ମେଲବୋର୍ନ,୨୨।୨(ଏପି): ଅଷ୍ଟ୍ରେଲିଆନ ଓପନ୍ ପୁରୁଷ ଡବଲ୍ସ ମୁକାବିଲାରେ କ୍ରୋଏସିଆର ଇଭାନ ଡୋଡିଗ ଓ ସ୍ଲୋଭାକିଆର ଫିଲିପ୍ ପୋଲାସେକ ଚାମ୍ପିୟନ ହେବାର ଗୌରବ ଅର୍ଜନ କରିଛନ୍ତି। ରବିବାର ଅନୁଷ୍ଠିତ ଫାଇନାଲ ମ୍ୟାଚ୍ରେ ନବମ ସିଡ୍ ମାନ୍ୟତା ପାଇଥିବା ଏହି ଯୋଡି ୬-୩, ୬-୪ ସେଟ୍ରେ ପଞ୍ଚମ ସିଡ୍ ମାନ୍ୟତା ପାଇଥିବା ଆମେରିକାର ରାଜୀବ ରାମ ଓ ୟୁନାଇଟେଡ କିଙ୍ଗ୍ଡମ୍ର ଜୋଏ ସାଲିସ୍ବୁରୀଙ୍କୁ ଅତି ସହଜରେ ହରାଇ ଟାଇଟଲ ଜିତିଛନ୍ତି।
ଏକ କନ୍ୟା ସନ୍ତାନର ପିତା ହେବାର ଠିକ୍ ଗୋଟିଏ ଦିନ ପରେ ୩୫ ବର୍ଷୀୟ ପୋଲାସେକ ଏହି ସଫଳତା ପାଇଛନ୍ତି। ବାମ ଗୋଡରେ ଇଞ୍ଜୁରି କାରଣରୁ ପୋଲାସେକ ୨୦୧୩ରେ ଅବସର ଗ୍ରହଣ କରିଥିଲେ ଓ ୫ବର୍ଷ ଖେଳରୁ ଦୂରେଇ ରହିବା ପରେ ଜୁନିୟର ଖେଳାଳିଙ୍କୁ କୋଚିଂ ଦେଇଥିଲେ। ତେବେ ସେ ୨୦୧୮ରେ ପ୍ରତ୍ୟାବର୍ତ୍ତନ କରିଥିଲେ। ସ୍ଲୋଭାକିଆର ଦ୍ୱିତୀୟ ଖେଳାଳି ଭାବେ ପୋଲାସେକ କୌଣସି ମେଜର ଟାଇଟଲ ଜିତିଛନ୍ତି। ପୂର୍ବରୁ କ୍ରୋଏସିଆର ଡାନିଏଲା ହାଣ୍ଟୁକୋଭା ୪ଟି ଗ୍ରାଣ୍ଡସ୍ଲାମ ମିକ୍ସଡ ଡବଲ୍ସ ଟାଇଟଲ ହାସଲ କରିଥିଲେ। ସେହିପରି ଡୋଡିଗ ଦ୍ୱିତୀୟଥର ପାଇଁ ମେଜର ଟାଇଟଲ ଜିତିଛନ୍ତି। ୨୦୧୫ରେ ଡୋଡିଗ୍ ମାର୍ସେଲୋ ମେଲୋଙ୍କ ସହ ଫ୍ରେଞ୍ଚ୍ ଓପନ ଡବଲ୍ସ ଟାଇଟଲ ଜିତିଥିଲେ।
ରନର୍ସ ଅପ୍ ହୋଇଥିବା ରାଜୀବ ଶନିବାର ମିକ୍ସଡ୍ ଡବଲ୍ସ ଟାଇଟଲ ହାସଲ କରିଥିଲେ। ମିକ୍ସଡ୍ ଡବଲ୍ସ ଇଭେଣ୍ଟରେ ଚେକ୍ ଗଣରାଜ୍ୟର ବାରବୋରା କ୍ରେଜ୍ସିକୋଭା ଓ ରାଜୀବ ଟାଇଟଲ ହାସଲ କରିଥିଲେ। ଶନିବାର ଅନୁଷ୍ଠିତ ଫାଇନାଲ ମ୍ୟାଚ୍ରେ ଷଷ୍ଠ ସିଡ୍ ଏହି ଯୋଡି ୬-୧, ୬-୪ ସେଟ୍ରେ ଅତି ସହଜରେ ସ୍ଥାନୀୟ ଓ୍ବାଇଲ୍ଡ କାର୍ଡ ଯୋଡି ସାମନ୍ଥା ଷ୍ଟୋସୁର ଓ ମାଥ୍ୟୁ ଏବେଡେନଙ୍କୁ ହରାଇ ଚାମ୍ପିୟନ ହୋଇଥିଲେ।
