ଭୁବନେଶ୍ୱର,୨୬ା୫(ବ୍ୟୁରୋ): ପ୍ରତ୍ୟେକ ଜିଲାରେ ଅଡିଟୋରିୟମ୍ ଏବଂ କଲ୍ୟାଣ ମଣ୍ଡପ ନିର୍ମାଣ ହେବ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ବାରା ବିଭାଗର କାର୍ଯ୍ୟ ସମୀକ୍ଷା ପରେ ଗୁରୁବାର ଖବରଦତା ସମ୍ମିଳନୀରେ ଏହି ସୂଚନା ଦେଇଛନ୍ତି ଯୋଜନା ଓ ସଂଯୋଜନା ମନ୍ତ୍ରୀ ରାଜେନ୍ଦ୍ର ଢୋଲକିଆ।
ମନ୍ତ୍ରୀ କହିଛନ୍ତି ଯେ, ପଶ୍ଚିମ ଓଡ଼ିଶା ବିକାଶ ପରିଷଦର ବଜେଟ୍ ୩୨୫ କୋଟିକୁ ବୃଦ୍ଧି ହୋଇଥିଲା । ବିଜୁ କେବିକେ ଯୋଜନାରେ ୮ ଜିଲାର ଭିତ୍ତିଭୂମି ବିକାଶ ପାଇଁ ୧୯୪୦ କୋଟି ଟଙ୍କା ଆବଣ୍ଟନ ହୋଇଛି । ସ୍ବାଭିମାନ ଅଞ୍ଚଳର ବିକାଶ ପାଇଁ ସେତୁ ଯୋଜନାରେ ୨୩୦ କୋଟି ଖର୍ଚ୍ଚ ହୋଇଛି। ରାଜ୍ୟର ଖଣି ପ୍ରଭାବିତ ଅଞ୍ଚଳର ବିକାଶ ପାଇଁ ଜିଲା ଖଣିଜ ପାଣ୍ଠିରୁ ୧୨ ହଜାର ୭୯୨ କୋଟି ଖର୍ଚ୍ଚ ହୋଇଛି ।
ମୁଖ୍ୟମନ୍ତ୍ରୀ ସ୍ବତନ୍ତ୍ର ସହାୟତା ଯୋଜନାରେ ବିଭିନ୍ନ ଜିଲାରେ ଇ-ଲାଇବ୍ରେରୀ, ଆଇଟି ଲ୍ୟାବ୍, ବିଜ୍ଞାନ ଲ୍ୟାବ୍ ଓ ସ୍ମାର୍ଟ କ୍ଲାସରୁମ୍ ଭଳି କାର୍ଯ୍ୟକ୍ରମ ହାତକୁ ନିଆଯାଇଛି।
୫-ଟି ଶାସନ ପଦ୍ଧତିରେ ଓଡ଼ିଶା ସରକାର ଏକ ନୂତନ ଓଡ଼ିଶା,ସଶକ୍ତ ଓଡ଼ିଶାଗଠନ ନିମନ୍ତେ ପ୍ରତିବଦ୍ଧ। ଓଡ଼ିଶାର ବିଭିନ୍ନ ଅଞ୍ଚଳର ବିକାଶମୂଳକ ଆବଶ୍ୟକତାକୁ ଉପଲବ୍ଧି କରି ସରକାର ଅଞ୍ଚଳ ଉନ୍ନୟନଭିତ୍ତିକ କାର୍ଯ୍ୟକ୍ରମ ଆରମ୍ଭ କରିଛନ୍ତି; ଯେଉଁଥିରେ ବିଭିନ୍ନ ପ୍ରକଳ୍ପକୁ ରୂପାୟନ କରିବା ପାଇଁ ବିହିତ ପଦକ୍ଷେପ ନିଆଯାଇଛି।
ରାଜ୍ୟର ମୁଣ୍ଡପିଛା ଆୟ ଏବଂ ଜାତୀୟ ମୁଣ୍ଡପିଛା ଆୟ ମଧ୍ୟରେ ବ୍ୟବଧାନରେ ଯଥେଷ୍ଟ ହ୍ରାସ ଘଟୁଛି। ପଶ୍ଚିମ ଓଡ଼ିଶାର ବିକାଶ ପାଇଁ ରାଜ୍ୟ ସରକାର ପଶ୍ଚିମ ଓଡ଼ିଶା ବିକାଶ ପରିଷଦର ବାର୍ଷିକ ବଜେଟ୍କୁ ୨୦୦୮-୦୯ ଆର୍ଥିକ ବର୍ଷରେ ୧୦୦ କୋଟିରୁ ୨୦୨୧-୨୨ ଆର୍ଥିକ ବର୍ଷରେ ୨୦୦ କୋଟି ଟଙ୍କାକୁ ବୃଦ୍ଧି କରିଥିବାବେଳେ ବର୍ତ୍ତମାନ ୨୦୨୩-୨୪ ଆର୍ଥିକ ବର୍ଷରେ ୩୨୫ କୋଟି ଟଙ୍କାକୁ ବୃଦ୍ଧି କରିଛନ୍ତି । ପରିଷଦର ପାଣ୍ଠି ହସ୍ତତନ୍ତ ମଲ୍, ମିଲେଟ ପ୍ରକ୍ରିୟାକରଣ ୟୁନିଟ୍ ଏବଂ କମ୍ୟୁନିଟି ସେଣ୍ଟର-ତଥା-କଲ୍ୟାଣ ମଣ୍ଡପ ଭଳି ଅତ୍ୟାବଶ୍ୟକ ଗୋଷ୍ଠୀ ଭିତ୍ତିଭୂମି ନିର୍ମାଣରେ ଉପଯୋଗ କରାଯାଉଛି। ପଶ୍ଚିମ ଓଡ଼ିଶା ବିକାଶ ପରିଷଦ ପାଣ୍ଠି ମାଧ୍ୟମରେ ମୁଖ୍ୟମନ୍ତ୍ରୀ ସଭାଘର ଅଧୀନରେ ୧୬୦୦ଟି କମ୍ୟୁନିଟି ସେଣ୍ଟର ତଥା କଲ୍ୟାଣ ମଣ୍ଡପ ନିର୍ମାଣ କରାଯାଇ, ବିଜୁ କେବିକେ ଯୋଜନାରେ ୨୦୦୭-୦୮ ମସିହାରୁ ବାର୍ଷିକ ୧୨୦ କୋଟି ଟଙ୍କା ପ୍ରଦାନ କରାଯାଉଅଛି । ୮ଟିି କେବିକେ ଜିଲାର ଭିତ୍ତିଭୂମିର ବିକାଶ ନିମନ୍ତେ ୨୦୨୨-୨୩ ଆର୍ଥିକ ବର୍ଷ ସୁଦ୍ଧା ମୋଟ ୧୯୪୦ କୋଟି ଟଙ୍କା ଆବଣ୍ଟନ କରାଯାଇଥିବା ଢୋଲକିଆ କହିଛନ୍ତି। ରାଜ୍ୟ ସରକାର ବିଜୁ କନ୍ଧମାଳ ଓ ଗଜପତି ଯୋଜନା ମାଧ୍ୟମରେ ୨୦୨୨-୨୩ ଆର୍ଥିକବର୍ଷ ପର୍ଯ୍ୟନ୍ତ ୪୦୦ କୋଟି ଟଙ୍କା ଆବଣ୍ଟନ କରିଛନ୍ତି। ସରକାର ଏକ ସଶକ୍ତ ଓଡ଼ିଶା ଗଠନ ଦିଗରେ ଆଗେଇ ଚାଲିଥିବା ବେଳେ କେହି ବି ଯେମିତି ପଛରେ ନ ରୁହନ୍ତି ସେଥିପାଇଁ ଯତ୍ନବାନ ବୋଲି ମନ୍ତ୍ରୀ କହିଛନ୍ତି।
