ପୁରୁଷୋତ୍ତମପୁର, ୨୬।୬(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ସହରରେ ଏକ ଅଭାବନୀୟ ଘଟଣା ଘଟିଛି। ଜଣେ ମହିଳାଙ୍କୁ ରକ୍ଷିତା ଭାବେ ରଖିଥିବା ଯୁବକ ଅନ୍ୟ ଜଣେ ପୁରୁଷଙ୍କ ସହ ଶାରୀରିକ ସମ୍ପର୍କ ଲାଗି ବାଧ୍ୟ କରିଥିଲେ। ଏଥିରେ ସେ ରାଜି ନ ହେବାରୁ ତାଙ୍କୁ ଏକ କୋଠରିରେ ବନ୍ଦୀ କରି ହତ୍ୟା ଉଦ୍ୟମ କରିଥିବା ଶନିବାର ପୁରୁଷୋତ୍ତମପୁର ଥାନାରେ ଅଭିଯୋଗ ହୋଇଛି। ଏ ନେଇ ଏସ୍ଡିପିଓ ସୂର୍ଯ୍ୟମଣି ପ୍ରଧାନ ଓ ଆଇଆଇସି ପ୍ରିୟରଞ୍ଜନ ଛୋଟରାୟ ନଂ.୩୫୨/୨୨ରେ ମାମଲା ରୁଜୁକରି ୨ ଯୁବକଙ୍କୁ ଥାନାରେ ଅଟକ ରଖି ତଦନ୍ତ ଚଳାଇଛନ୍ତି। ଅଭିଯୁକ୍ତମାନେ ହେଲେ ବ୍ରହ୍ମପୁର ରାମକୃଷ୍ଣ ନଗରର ମହମ୍ମଦ ଲାଇକ ଓ ପୁରୁଷୋତ୍ତମପୁର ନାରାୟଣୀ ଢାବା ହୋଟେଲ ମାଲିକ ଅରୁଣ କୁମାର ନାୟକ।
ମହିଳାଙ୍କ ଏତଲା ଅନୁସାରେ, ଦୀର୍ଘ ୪ ବର୍ଷ ହେଲା ମହମ୍ମଦ ତାଙ୍କୁ ଭଲପାଇ ବ୍ରହ୍ମପୁରରେ ଏକ ଭଡ଼ାଘରେ ସ୍ତ୍ରୀ ଭାବେ ରଖିଛନ୍ତି। ମାତ୍ର ବିବାହ କରିନାହାନ୍ତି। ମହମ୍ମଦ ଜଣେ ରୋଷେୟା ହୋଇଥିବାରୁ ପୁରୁଷୋତ୍ତମପୁର ସହରରେ ଥିବା ଏକ ଢାବାରେ କାର୍ଯ୍ୟ କରୁଛନ୍ତି। ଶୁକ୍ରବାର ରକ୍ଷିତାଙ୍କୁ ପୁରୁଷୋତ୍ତମପୁରରେ ଘର ଭଡ଼ାନେଇ ରହିବା ଲାଗି ଡାକିଥିଲେ। ସେ ଆସିବା ପରେ ହୋଟେଲ ପଛପଟେ ଥିବା ଘରକୁ ନେଇ ବସାଇଥିଲେ ଓ ତାଙ୍କ ହୋଟେଲ ମାଲିକଙ୍କ ସହ ଶାରୀରିକ ସମ୍ପର୍କ ରଖିବାକୁ କହିଥିଲେ। ମହିଳା ଏହାକୁ ମନାକରି ଘର ବାହାରକୁ ଚାଲି ଆସିବାରୁ ଉଭୟେ ମିଶି ଶାରୀରିକ ସମ୍ପର୍କ ଲାଗି ବାଧ୍ୟ କରିଥିଲେ। ମହିଳା ଜଣକ ଏଥିରେ ରାଜି ନ ହେବାରୁ ସେମାନେ ତାଙ୍କୁ ନିର୍ଧୂମ ମାଡ଼ ମାରି ହତ୍ୟା ଉଦ୍ୟମ କରି ପିନ୍ଧିଥିବା ସୁନା ଚେନ୍ ଛିଣ୍ଡାଇ ନେଇ ଯାଇଥିଲେ। ମହିଳା ଜଣଙ୍କ ସେମାନଙ୍କ କବଳରୁ ମୁକୁଳି ମୁଖ୍ୟ ରାସ୍ତାକୁ ଆସି ବସ୍ ଯୋଗେ ବ୍ରହ୍ମପୁର ଯାଇ ରାତିରେ ମହିଳା ଥାନାରେ ଜଣାଇଥିଲେ। ପୋଲିସ ତାଙ୍କ ଅବସ୍ଥା ଦେଖି ଚିକିତ୍ସା କରାଇଥିଲେ। ଘଟଣାଟି ପୁରୁଷୋତ୍ତମପୁର ଥାନା ଅଞ୍ଚଳରେ ହୋଇ ଥିବାରୁ ମହିଳା ଥାନା ପୋଲିସ ପୁରୁଷୋତ୍ତମପୁର ପୋଲିସକୁ ଜଣାଇବା ସହ ମହିଳା ଜଣଙ୍କୁ ଅଭିଯୋଗ କରିବା ଲାଗି ପରାମର୍ଶ ଦେଇଥିଲେ।
