ପୁରୁଷୋତ୍ତମପୁର,୫।୧(ସୀମାଞ୍ଚଳ ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଅଞ୍ଚଳରୁ ରବିବାର ଏକ ଅଭାବନୀୟ ଘଟଣା ଶନିବାର ସାମ୍ନାକୁ ଆସିଛି। ଏକ ଅଟୋ ଯୋଗେ ଘରକୁ ଫେରୁଥିବା ବେଳେ ଅଟୋ ଚାଳକ ଜଣେ ବୃଦ୍ଧାଙ୍କ ସହ ୬ ବର୍ଷର ଶିଶୁ କନ୍ୟାଙ୍କୁ ଅପହରଣ କରି ସେମାନେ ପିନ୍ଧିଥିବା ସୁନା, ରୁପା ଅଳଙ୍କାର ଲୁଟି ନେଇଥିବା ଅଭିଯୋଗ ହୋଇଛି। ଅନ୍ୟପକ୍ଷେ ବୃଦ୍ଧା ଏବଂ ଶିଶୁ କନ୍ୟାଙ୍କୁ ସଂଜ୍ଞାହୀନ ଅବସ୍ଥାରେ ରାସ୍ତାକଡ଼ରେ ଫିଙ୍ଗିଦେଇ ଅଟୋ ଚାଳକ ଫେରାର ହୋଇଯାଇଥିବା ଜଣାପଡିଛି।
ମିଳିଥିବା ସୂଚନା ମୁତାବକ, ପୁରୁଷୋତ୍ତମପୁର ଚାଙ୍ଗୁଡିଆପଦର ସାହିର କୁନ୍ତଳା ଗୌଡ(୬୮) ତାଙ୍କ ନାତୁଣୀ ସୁଇଟି(୬)ଙ୍କୁ ଧରି ଝିଅ ଘର ଚଢେଆପଲ୍ଲୀ ଯାଇଥିଲେ। ଶନିବାର ଅପରାହ୍ନରେ ଝିଅଘରୁ ଏକ ଅଟୋ ଯୋଗେ ଗାଁକୁ ଫେରୁଥିଲେ। ହେଲେ ଅଟୋ ଚାଳକ ସେମାନଙ୍କୁ ଘରକୁ ଆଣି ଛାଡିବା ପରିବର୍ତ୍ତେ ବାଟରୁ ଅପହରଣ କରିନେଇ ଅନ୍ୟ ଏକ ରାସ୍ତାକୁ ନେଇଯାଇଥିଲେ। ପରେ ଅଟୋ ଚାଳକ କୁନ୍ତଳା ଏବଂ ଶିଶୁ କନ୍ୟାଙ୍କୁ ସଂଜ୍ଞାହୀନ କରି ପିନ୍ଧିଥିବା ସମସ୍ତ ସୁନା ଏବଂ ରୁପାର ଅଳଙ୍କାର ଲୁଟି ନେଇ ଥିଲେ। ପରେ ରମ୍ଭା ଥାନା ଅନ୍ତର୍ଗତ କାଇଁଚପୁର ଗାଁ ନିକଟସ୍ଥ ଏକ ଆଶ୍ରୟସ୍ଥଳ ନିକଟରେ ସେମାନଙ୍କୁ ପକାଇ ଦେଇ ଚମ୍ପଟ ମାରିଥିଲେ।
ଦୀର୍ଘ ସମୟ ବିତିଯାଇଥିଲେ ସୁଦ୍ଧା କୁନ୍ତଳା ଘରକୁ ନ ଫେରିବାରୁ ପରିବାର ଲୋକେ ଖୋଜାଖୋଜି କରିବା ସହ ପୁରୁଷୋତ୍ତମପୁର ପୋଲିସକୁ ଜଣାଇଥିଲେ। ଇତିମଧ୍ୟରେ ଉଭୟେ ରାତି ପର୍ଯ୍ୟନ୍ତ ପଡିଥିବା ସେଠିକାର ଲୋକେ ଦେଖି ରମ୍ଭା ପୋଲିସକୁ ଖବର ଦେଇଥିଲେ। ରମ୍ଭା ପୋଲିସ ପହଞ୍ଚି ଉଭୟଙ୍କୁ ଉଦ୍ଧାର କରି ଚିକିତ୍ସା ପାଇଁ ଛତ୍ରପୁର ମେଡିକାଲକୁ ନେଇଥିଲା। ଅବସ୍ଥା ଗୁରୁତର ଥିବାରୁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି।
ଏନେଇ ରମ୍ଭା ପୋଲିସ ପୁରୁଷୋତ୍ତମପୁର ପୋଲିସକୁ ଜଣାଇବା ପରେ ପୁରୁଷୋତ୍ତମପୁର ପୋଲିସ କୁନ୍ତଳାଙ୍କ ପରିବାର ଲୋକଙ୍କୁ ଖବର ଦେଇଥିଲା। ପରେ ପରିବାର ଲୋକେ ବ୍ରହ୍ମପୁର ବଡମେଡିକାଲ ଯାଇ ଭେଟିଛନ୍ତି। ବର୍ତ୍ତମାନ ସୁଦ୍ଧା ସେମାନଙ୍କ ଅବସ୍ଥା ଗୁରୁତର ରହିଥିବା ପରିବାର ଲୋକେ କହିଛନ୍ତି। ଏହାକୁ ନେଇ ଥାନା ଆଇଆଇସି ରାଜେଶ କୁମାର ନାୟକଙ୍କୁ ପଚାରିବାରୁ ଘଟଣାର ତଦନ୍ତ ଜାରି ରହିଥିବା କହିଛନ୍ତି।
