ଭୁବନେଶ୍ୱର,୧୨।୧୦(ବ୍ୟୁରୋ): ଭୁବନେଶ୍ୱର ଶହୀଦନଗର ଥାନା ଅନ୍ତର୍ଗତ ଆଚାର୍ଯ୍ୟ ବିହାର ଛକରେ ମଙ୍ଗଳବାର ରାତି ପ୍ରାୟ ୧୧ଟା୧୫ ବେଳେ ହାଇଡ୍ରାମା ଦେଖିବାକୁ ମିଳିଛି। ରାସ୍ତା ମଝିରେ ଶୋଇ ଜଣେ ମହିଳା ଆତ୍ମହତ୍ୟା ଉଦ୍ୟମ କରିଛନ୍ତି। ରାଜରାସ୍ତାରେ ମହିଳା ଜଣକ ପ୍ରାୟ ୧୫ ମିନିଟ୍ ଶୋଇ ରହିଥିଲେ। ସୌଭାଗ୍ୟବଶତଃ କୌଣସି ଦୁର୍ଘଟଣାର ଶିକାର ହୋଇନାହାନ୍ତି। ମହିଳାଙ୍କ ନାଁ ରାଧା ହୋଇଥିବା ବେଳେ ତାଙ୍କ ଘର ଲକ୍ଷ୍ମୀସାଗର ଥାନା ଅଞ୍ଚଳରେ ବୋଲି ସୂଚନା ମିଳିଛି। ରାସ୍ତାରେ ଯାଉଥିବା ଲୋକମାନେ ତାଙ୍କୁ ଉଦ୍ଧାର କରିଥିଲେ। କିଛି ସମୟ ପାଇଁ ହାଇଡ୍ରାମା ଦେଖିବାକୁ ମିଳିଥିଲା। ଯିଏ ପଚାରୁଥିଲେ ରାଧା ପ୍ରେମ ପ୍ରତାରଣାର କାହାଣୀ କହୁଥିଲେ। ଆଉ କେହି କେହି ତାଙ୍କୁ ପାଗଳୀ ବୋଲି ଭାବି ପଳାଇ ଯାଉଥିଲେ। ଖବର ପାଇ ପୋଲିସ ପହଞ୍ଚି ତାଙ୍କୁ ଥାନାକୁ ନେଇ ଅଧିକ ପଚରାଉଚରା କରୁଛି।
ରାଧାଙ୍କ କହିବା ଅନୁଯାୟୀ, ହଂସପାଳ ନିକଟ ବରିମୁଣ୍ଡ ଅଞ୍ଚଳର ବ୍ରାହ୍ମଣ ସମ୍ପ୍ରଦାୟର ବିଷ୍ଣୁ ନାମକ ଜଣେ ଯୁବକଙ୍କ ସହ ତାଙ୍କର ୪ ବର୍ଷ ହେଲା ପ୍ରେମ ସମ୍ପର୍କ ଗଢ଼ି ଉଠିଥିଲା। ୧୫ ଦିନ ହେଲା ସେ ଘର ସଂସାର ଛାଡ଼ି ଉକ୍ତ ଯୁବକଙ୍କ ସହ ପଳାଇ ଯାଇଥିଲେ। ସେଦିନଠାରୁ ସେ ଗୋଟିଏ ଶାଢ଼ି ପିନ୍ଧି ରହିଛନ୍ତି। ଉକ୍ତ ଯୁବକ ମଙ୍ଗଳବାର ତାଙ୍କୁ ଜୟଦେବ ବିହାର ଛକରେ ଛାଡ଼ି ପଳାଇ ଯାଇଛନ୍ତି। ତେଣୁ ଆତ୍ମହତ୍ୟା କରିବାକୁ ନିଷ୍ପତ୍ତି ନେଇଥିଲେ ବୋଲି ରାଧା କହିଛନ୍ତି।
