ମେଲବୋର୍ନ,୧୧।୨: ବର୍ଷର ପ୍ରଥମ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଅଷ୍ଟ୍ରେଲିଆନ ଓପନ୍ ବୁଧବାର ତୃତୀୟ ଦିବସରେ ପହଞ୍ଚିଛି। ପୁରୁଷ ଓ ମହିଳା ସିଙ୍ଗଲ୍ସରେ ସିଡେଡ ଖେଳାଳିମାନେ ଅଗ୍ରଗତି କରିଛନ୍ତି। ପୁରୁଷ ସିଙ୍ଗଲ୍ସରେ ଟପ୍ ସିଡ୍ ନୋଭାକ ଜୋକୋଭିଚ୍ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ଦ୍ୱିତୀୟ ରାଉଣ୍ଡ ମୁକାବିଲାରେ ସେ ଆମେରିକାର ୨୩ ବର୍ଷୀୟ ଖେଳାଳି ଫ୍ରାନ୍ସେସ୍ ଟିଆଫୋଏଙ୍କୁ ମାରିଥନ ୬-୩, ୬-୭, ୭-୬, ୬-୩ ସେଟ୍ରେ ପରାସ୍ତ କରି ଅଗ୍ରଗତି କରିଛନ୍ତି। ଜୋକୋଭିଚ୍ କଡ଼ା ଚ୍ୟାଲେଞ୍ଜର ସମ୍ମୁଖୀନ ହୋଇଥିଲେ ଓ ବିଜୟୀ ହେବା ପାଇଁ ସାଢେ ୩ ଘଣ୍ଟା ସମୟ ନେଇଥିଲେ। ପୂର୍ବରୁ ୨୦୧୭ରେ ଜୋକୋଭିଚ୍ ଏହି ଟୁର୍ନାମେଣ୍ଟରେ ଡେନିସ ଇଷ୍ଟୋମିନଙ୍କଠାରୁ ପରାସ୍ତ ହୋଇଥିଲେ। ତୃତୀୟ ରାଉଣ୍ଡରେ ଜୋକୋଭିଚ୍ ୨୭ତମ ସିଡ୍ ଆମେରିକାର ୨୭ତମ ସିଡ୍ ଖେଳାଳି ଟେଲର ଫ୍ରିଜ୍ଙ୍କୁ ଭେଟିବେ। ସେହିପରି ସୁଇଜରଲାଣ୍ଡର ୧୭ତମ ସିଡ୍ ଖେଳାଳି ଷ୍ଟାନିସ୍ଲାସ ଓ୍ବାରିଙ୍କା ଦ୍ୱିତୀୟ ରାଉଣ୍ଡରେ ହଙ୍ଗେରୀର ମାର୍ଟୋନ ଫୁକୋସୋଭିକ୍ସଙ୍କଠାରୁ ୫-୭, ୧-୬, ୬-୪, ୬-୨, ୬-୭ ମାରାଥନ ସେଟ୍ରେ ପରାସ୍ତ ହୋଇ ବିପର୍ଯ୍ୟୟର ସମ୍ମୁଖୀନ ହୋଇଛନ୍ତି। ୧୪ତମ ସିଡ୍ କାନାଡ଼ାର ମିଲୋସ ରାଓନିକ ୬-୭, ୬-୧, ୬-୧, ୬-୪ ସେଟ୍ରେ ଫ୍ରାନ୍ସର କୋରେଣ୍ଟିନ ମୋଟେଟଙ୍କୁ ପରାସ୍ତ କରି ତୃତୀୟ ରାଉଣ୍ଡକୁ ଉଠିଛନ୍ତି। ଷଷ୍ଠ ସିଡ୍ ଜର୍ମାନୀ ଆଲେକଜାଣ୍ଡର ଜେଭେରେଭ ୭-୫, ୬-୪, ୬-୩ ସେଟ୍ରେ ଆମେରିକୀୟ କ୍ୱାଲିଫାୟର ମାକ୍ସିମ କ୍ରେସିଙ୍କୁ ହରାଇ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ତୃତୀୟ ରାଉଣ୍ଡରେ ଅଷ୍ଟ୍ରିଆର ଡୋମିନିକ ଥିମ ଓ ଅଷ୍ଟ୍ରେଲିଆର ନିକ କିର୍ଗିଅସ୍ ପରସ୍ପରକୁ ଭେଟିବେ। ଦ୍ୱିତୀୟ ରାଉଣ୍ଡରେ ଥିମ୍ ୬-୪,୬-୦, ୬-୨ ସେଟ୍ରେ ଜର୍ମାନୀ ଡୋମିନିକ କୋଏପ୍ଫେରଙ୍କୁ ଓ କିର୍ଗିୟସ ୫-୭, ୬-୪, ୩-୬, ୭-୬, ୬-୪ ସେଟ୍ରେ ଫ୍ରାନ୍ସର ଉଗୋ ହମ୍ବର୍ଟଙ୍କୁ ହରାଇ ଅଗ୍ରଗତି କରିଛନ୍ତି।
ମହିଳା ସିଙ୍ଗଲ୍ସ: ହାଲେପ, ସେରେନାଙ୍କ ଅଗ୍ରଗତି
ମହିଳା ସିଙ୍ଗଲ୍ସ ଇଭେଣ୍ଟରେ ୧୦ ସିଡ୍ ଆମେରିକୀୟ ଅଭିଜ୍ଞ ଖେଳାଳି ସେରେନା ଓ୍ବିଲିୟମ୍ସ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି। ସେରେନା ଦ୍ୱିତୀୟ ରାଉଣ୍ଡ ମୁକାବିଲାରେ ସର୍ବିୟାର ନିନା ଷ୍ଟୋଜାନୋଭିକଙ୍କୁ ୬-୩, ୬-୦ ସେଟ୍ରେ ପରାସ୍ତ କରି ଅଗ୍ରଗତି କରିଛନ୍ତି। ତୃତୀୟ ରାଉଣ୍ଡରେ ସେ ରୁଷିଆର ଆନାଷ୍ଟାସିଆ ପୋଟାପୋଭାଙ୍କୁ ଭେଟିବେ। ପୋଟାଭୋଭା ୬-୨, ୬-୪ ସେଟ୍ରେ ହଙ୍ଗେରୀର ଟିମିଆ ବାବୋସଙ୍କୁ ହରାଇ ଅଗ୍ରଗତି କରିଛନ୍ତି। ସେହିପରି ରୋମାନିଆର ଦ୍ୱିତୀୟ ସିଡ୍ ଖେଳାଳି ସିମୋନା ହାଲେପ ୪-୬, ୬-୪, ୭-୫ ସେଟ୍ରେ ଅଷ୍ଟ୍ରେଲିଆର ଟୋମଲଜାନୋଭିକଙ୍କୁ ହରାଇ ତୃତୀୟ ରାଉଣ୍ଡରେ ପ୍ରବେଶ କରିଛନ୍ତି।
