ଭୁବନେଶ୍ୱର, ୨୩ା୯(ବିଜୟ ରଣା): ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ ଚାଲିଥିବା ଭୈରବ ଚନ୍ଦ୍ର ମହାନ୍ତି ମେମୋରିଆଲ ଟି୨୦ କ୍ରିକେଟ ଟୁର୍ନାମେଣ୍ଟ ୨୦୨୩ରେ ଆସାମ ଚାମ୍ପିୟନ ହୋଇଛି। ଶୁକ୍ରବାର କଟକସ୍ଥିତ ବାରବାଟୀ ଷ୍ଟାଡିୟମରେ ଅନୁଷ୍ଠିତ ଫାଇନାଲରେ ଦଳ ୫୩ ରନରେ ଝାଡ଼ଖଣ୍ଡକୁ ପରାସ୍ତ କରିଛି। ଏହି ମ୍ୟାଚରେ ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଆସାମ ରିୟାନ ପରାଗ (୫୬ ବଲ୍ରୁ ୧୧୯ରନ)ଙ୍କ ଶତକ ଓ ପଲ୍ଲଭ କୁମାର ଦାସ (୨୮ ବଲ୍ରୁ ୫୧)ଙ୍କ ଅର୍ଦ୍ଧଶତକ ସହାୟତାରେ ଦଳ ନିର୍ଦ୍ଧାରିତ ୨୦ ଓଭରରେ ୬ ଉଇକେଟ ବିନିମୟରେ ୨୧୯ ରନ କରିଥିଲା। ବିପକ୍ଷ ଦଳର ସୁଶାନ୍ତ ମିଶ୍ର ଓ ବିକାଶ ସିଂ ୨ଟି ଲେଖାଏଁ ଉଇକେଟ ନେଇଥିଲେ। ଜବାବରେ ଝାଡ଼ଖଣ୍ଡ ନିର୍ଦ୍ଧାରିତ ଓଭରରେ ୮ ଉଇକେଟ ବିନିମୟରେ ୧୬୬ ରନ କରିବାରେ ସମର୍ଥ ହୋଇଥିଲା। ଟପ୍ ସ୍କୋରର ଅନୁକୂଳ ରୟ ୪୨ ଏବଂ ପଙ୍କଜ କୁମାର ୩୧ ରନ କରିଥିଲେ। ବିଜୟୀ ଦଳ ପକ୍ଷରୁ ମୁକ୍ତାର ହୁସେନ ୩ ଏବଂ ଆକାଶ ସେନଗୁପ୍ତା ଓ ରିୟାନ ପରାଗ ୨ଟି ଲେଖାଏଁ ଉଇକେଟ ନେଇଥିଲେ। ଏହି ଉପଲକ୍ଷେ ଆୟୋଜିତ ଉଦ୍ଯାପନୀ ଉତ୍ସବରେ ଚାମ୍ପିୟନ ଆସାମ ୧୦ ଲକ୍ଷ, ରନରଅପ୍ ଝାଡ଼ଖଣ୍ଡ ୫ଲକ୍ଷ ଏବଂ ରିୟାନ ପରାଗ ପ୍ଲେୟର ଅଫ୍ ଦି ଟୁର୍ନାମେଣ୍ଟ ଭାବେ ୫୦ ହଜାର ଏବଂ ପ୍ଲେୟର ଅଫ୍ ଦି ଫାଇନାଲ ଭାବେ ୧୦ ହଜାର ଟଙ୍କା ପାଇଥିଲେ। ଉଦ୍ଯାପନୀ ଉତ୍ସବରେ ମୁଖ୍ୟ ଅତିଥି ଭାବେ ଅଶୋକ ପରିଜା (ଓଡ଼ିଶାର ଆଡଭୋକେଟ ଜେନେରାଲ) ଏବଂ ସମ୍ମାନିତ ଅତିଥି ଭାବେ ଆଶୀର୍ବାଦ ବେହେରା (ଫୁଟ୍ବଲ ଆସୋସିଏଶନ ଅଫ୍ ଓଡ଼ିଶାର ସମ୍ପାଦକ), ଡକ୍ଟର ଖାରବେଳ ମହାନ୍ତି (ସ୍ବର୍ଗତ ଭୈରବ ଚନ୍ଦ୍ର ମହାନ୍ତିଙ୍କ ପୁତ୍ର) ଏବଂ ଅଭିଜିତ ପାଲ୍ (ଓଡ଼ିଶା ଅଲିମ୍ପିକ ଆସୋସିଏଶନ ସମ୍ପାଦକ) ପ୍ରମୁଖ ଯୋଗ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଓସିଏ କର୍ମକର୍ତ୍ତା ଉପସଭାପତି ପଙ୍କଜଲୋଚନ ମହାନ୍ତି, ସମ୍ପାଦକ ସଞ୍ଜୟ ବେହେରା ଓ କୋଷାଧ୍ୟକ୍ଷ ବିକାଶ ପ୍ରଧାନ ଉପସ୍ଥିତ ଥିଲେ। ଏହାଛଡ଼ା ଓସିଏର ବହୁ ସଦସ୍ୟ ମଧ୍ୟ ଉପସ୍ଥିତ ଥିଲେ।
