ଭୁବନେଶ୍ୱର,୧ା୧୧(ବ୍ୟୁରୋ): ଚଳିତ ମାସ ୨୧ କିମ୍ବା ୨୩ ତାରିଖରେ ବିଧାନସଭାର ଶୀତ ଅଧିବେଶନ ଆରମ୍ଭ ହେବ। ଏ ନେଇ ବିଧାନସଭା ସଚିବାଳୟ ପକ୍ଷରୁ ରାଜ୍ୟ ସରକାରଙ୍କ ସଂସଦୀୟ ବ୍ୟାପାର ବିଭାଗକୁ ପ୍ରସ୍ତାବ ଦିଆଯାଇଛି। ବିଭାଗ ପକ୍ଷରୁ ଆସନ୍ତା ଦିନେ ଦୁଇଦିନ ମଧ୍ୟରେ ଉକ୍ତ ପ୍ରସ୍ତାବ ରାଜ୍ୟପାଳଙ୍କ ଅନୁମୋଦନ ପାଇଁ ପଠାଯିବ। ପ୍ରସ୍ତାବ ଅନୁମୋଦନ ପରେ ବିଧାନସଭା ସଚିବାଳୟ ପକ୍ଷରୁ ଅଧିବେଶନ ସମ୍ପର୍କରେ ଚୂଡ଼ାନ୍ତ ବିଜ୍ଞପ୍ତି ପ୍ରକାଶ କରାଯିବ। ତେବେ ଆସନ୍ତା ଅଧିବେଶନ ସ୍ବାଭାବିକ ହେବ ନା ପୂର୍ବଭଳି କୋଭିଡ୍ କଟକଣାରେ ଚାଲିବ, ତାହା ତାରିଖ ଘୋଷଣା ପରେ ଅନୁଷ୍ଠିତ ସର୍ବଦଳୀୟ ବୈଠକରେ ହିଁ ଜଣାପଡ଼ିବ। କୋଭିଡ୍ କଟକଣା ହଟିଯାଇଥିବାରୁ ପୂର୍ବଭଳି ବିଧାୟକମାନଙ୍କୁ ନିଜ
ସିଟ୍ରେ ବସିବାକୁ ଅନୁମତି ଦେବାକୁ ବିରୋଧୀ ଦଳ ସଦସ୍ୟମାନେ ବିଧାନସଭାରେ ବହୁବାର ଦାବି କରିଛନ୍ତି। ତେବେ ଏହି ଦାବିକୁ ବିଧାନସଭା ବାଚସ୍ପତି ଗ୍ରହଣ କରିନାହାନ୍ତି। ଚଳିତଥର ବାଚସ୍ପତି କି ନିଷ୍ପତ୍ତି ନେଉଛନ୍ତି ତାହା ତାରିଖ ଘୋଷଣା ପରେ ହିଁ ସ୍ପଷ୍ଟ ହେବ।
