ମାହାଙ୍ଗା,୨୮ା୬(ସ୍ବ.ପ୍ର.): ମାହାଙ୍ଗା ଥାନା ପୋଡାମରାଇ ପଞ୍ଚାୟତରେ ୨ ନାବାଳକ ପୁଅଙ୍କୁ ଘରେ କବାଟ କିଳି ମା’ଙ୍କୁ ବଳାତ୍କାର ଉଦ୍ୟମ ହୋଇଛି। ଏନେଇ ପୀଡିତା ଶନିବାର ମାହାଙ୍ଗା ଥାନା ଓ ଗଣମାଧ୍ୟମ ସମ୍ମୁଖରେ ଅଭିଯୋଗ କରିଛନ୍ତି। ଅଭିଯୁକ୍ତ ହେଲେ ରାଜକିଶୋର ବେହେରା। ତାଙ୍କ ଘର ଏହି ପଞ୍ଚାୟତରେ ହୋଇଥିବା ବେଳେ କୋରାପୁଟ ଜିଲାରେ ଏକ ସରକାରୀ ବିଦ୍ୟାଳୟରେ ଶିକ୍ଷକ ଭାବେ କାର୍ଯ୍ୟରତ। ସେ ଏହି ପଞ୍ଚାୟତରେ ଥିବା ଜଣେ ସମ୍ପର୍କୀୟ ମାଈଁଙ୍କ ଘରକୁ ଆସିଥିଲେ। ଶୁକ୍ରବାର ରାତିରେ ପୀଡ଼ିିତା ୨ ନାବାଳକ ପୁତ୍ରଙ୍କ ସହ ନିଜ ଘରେ ଶୋଇଥିଲେ। ରାତି ପ୍ରାୟ ୧୦ଟା ୩୦ରେ ଘରେ ସ୍ବାମୀ ନ ଥିବା ସମୟରେ ରାଜକିଶୋର ଶିଡ଼ି ଦେଇ ତାଙ୍କ ଘର ଭିତରକୁ ପଶିଥିଲେ। ମହିଳାଙ୍କ ୨ ପୁତ୍ରଙ୍କୁ ଗୋଟିଏ ଘରେ କବାଟ କିଳି ତାଙ୍କୁ ବଳାତ୍କାର ଉଦ୍ୟମ କରିଥିଲେ। ଏହି ସମୟରେ ସ୍ବାମୀ ଘରକୁ ଫେରି ଅଭିଯୁକ୍ତ ରାଜକିଶୋରଙ୍କୁ ଉଲଗ୍ନ ଅବସ୍ଥାରେ କାବୁ କରିଥିଲେ। ମାତ୍ର କୌଣସିମତେ ସେ ଫେରାର ହୋଇଯାଇଥିଲେ। ପୀଡ଼ିତାଙ୍କ ଅଭିଯୋଗକ୍ରମେ ଥାନାରେ ମାମଲା (ନଂ.୧୩୬/୨୦)ରୁଜୁ ହୋଇଛି। ଏନେଇ ପୋଲିସ ପକ୍ଷରୁ ଅଧିକ ତଦନ୍ତ ଜାରି ରହିଛି।
