ୍ୟାଟ୍ସମ୍ୟାନ ମହମ୍ମଦ ରିଜଓ୍ବାନ ପ୍ରଥମ ଉଇକେଟରେ ୧୯୭ ରନ ସଂଗ୍ରହ କରି ବିଜୟକୁ ସହଜ କରିଥିଲେ। ବାବର ୫୯ ବଲରୁ ୧୫ ଚୌକା ଓ ୪ ଛକା ସହ ୧୨୨ ରନର ଶତକୀୟ ପାଳି ଖେଳି ଲିଜାଡ ଓ୍ବିଲିୟମ୍ସଙ୍କ ବଲ୍ରେ ଉଇକେଟକିପର ହେନେରିଚ କ୍ଲସେନଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଏଥିସହ ବାବର କ୍ୟାରିୟରର ପ୍ରଥମ ଟି୨୦ ଶତକ ହାସଲ କରିଛନ୍ତି। ରିଜଓ୍ବାନ ୭୩ (୪୭ ବଲ, ୫ ଚୌକା, ୨ ଛକା) ଓ ଫଖର ଜମାନ ୮ ରନକରି ଅପରାଜିତ ରହିଥିଲେ।
ପ୍ରଥମେ ବ୍ୟାଟିଂ କରିଥିବା ଘରୋଇ ଦଳ ତରଫରୁ ଓପନର ଜାନେମନ ମଲାନ ୫୫, ଏଡେନ ମାରକ୍ରାମ ୬୩ ରନ (୬ ଚୌକା, ୪ ଛକା), ଜର୍ଜ ଲିଣ୍ଡେ ୨୨, କ୍ଲାସେନ ୧୫, ଆଣ୍ଡିଲ ଫେଲୁକ୍ୱାୟୋ ୧୧ ରନକରି ଆଉଟ ହୋଇଥିବା ବେଳେ ରାସି ଭାନ ଡେର ଡୁସେନ ୩୪ ରନ କରି ଅପରାଜିତ ରହିଥିଲେ। ପାକିସ୍ତାନ ତରଫରୁ ବୋଲିଂରେ ମହମ୍ମଦ ନଓ୍ବାଜ ୨, ଶାହିନ ଶାହା ଆଫ୍ରିଦି, ହାସନ ଅଲି ଓ ଫହିମ ଆଶ୍ରଫ୍ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଦକ୍ଷିଣ ଆଫ୍ରିକା ୨୦ ଓଭରରେ ୨୦୩/୫
(ମାରକ୍ରାମ- ୬୩, ମଲାନ- ୫୫, ଡୁସେନ- ୩୪*, ଲିଣ୍ଡେ- ୨୨, କ୍ଲାସେନ- ୧୫, ନଓ୍ବାଜ- ୨/୩୮, ଆଫ୍ରିଦି- ୧/୩୯, ହାସନ- ୧/୪୭, ଆଶ୍ରଫ- ୧/୩୭)।
ପାକିସ୍ତାନ ୧୮ ଓଭରରେ ୨୦୫
(ବାବର- ୧୨୨, ରିଜଓ୍ବାନ- ୭୩*, ଜମାନ- ୮*, ଓ୍ବିଲିୟମ୍ସ- ୧/୩୪)।
