ଗ୍ରସ୍ ଆଇଲେଟ୍,୧୫ା୬: ଟି୨୦ ବିଶ୍ୱକପ୍ରେ ରବିବାର ସ୍କଟ୍ଲାଣ୍ଡକୁ ୫ ଉଇକେଟରେ ପରାସ୍ତ କରିଛି ଅଷ୍ଟ୍ରେଲିଆ। ଏହି ପରାଜୟ ସହିତ ସ୍କଟ୍ଲାଣ୍ଡ ଟୁର୍ନାମେଣ୍ଟରୁ ବିଦାୟ ନେଇଥିବା ବେଳେ ଇଂଲଣ୍ଡ ସୁପର୍-୮ରେ ପ୍ରବେଶ କରିଛି। ପ୍ରଥମେ ବ୍ୟାଟିଂ କରି ସ୍କଟ୍ଲାଣ୍ଡ ୫ ଉଇକେଟରେ ୧୮୦ ରନ୍ କରିଥିଲା। ଜବାବରେ ୧୯.୪ ଓଭରରେ ଅଷ୍ଟ୍ରେଲିଆ ୫ ଉଇକେଟରେ ୧୮୬ ରନ୍ କରିଥିଲା।
ଅଷ୍ଟ୍ରେଲିଆ ଟସ୍ ଜିତି ପ୍ରଥମେ ବୋଲିଂ କରିଥିଲା। ଓପନର ଜର୍ଜ ମୁନ୍ସୀ (୩୫) ରନ୍ କରିଥିବା ବେଳେ ଦଳୀୟ ସ୍କୋର ୩ ରନ୍ରେ ଅନ୍ୟତମ ଓପନର ମାଇକେଲ୍ ଜୋନ୍ସ ମାତ୍ର ୨ ରନ୍ କରି ଆଉଟ ହୋଇଥିଲେ। ତେବେ ମୁନ୍ସୀ ଓ ବ୍ରେଣ୍ଡନ ମ୍ୟାକମୁଲେନ୍(୬୦) ଦ୍ୱିତୀୟ ଉଇକେଟରେ ୮୯ ରନ୍ ଯୋଡିଥିଲେ। ୯ମ ଓଭରରେ ପାର୍ଟ ଟାଇମର ଗ୍ଲେନ୍ ମ୍ୟାକ୍ସଓ୍ବେଲ ଏହି ଯୋଡି ଭାଙ୍ଗିଥିଲେ।
ମୁନ୍ସୀ ୨୩ ବଲ୍ ଖେଳି ୨ ଚୌକା ଓ ୩ ଛକା ସହ ୩୫ ରନ୍ କରିଥିଲେ। ଅନ୍ୟପକ୍ଷରେ ମ୍ୟାକ୍ମୁଲେନ୍ ୩୪ ବଲ୍ ଖେଳି ୨ ଚୌକା ଓ ୬ ଛକା ମାରିଥିଲେ। ଶେଷ ଆଡକୁ ଅଧିନାୟକ ରିଚି ବାରିଙ୍ଗଟନ୍ ୩୧ ବଲ୍ ଖେଳି ଅପରାଜିତ ୪୨ ରନ୍ କରିବାରୁ ସ୍କଟ୍ଲାଣ୍ଡ ଲଢୁଆ ୧୮୦ ରନ୍ କରିଥିଲା। ଅଷ୍ଟ୍ରେଲିଆ ପକ୍ଷରୁ ଗ୍ଲେନ୍ ମ୍ୟାକ୍ସଓ୍ବେଲ ୨, ଆଷ୍ଟନ ଆଗର, ନାଥନ ଏଲିସ ଓ ଆଡାମ ଜାମ୍ପା ଗୋଟିଏ ଲେଖାଏ ଉଇକେଟ ନେଇଥିଲେ।
୧୮୧ ରନ୍ର ପିଛା କରୁଥିବା ଅଷ୍ଟ୍ରେଲିଆ ୬୦ ରନ୍ରେ ୩ ଉଇକେଟ ହରାଇଥିଲା। ଅନ୍ତିମ ୩ ଓଭରରୁ ୨୫ ରନ୍ ଆବଶ୍ୟକ ଥିବା ବେଳେ ଟିମ୍ ଡେଭିଡ୍ ୧୪ ବଲ୍ରୁ ୨୪ ରନ୍ କରି ଦଳକୁ ବିଜୟୀ କରିଥିଲେ। ସ୍କଟ୍ଲାଣ୍ଡ ପକ୍ଷରୁ ସଫ୍ୟାନ ଶରିଫ୍ ଓ ମାର୍କ ଓ୍ବାଟ୍ ୨ଟି ଲେଖାଏ, ବ୍ରାଡ୍ ହ୍ବିଲ ଗୋଟିଏ ଉଇକେଟ ନେଇଥିଲେ। ଅଷ୍ଟ୍ରେଲିଆ ଓ ଇଂଲଣ୍ଡ ପରି ଦଳକୁ କଡା ଟକ୍କର ଦେଇଥିବା ସ୍କଟ୍ଲାଣ୍ଡ ଏହି ପରାଜୟ ସହ ବିଦାୟ ନେଇଛି। ଇଂଲଣ୍ଡ ଓ ସ୍କଟ୍ଲାଣ୍ଡ ସମାନ ୫ ପଏଣ୍ଟ ଲେଖାଏ ପାଇଥିବା ବେଳେ ରନ୍ ରେଟ୍ ବ୍ୟବଧାନରେ ଆଗୁଆ ରହି ଇଂଲଣ୍ଡ ସୁପର-୮ରେ ସ୍ଥାନ ପାଇଛି।
