ବାଲେଶ୍ୱର ଅଫିସ, ୨୬।୬: ବାଲେଶ୍ୱର ସଦର ଥାନା ହଳଦୀପଦା ଫାଣ୍ଡି ଅଧୀନ ଜାତୀୟ ରାଜପଥ ପଦ୍ମପୁର ହାଟରେ ଥିବା ଏକ ଏସ୍ବିଆଇ ଏଟିଏମ୍ରୁ ୩ଦୁର୍ବୃତ୍ତ ୩୨ଲକ୍ଷ ୨୬ହଜାର ଟଙ୍କା ଲୁଟି ନେଇଛନ୍ତି। ସିସିଟିଭି ଫୁଟେଜ୍ରୁ ମିଳିଥିବା ତଥ୍ୟ ଅନୁସାରେ ଗତ ଶୁକ୍ରବାର ବିଳମ୍ବିତ ରାତି ୩ଟା ୨୦ମିନିଟ୍ରେ ୩ଜଣ ଦୁର୍ବୃତ୍ତ ଏକ ମୋଟର ସାଇକେଲରେ ଆସି ସେଠାରେ ପହଞ୍ଚିଥିଲେ। ଏଟିଏମ୍ ଭିତରେ ଲାଗିଥିବା କ୍ୟାମେରାରେ ଜଣେ ଦୁର୍ବୃତ୍ତ ସ୍ପ୍ରେ କରିସାରିବା ପରେ ଏଟିଏମ୍କୁ ଗ୍ୟାସକଟର ସାହାଯ୍ୟରେ କାଟି ଭିତରେ ଥିବା ଟଙ୍କାକୁ ଲୁଟ୍ କରିନେଇଥିଲେ। ଶନିବାର ପୂର୍ବାହ୍ନରେ ସ୍ଥାନୀୟ ଲୋକେ ଦେଖିବା ସହ ଘଟଣା ପ୍ରଚାରିତ ହୋଇଥିଲା। ପ୍ରଥମେ ଏସ୍ବିଆଇ ବ୍ୟାଙ୍କର କର୍ମଚାରୀ ସେଠାରେ ପହଞ୍ଚି ଘଟଣା ସମ୍ପର୍କରେ ସଦର ଥାନାକୁ ଜଣାଇଥିଲେ। ସଦର ଥାନା ପୋଲିସର ଏକ ଟିମ୍ ସଦଳବଳେ ଘଟଣାସ୍ଥଳରେ ପହଞ୍ଚତ୍ ପ୍ରାଥମିକ ତଦନ୍ତ ଆରମ୍ଭ କରିଛନ୍ତି। ଘଟଣା ଲେଖାଯିବା ପର୍ଯ୍ୟନ୍ତ କୌଣସି ଦୁର୍ବୃତ୍ତଙ୍କୁ ପୋଲିସ ଗିରଫ କରିପାରି ନ ଥିବା ଜଣାପଡ଼ିଛି।
