ମେଲବୋର୍ନ,୨୧।୨(ଏପି): ଜାପାନ ମହିଳା ଟେନିସ ତାରକା ନାଓମି ଓସାକା ବର୍ଷର ପ୍ରଥମ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଅଷ୍ଟ୍ରେଲିଆନ ଓପନ ସିଙ୍ଗଲ୍ସ ଟାଇଟଲ ହାସଲ କରିଛନ୍ତି। ଶନିବାର ଅନୁଷ୍ଠିତ ମହିଳା ସିଙ୍ଗଲ୍ସ ଫାଇନାଲ ମ୍ୟାଚ୍ରେ ତୃତୀୟ ସିଡ୍ ମାନ୍ୟତା ପାଇଥିବା ଓସାକା ୬-୪, ୬-୩ ସିଧାସଳଖ ସେଟ୍ରେ ୨୨ତମ ସିଡ୍ ଆମେରିକାର ଜେନିଫର ବ୍ରାଡିଙ୍କୁ ପରାସ୍ତ କରି ଚାମ୍ପିୟନ ହୋଇଛନ୍ତି। ଏଥିସହିତ ସେ ଦ୍ୱିତୀୟଥର ପାଇଁ ଅଷ୍ଟ୍ରେଲିଆନ୍ ଓପନ ଟାଇଟଲ ହାସଲ କରିଛନ୍ତି ଓ କ୍ୟାରିୟରରେ ମୋଟ ଚତୁର୍ଥ ଗ୍ରାଣ୍ଡସ୍ଲାମ ଟାଇଟଲ ଜିତିଛନ୍ତି। ୨୩ ବର୍ଷୀୟା ଓସାକା ଜାପାନରେ ଜନ୍ମ ଗ୍ରହଣ କରିଥିଲେ ମଧ୍ୟ ମାତ୍ର ୩ ବର୍ଷରେ ତାଙ୍କ ପରିବାର ସହିତ ଆମେରିକା ଚାଲିଯାଇଥିଲେ। ଅନ୍ୟପଟେ ୨୫ ବର୍ଷୀୟ ବ୍ରାଡି ପ୍ରଥମଥର ପାଇଁ ଗ୍ରାଣ୍ଡସ୍ଲାମ ଫାଇନାଲ ଖେଳିଥିଲେ ଓ ଏଥିରେ ପରାସ୍ତ ହୋଇ ରନର୍ସ ଅପ୍ରେ ସନ୍ତୁଷ୍ଟ ହୋଇଛନ୍ତି।
ଫାଇନାଲ ମ୍ୟାଚ ଦେଖିବାକୁ ୭,୫୦୦ ଦର୍ଶକ ଷ୍ଟାଡିୟମରେ ଉପସ୍ଥିତ ଥିଲେ। ଏବେ ଖେଳ ଜାରି ରଖିଥିବା ମହିଳା ଖେଳାଳିଙ୍କ ମଧ୍ୟରେ ସେରେନା ଓ୍ବିଲିୟମ୍ସ ଓ ତାଙ୍କ ଭଉଣୀ ଓସାକାଙ୍କଠାରୁ ଅଧିକ ଗ୍ରାଣ୍ଡସ୍ଲାମ ଟାଇଟଲ ଜିତିଛନ୍ତି। ସେରେନା ୨୩ ଓ ଭେନସ ୭ଟି ଗ୍ରାଣ୍ଡସ୍ଲାମ ଜିତିଛନ୍ତି। ସ୍ଥାନୀୟ ରଡ ଲାଭର ଏରିନାରେ ଶନିବାର ଖେଳାଯାଇଥିବା ଫାଇନାଲ ମ୍ୟାଚ୍ରେ ଓସାକା ଅତି ସହଜରେ ସିଧା ସଳଖ ସେଟ୍ରେ ବିଜୟ ହାସଲ କରିଥିଲେ। ୨୦୨୦ରେ ଏପି ଫିମେଲ ଆଥ୍ଲେଟ ଅଫ୍ ଦି ଇୟର ବିବେଚିତ ହୋଇଥିବା ଓସାକା ଏଥିସହ କ୍ରମାଗତ ୨୧ ମ୍ୟାଚ୍ରେ ବିଜୟୀ ହୋଇଛନ୍ତି ଓ ଏହି ବିଜୟଧାରାକୁ ବଜାୟ ରଖିଛନ୍ତି। ଏହାପୂର୍ବରୁ ଓସାକା ୨୦୧୯ରେ ମଧ୍ୟ ଅଷ୍ଟ୍ରେଲିଆନ ଓପନ୍ ଟାଇଟଲ ହାସଲ କରିଥିଲେ। ସେ ମଧ୍ୟ ୨୦୧୮ ଓ ୨୦୨୦ରେ ୟୁଏସ୍ ଓପନ୍ ଟାଇଟଲ ଜିତିଥିଲେ। ନିଜ ପ୍ରଦର୍ଶନରେ ଓସାକା ଖୁସି ଜାହିର କରିଛନ୍ତି।
ଏହା ପୂର୍ବରୁ ଓସାକା ସେମିଫାଇନାଲରେ ୧୦ ସିଡ୍ ଅଭିଜ୍ଞ ଆମେରିକୀୟ ତାରକା ସେରେନା ଓ୍ବିଲିୟମ୍ସଙ୍କୁ ୬-୩, ୬-୪ ସେଟ୍ରେ ହରାଇ ଫାଇନାଲକୁ ଉଠିଥିଲେ। ସେହିପରି କ୍ୱାର୍ଟରରେ ସେ ଚାଇନିଜ ତାଇପେର ସୁ- ଓ୍ବେଇ ସିଏଙ୍କୁ ୬-୨, ୬-୨ ସେଟ୍ରେ ହରାଇଥିଲେ। ଚତୁର୍ଥ ରାଉଣ୍ଡ ମୁକାବିଲାରେ ଓସାକା ୧୪ତମ ସିଡ୍ ସ୍ପେନ୍ର ଗାର୍ବାଇନ ମୁଗୁରୁଜାଙ୍କୁ ୪-୬, ୬-୪, ୭-୫ ସେଟ୍ରେ ହରାଇଥିଲେ। ସାରା ଟୁର୍ନାମେଣ୍ଟରେ ଓସାକା ଦୃଷ୍ଟାନ୍ତମୂଳକ ପ୍ରଦର୍ଶନ କରିଥିଲେ। ଏଥି ସହିତ ସେ ଭବିଷ୍ୟତର ସୁପରଷ୍ଟାର ବୋଲି ନିଜକୁ ପ୍ରମାଣିତ କରିଛନ୍ତି।
