ଗୁଆହାଟୀ,୧୦।୭: ଫିଲ୍ମ କାଳୀ ପୋଷ୍ଟରକୁ ନେଇ ଦେଶବ୍ୟାପୀ ଅସନ୍ତୋଷ ମଧ୍ୟରେ ଆସାମର ନାଗାଓଁରେ ପଥପ୍ରାନ୍ତ ନାଟକକୁ ନେଇ ଏକ ନୂଆ ବିବାଦ ସୃଷ୍ଟି ହୋଇଛି। ପଥପ୍ରାନ୍ତ ନାଟକରେ ଭଗବାନ ଶିବଙ୍କ ଭୂମିକା ଗ୍ରହଣ କରିଥିବା ବ୍ୟକ୍ତିଙ୍କୁ ଧାର୍ମିକ ଭାବନାକୁ ଆଘାତ ଦେବା ଅଭିଯୋଗରେ ଗିରଫ କରାଯାଇଛି।
ଗିରଫ ବ୍ୟକ୍ତି ଜଣକ ଭଗବାନ ଶିବଙ୍କ ବେଶଧାରଣ କରି ଇନ୍ଧନ ମୂଲ୍ୟ ବୃଦ୍ଧିକୁ ବିରୋଧ କରିଥିଲେ। ଭିଏଚପି ଏବଂ ବଜରଙ୍ଗ ଦଳର ଅଭିଯୋଗକୁ ଭିତ୍ତି କରି ତାଙ୍କୁ ଗିରଫ କରିଥିଲା। ତେବେ ପରେ ତାଙ୍କୁ ଜାମିନ ମିଳିଥିଲା।
ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ମଧ୍ୟ ଏହି ପ୍ରସଙ୍ଗରେ ପ୍ରତିକ୍ରିୟା ଦେଇଛନ୍ତି। ସେ ଟୁଇଟ୍ କରି କହିଛନ୍ତି ଯେ, ଯଦି କିଛି ଆପତ୍ତିଜନକ ଶବ୍ଦର ବ୍ୟବହାର ହୋଇ ନ ଥାଏ ତେବେ ଏପରି ପୋଷାକ ପିନ୍ଧିବା ଅପରାଧ ନୁହେଁ। ଏନେଇ ନାଗାଁଓ ପୋଲିସକୁ ଉପଯୁକ୍ତ ନିର୍ଦ୍ଦେଶ ଜାରି କରାଯାଇଛି।
ସୂଚନାଯୋଗ୍ୟ, ଏହି ସମଗ୍ର ଘଟଣା ଆସାମର ନାଗାଓଁ ଜିଲାରେ ଘଟିଛି। ପେଟ୍ରୋଲ ଏବଂ ଡିଜେଲ ଦର ବୃଦ୍ଧି, ବେକାରୀ ଏବଂ ମୁଦ୍ରାସ୍ଫୀତି ସମସ୍ୟାକୁ ବିରୋଧ କରି ଏଠାରେ ଦୁଇଜଣ କଳାକାର ପଥପ୍ରାନ୍ତ ନାଟକ ପ୍ରଦର୍ଶନ କରିଥିଲେ। ଜଣେ ଶିବଙ୍କ ଏବଂ ଅନ୍ୟଜଣେ ପାର୍ବତୀଙ୍କ ବେଶ ଧାରଣ କରିଥିଲେ। ଦୁହେଁ ଏକ ମୋଟର ସାଇକେଲରେ ବୁଲି ବିରୋଧ ପ୍ରଦର୍ଶନ କରିଥିଲେ।
