ହରାରେ, ୮ା୫-ସ୍ଥାନୀୟ ହରାରେ ସ୍ପୋଟର୍ସ କ୍ଲବରେ ଶୁକ୍ରବାରଠାରୁ ଆରମ୍ଭ ହୋଇଥିବା ଜିମ୍ବାଓ୍ବେ ବିପକ୍ଷ ଦ୍ୱିତୀୟ କ୍ରିକେଟ ଟେଷ୍ଟରେ ପାକିସ୍ତାନର ଆବିଦ ଅଲି(୧୧୮ ନଟ୍ଆଉଟ) ଓ ଆଝାର ଅଲିି (୧୨୬ ରନ) ଶତକ ହାସଲ କରିଛନ୍ତି। ଭ୍ରମଣକାରୀ ଦଳ ପ୍ରଥମ ଦିବସ ଖେଳ ଶେଷ ସୁଦ୍ଧା ୪ଉଇକେଟ ବିନିମୟରେ ୨୬୮ରନ କରିଛି। ଆବିଦ ଅଲିଙ୍କ ସହ ସାଜିଦ ଖାଁ ୧ ରନ କରି ଅପରାଜିତ ରହିଛନ୍ତି। ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ପାକିସ୍ତାନ ମାତ୍ର ୧୨ ରନ୍ରେ ପ୍ରଥମ ଉଇକେଟ ହରାଇଥିଲା। ଓପନର ଇମ୍ରାନ ବଟ ରିଚାର୍ଡ ଏନ୍ଗାରାଭଙ୍କ ବଲ୍ରେ ଡୋନାଲ୍ଡ ତିରିପାନୋଙ୍କ ଦ୍ୱାରା କ୍ୟାଚ ଆଉଟ ହୋଇଯାଇଥିଲେ। ବଟ ମାତ୍ର ୨ ରନ କରିଥିଲେ। ମାତ୍ର ଆବିଦ ଓ ଆଝାର ଦ୍ୱିତୀୟ ଉଇକେଟ ପାର୍ଟନରଶିପ୍ରେ ୨୩୬ ରନ ଯୋଗ କରି ଦଳର ସ୍ଥିତିକୁ ମଜଭୁତ କରିଦେଇଥିଲେ। ବ୍ଲେସିଂ ମୁଜାରାବାନି ଏହି ପାର୍ଟନରଶିପ୍କୁ ଭାଙ୍ଗି ଦେଇଥିଲେ। ସେ ଆଝାରଙ୍କୁ ମିଲ୍ଟନ ଶୁମ୍ବାଙ୍କ ଦ୍ୱାରା କ୍ୟାଚ ଆଉଟ କରିଦେଇଥିଲେ। ପରବର୍ତ୍ତୀ ଦୁଇ ବ୍ୟାଟ୍ସମ୍ୟାନ ଅଧିନାୟକ ବାବର ଆଜାମ ଓ ଫଓ୍ବାଦ ଆଲାମ ଯଥାକ୍ରମେ ମାତ୍ର ୨ ଓ ୫ ରନ କରି ଶୀଘ୍ର ଆଉଟ ହୋଇଯାଇଥିଲେ।
୧୮ବର୍ଷ ଅପେକ୍ଷା ପରେ ଟେଷ୍ଟ ପଦାର୍ପଣ କଲେ ତାବିଶ
ଏହି ମ୍ୟାଚରେ ୬୬ ବର୍ଷ ବ୍ୟବଧାନରେ ସବୁଠାରୁ ବୟସ୍କ ଖେଳାଳି ଭାବେ ତାବିଶ ଖାଁ (୩୬ବର୍ଷ ୧୪୬ ଦିନ) ପାକିସ୍ତାନ ଦଳରୁ ଟେଷ୍ଟ ପଦାର୍ପଣ କରିଛନ୍ତି। ଏହି ଫାଷ୍ଟ ବୋଲରଙ୍କୁ ଜାତୀୟ ଦଳରେ ସ୍ଥାନ ପାଇବା ପାଇଁ ଦୀର୍ଘ ୧୮ ବର୍ଷ ଅପେକ୍ଷା କରିବାକୁ ପଡ଼ିଥିଲା। ତାବିଶ ୫୯୮ ପ୍ରଥମଶ୍ରେଣୀ ଉଇକେଟ ଅକ୍ତିଆର କରିଛନ୍ତି। ଟେଷ୍ଟ ପଦାର୍ପଣ ପୂର୍ବରୁ କୌଣସି ଏସୀୟ ଦଳର ଖେଳାଳିଙ୍କ କ୍ଷେତ୍ରରେ ଏହା ହେଉଛି ସର୍ବାଧିକ। ପୂର୍ବରୁ ଏହି ରେକର୍ଡ ଶ୍ରୀଲଙ୍କାର ମାଲିଣ୍ଡା ପୁଷ୍ପକୁମାରାଙ୍କ ନାମରେ ରହିଥିଲା। ସେ ୨୦୧୭ରେ ଭାରତ ବିପକ୍ଷରେ ତାଙ୍କ ଟେଷ୍ଟ ପଦାର୍ପଣ ପୂର୍ବରୁ ୫୫୮ ପ୍ରଥମ ଶ୍ରେଣୀ ଉଇକେଟ ଅକ୍ତିଆର କରିସାରିଥିଲେ। ଆୟର୍ଲାଣ୍ଡର ଟେଷ୍ଟ ପଦାର୍ପଣ ପୂର୍ବରୁ ଟିମ୍ ମୁର୍ତ୍ତାଗ ୭୧୨ ପ୍ରଥମ ଶ୍ରେଣୀ ଉଇକେଟ ଅକ୍ତିଆର କରିଥିଲେ।
