ଲକ୍ଷ୍ନୌ,୨୧।୫: ରାଜଧାନୀ ଲକ୍ଷ୍ନୌରୁ ଏକ ଅତ୍ୟନ୍ତ ଚାଞ୍ଚଲ୍ୟକର ତଥା ହୃଦୟବିଦାରକ ଘଟଣା ସାମ୍ନାକୁ ଆସିଛି। ଗୋମତୀନଗର ଏକ୍ସପ୍ରେସର ଏକ ସ୍ଲିପର କୋଚର ବାକ୍ସ ଏବଂ ବ୍ୟାଗ ଭିତରୁ ମିଳିଥିବା ଯୁବତୀଙ୍କ ଖଣ୍ଡବିଖଣ୍ଡିତ ଶବ ମାମଲାରେ ଜିଆରପି (GRP) ଏକ ବଡ଼ ଖୁଲାସା କରିଛି। ଜଣେ ଜନ୍ମକଲା ବାପା ହିଁ ନିଜର ନାବାଳିକା ଝିଅକୁ ଅତି ନିର୍ମମ ଭାବେ ହତ୍ୟା କରି ଶବକୁ ଟୁକୁଡ଼ା ଟୁକୁଡ଼ା କରି କାଟିଥିବା ପୋଲିସ ତଦନ୍ତରୁ ଜଣାପଡ଼ିଛି।
ପୋଲିସ ଅଭିଯୁକ୍ତ ବାପାକୁ ଉତ୍ତର ପ୍ରଦେଶର କୁଶୀନଗରରୁ ଗିରଫ କରିବାରେ ସଫଳ ହୋଇଛି। ଅନ୍ୟ ଜାତିର ପୁଅ ସହ ଝିଅ ମୋବାଇଲରେ କଥା ହେଉଥିବାରୁ ରାଗରେ ବାପା ଏଭଳି କାଣ୍ଡ ଭିଆଇଥିବା ସ୍ବୀକାର କରିଛନ୍ତି।
ଜିଆରପି ପକ୍ଷରୁ ମିଳିଥିବା ସୂଚନା ଅନୁଯାୟୀ, ଅଭିଯୁକ୍ତ ବାପା ପ୍ରଥମେ ଝିଅକୁ ହତ୍ୟା କରିଥିଲେ। ଏହାପରେ ପ୍ରମାଣ ନଷ୍ଟ କରିବା ପାଇଁ ଶବର ମୁଣ୍ଡକୁ କାଟି ନିଜ ଗାଁର ଏକ ପୋଖରୀରେ ଫିଙ୍ଗି ଦେଇଥିଲେ। ଶରୀରର ବାକି ୫ଟି ଅଂଶକୁ ବସ୍ତାରେ ଭରି ଏକ ବାକ୍ସ ଏବଂ ବ୍ୟାଗରେ ପ୍ୟାକ କରିଥିଲେ। ଏହାପରେ ସେ ସେହି ବ୍ୟାଗ ଓ ବାକ୍ସକୁ ନେଇ ଛପ୍ରା-ଗୋମତୀନଗର ଏକ୍ସପ୍ରେସର ସ୍ଲିପର କୋଚରେ ରଖି ଫେରାର୍ ହୋଇଯାଇଥିଲେ।
ଲକ୍ଷ୍ନୌର ଚାରବାଗ ଷ୍ଟେଶନରେ ଯେତେବେଳେ ଟ୍ରେନ ବଗିରୁ ଏହି ରକ୍ତଭିଜା ବାକ୍ସ ଓ ବ୍ୟାଗ ମିଳିଥିଲା, ସେତେବେଳେ ସାରା ଅଞ୍ଚଳରେ କୋକୁଆଭୟ ସୃଷ୍ଟି ହୋଇଥିଲା। ଶବର ମୁଣ୍ଡ ନଥିବାରୁ ମୃତଦେହ ଚିହ୍ନଟ କରିବା ପୋଲିସ ପାଇଁ ସବୁଠାରୁ ବଡ଼ ଆହୱାନ ଥିଲା। କିନ୍ତୁ ଜିଆରପି ରେଳ ଷ୍ଟେଶନଗୁଡ଼ିକର ସିସିଟିଭି (CCTV) ଫୁଟେଜ ଯାଞ୍ଚ କରିବା ପରେ ଜଣେ ସନ୍ଦିଗ୍ଧ ବ୍ୟକ୍ତିଙ୍କୁ ଚିହ୍ନଟ କରିଥିଲା।
ତଦନ୍ତ ପ୍ରକ୍ରିୟା ଆଗକୁ ବଢ଼ିବା ପରେ ଜଣାପଡ଼ିଥିଲା ଯେ, ଅଭିଯୁକ୍ତ ହେଉଛି କୁଶୀନଗରର ସେବରହୀ ଥାନା ଅନ୍ତର୍ଗତ ଜୟପୁର ଗାଁର ବିଗନ ଅନସାରୀ। ପୋଲିସ ତାକୁ ହେପାଜତକୁ ନେଇ ପଚରାଉଚରା କରିବା ପରେ ସେ ନିଜର ଅପରାଧ ସ୍ବୀକାର କରିଛନ୍ତି। ମୃତ ନାବାଳିକା ଜଣକ ହେଉଛନ୍ତି ବିଗନଙ୍କ ଝିଅ ଶବ୍ବା, ଯିଏକି ଦ୍ୱାଦଶ ଶ୍ରେଣୀର ଛାତ୍ରୀ ଥିଲେ।
ପୋଲିସ ପଚରାଉଚରା ବେଳେ ଅଭିଯୁକ୍ତ ବିଗନ ଅନସାରୀ କହିଛନ୍ତି ଯେ, ଝିଅ ଶବ୍ବା ଜଣେ ହିନ୍ଦୁ ଯୁବକ ସହିତ ଲଗାତାର ଫୋନରେ କଥା ହେଉଥିଲା। ବିଗନ ଏହାକୁ ବିରୋଧ କରିବା ସହ ଝିଅକୁ ବାରମ୍ବାର ବାରଣ କରିଥିଲେ। କିନ୍ତୁ ଶବ୍ବା କାହା କଥା ନଶୁଣି ସେହି ଯୁବକଙ୍କ ସହ ଯୋଗାଯୋଗ ଜାରି ରଖିଥିଲେ।
ପୋଲିସ କହିଛି ଯେ ବିଗନର ଅନ୍ୟ ଦୁଇଟି ଝିଅ ପୂର୍ବରୁ ନିଜ ପସନ୍ଦରେ ପ୍ରେମ ବିବାହ କରିସାରିଥିଲେ। ଏଥିପାଇଁ ବିଗନ ସମାଜରେ ନିଜର ପ୍ରତିଷ୍ଠା ହରାଇଥିବା ଭାବୁଥିଲା। ଶବ୍ବା ମଧ୍ୟ ସେହିଭଳି କିଛି ପଦକ୍ଷେପ ନେଇପାରେ ବୋଲି ସେ ଆଶଙ୍କା କରୁଥିଲେ। ଏହି କ୍ରୋଧ ଏବଂ ସନ୍ଦେହରେ ଅନ୍ଧ ହୋଇ ସେ ନିଜ ସାନ ଝିଅକୁ ଦୁନିଆରୁ ଚିରଦିନ ପାଇଁ ବିଦାୟ ଦେବାକୁ ଏକ ଭୟଙ୍କର ଷଡ଼ଯନ୍ତ୍ର ରଚିଥିଲେ ।
ବର୍ତ୍ତମାନ ପୋଲିସ ଅଭିଯୁକ୍ତ ବିଗନ ଅନସାରୀକୁ କୋର୍ଟ ଚାଲାଣ କରିବା ସହ ଝିଅର କଟାମୁଣ୍ଡକୁ ଉଦ୍ଧାର କରିବା ପାଇଁ ସ୍ଥାନୀୟ ପୋଖରୀରେ ସର୍ଚ୍ଚ ଅପରେଶନ ଜାରି ରଖିଛି। ଏହି ଘଟଣା ସ୍ଥାନୀୟ ଅଞ୍ଚଳରେ ତୀବ୍ର ଆଲୋଡ଼ନ ସୃଷ୍ଟି କରିଛି।
