ନୂଆଦିଲ୍ଲୀ,୨ା୯: ପୂର୍ବ ଲଦାଖର ପାଙ୍ଗୋଙ୍ଗ୍ ହ୍ରଦରେ ସ୍ଥିତାବସ୍ଥା ବଦଳାଇବା ପାଇଁ ସାମରିକ ଉତ୍ତେଜନା ସୃଷ୍ଟିକାରୀ ଉଦ୍ୟମ କରିଥିଲା। ଚାଇନାର ଏପରି କାର୍ଯ୍ୟ ଦ୍ୱିପାକ୍ଷିକ ଚୁକ୍ତିର ଉଲ୍ଲଂଘନ ବୋଲି ଭାରତର ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ କୁହାଯାଇଛି।
ଅଗଷ୍ଟ ୨୯-୩୦ ରାତିରେ ଭାରତ ଓ ଚାଇନା ସୈନ୍ୟଙ୍କ ମଧ୍ୟରେ ହୋଇଥିବା ସଂଘର୍ଷକୁ ନେଇ ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ଏକ ଅନୁଷ୍ଠାନିକ ବିବୃତି ଜାରି କରାଯାଇଛି। ମନ୍ତ୍ରଣାଳୟ ମୁଖପାତ୍ର ଅନୁରାଗ ଶ୍ରୀବାସ୍ତବ କହିଛନ୍ତି, ପାଙ୍ଗୋଙ୍ଗ୍ ହ୍ରଦର ସାଉଥ୍ ବ୍ୟାଙ୍କ୍ ଏରିଆରେ ସ୍ଥିତାବସ୍ଥା ପରିବର୍ତ୍ତନ ଲାଗି ଚାଇନାର ପିପୁଲ୍ସ ଲିବରେଶନ ଆର୍ମି (ପିଏଲ୍ଏ) ଉଦ୍ୟମ କରିଥିଲା। ଭାରତ ଓ ଚାଇନାର ବହିର୍ବ୍ୟାପାର ମନ୍ତ୍ରୀ ତଥା ସ୍ବତନ୍ତ୍ର ପ୍ରତିନିଧିଙ୍କ ମଧ୍ୟରେ ହୋଇଥିବା ସହମତିକୁ ଏହା ସମ୍ପୂର୍ଣ୍ଣ ଭାବେ ଅସମ୍ମାନ। ତେବେ ଚାଇନାର ଏପରି କାର୍ଯ୍ୟକୁ ନେଇ ପ୍ରକୃତ ନିୟନ୍ତ୍ରଣରେଖା (ଏଲ୍ଏସି) ସଂଲଗ୍ନ ଅଞ୍ଚଳରେ ଭାରତୀୟ ଯବାନମାନେ ଏହାର ଉତ୍ତେଜନା ସୃଷ୍ଟିକାରୀ କାର୍ଯ୍ୟର କଡ଼ା ଜବାବ ଦେଇଥିଲେ। ଭାରତର ସାର୍ବଭୌମତ୍ୱ ଓ କ୍ଷେତ୍ରୀୟ ଅଖଣ୍ଡତାର ସୁରକ୍ଷା ପାଇଁ ସେନା ଆମତ୍ରକ୍ଷାମୂଳକ ଉପଯୁକ୍ତ ପଦକ୍ଷେପ ନେଇଥିଲା। ଉଭୟ କୂଟନୈତିକ ଓ ସାମରିକ ଚ୍ୟାନେଲରେ ଚାଇନା ଆଗରେ ଆମେ ଏହି ପ୍ରସଙ୍ଗ ଉଠାଇଛୁ। ଏହାସହ ପିଏଲ୍ଏ ସୈନ୍ୟଙ୍କୁ ନିୟନ୍ତ୍ରଣରେ ରଖିବା ପାଇଁ ଅନୁରୋଧ କରିଛୁ।
ଚାଇନାକୁ ସବୁ କ୍ଷେତ୍ରରେ ବିରୋଧ କରିବ ଆମେରିକା
ଚାଇନା ସବୁଠି ଲଢ଼େଇ କରିବାକୁ ଆଗଭର ହେଉଛି। ତେଣୁ ଏହାକୁ ଗଲଓ୍ବାନ ଉପତ୍ୟକାରେ ସାର୍ବଭୌମତ୍ୱ ଜାହିର କରିବା ସମେତ ସମସ୍ତ କ୍ଷେତ୍ରରେ ବିରୋଧ କରିବା ଓ୍ବାଶିଂଟନର ରଣନୀତି ବୋଲି ଆମେରିକାର ଜଣେ ବରିଷ୍ଠ କୂଟନୀତିଜ୍ଞ ପ୍ରକାଶ କରିଛନ୍ତି। ଭାରତ-ଆମେରିକା ତୃତୀୟ ଲିଡରଶିପ୍ ସମିଟରେ ସୋମବାର ଆମେରିକାର ପରରାଷ୍ଟ୍ର ଉପସଚିବ ଷ୍ଟିଫେନ୍ ବିଗୁନ୍ କହିଛନ୍ତି, ଚାଇନା ଯଥାର୍ଥ ସନ୍ତୁଳନ ବଜାୟ ରଖି ପାରସ୍ପରିକ ସ୍ବାର୍ଥକୁ ସମ୍ମାନ ଦେବା ପରିବର୍ତ୍ତେ ଟେକ୍ନୋଲୋଜି ଚୋରିରୁ ନେଇ ଜାତୀୟ ସାର୍ବଭୌମତ୍ୱ ଓ ଅନ୍ୟ ଦେଶଗୁଡ଼ିକର ଜଳ ଉପରେ ଅଧିକାର ସାବ୍ୟସ୍ତର ସୁଯୋଗକୁ ହାତଛଡ଼ା କରି ନ ଥିବା ଜଣାପଡ଼ିଛି। ଏହି କାରଣରୁ ଚାଇନାକୁ ସମସ୍ତ କ୍ଷେତ୍ରରେ ପଛକୁ ଠେଲିବା ହେଉଛି ଆମେରିକାର ରଣନୀତି।
‘ସୀମା ନିର୍ଦ୍ଧାରଣ ହୋଇ ନ ଥିବାରୁ ସମସ୍ୟା ଲାଗିରହିବ’
ଭାରତ-ଚାଇନା ମଧ୍ୟରେ ସୀମା ନିର୍ଦ୍ଧାରଣ ହୋଇ ନାହିଁ। ତେଣୁ ଦୁଇଦେଶ ମଧ୍ୟରେ ସବୁବେଳେ ସୀମା ବିବାଦ ଲାଗିରହିବ। ମତଭେଦକୁ ସଂଘର୍ଷରେ ପରିଣତ ନ କରିବା ପାଇଁ ଉଭୟ ଦେଶର ନେତାଙ୍କ ମଧ୍ୟରେ ହୋଇଥିବା ସହମତିକୁ ନୂଆଦିଲ୍ଲୀ ଓ ବେଜିଂ କାର୍ଯ୍ୟକାରୀ କରିବା ଉଚିତ ବୋଲି ମଙ୍ଗଳବାର ଚାଇନା ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ କୁହାଯାଇଛି। ୟୁରୋପ ଗସ୍ତରେ ଥିବା ମନ୍ତ୍ରଣାଳୟ ମୁଖପାତ୍ର ଓ୍ବାଙ୍ଗ୍ ୟି କହିଛନ୍ତି, ଭାରତ ସହ ଆଲୋଚନା ମାଧ୍ୟମରେ ସବୁ ପ୍ରକାର ବିବାଦର ସମାଧାନ ପାଇଁ ଚାଇନା ପ୍ରସ୍ତୁତ। ୭୦ ବର୍ଷ ମଧ୍ୟରେ ଚାଇନା ୧ ଇଞ୍ଚ ମଧ୍ୟ ବିଦେଶୀ ଜମି ଦଖଲ କରିନାହିଁ।
