କଟକ ଅଫିସ, ୨୩ା୧୧: ଆସନ୍ତା ବର୍ଷ ମାର୍ଚ୍ଚ ସୁଦ୍ଧା ବିଭିନ୍ନ ବିଭାଗରେ ଖାଲି ପଡ଼ିଥିବା ୨୫ଶହ ପଦବୀ ପୂରଣ କରିବା ପାଇଁ ଓଡ଼ିଶା ଲୋକସେବା ଆୟୋଗ (ଓପିଏସ୍ସି) ଲକ୍ଷ୍ୟ ରଖିଛି। ୨୦୨୨-୨୩ ବର୍ଷ ପାଇଁ ପ୍ରାୟ ୪ହଜାର ପଦବୀ ପୂରଣ ପାଇଁ କ୍ୟାଲେଣ୍ଡରରେ ପ୍ରକାଶ ପାଇଥିଲା। ତେବେ ଗତ ୬ ମାସ ମଧ୍ୟରେ ସେଥିମଧ୍ୟରୁ ମୋଟ ୧୭ ଟି ବିଭାଗ ପାଇଁ ଗ୍ରୁପ ଏ ଓ ବି ବର୍ଗରେ ୧,୫୪୧ ପ୍ରାର୍ଥୀଙ୍କୁ ଯୋଗ୍ୟ ବିବେଚିତ କରାଯାଇ ସ୍ବୀକୃତି ପ୍ରଦାନ କରାଯାଇଛି। ଏଗ୍ରିକଲ୍ଚର ବିଭାଗର ଆସିଷ୍ଟାଣ୍ଟ ହଟି କଲଚର ଅଫିସର ଏବଂ ଆସିଷ୍ଟାଣ୍ଟ ଏଗ୍ରିକଲଚର ଅଫିସର ପାଇଁ ୬୦, ଭେଟେନାରି ଆସିଷ୍ଟାଣ୍ଟ ସର୍ଜନ ୧୪୬, ଓଡ଼ିଶା ସିଭିଲ ସର୍ଭିସର ୩୯୨, ମେଡିକାଲ କଲେଜରେ ଆସିଷ୍ଟାଣ୍ଟ ପ୍ରଫେସର ପାଇଁ ୨୫୦, ବିଭିନ୍ନ କଲେଜ ପାଇଁ ଆସିଷ୍ଟାଣ୍ଟ ପ୍ରଫେସର ୪୪୮, ଇନ୍ସ୍ୟୁରାନ୍ସ ମେଡିକାଲ ଅଫିସର ୫୫, ଓଜେଏସ୍ ୫୦, ଜୁନିୟର କଲେଜରେ ପୋଷ୍ଟ ଗ୍ରାଜୁଏଟ ଟିଚର୍ସ ୧୦୦, ଜିଓଲୋଜିଷ୍ଟ ମାଇନିଂ ଅଫିସର ୪୦ଙ୍କୁ ଯୋଗ୍ୟ ବିବେଚିତ କରାଯାଇଛି। ତେବେ ମାର୍ଚ୍ଚ ମଧ୍ୟରେ ୨୫ଶହ ପଦବୀ ପାଇଁ ଚୟନ ପ୍ରକ୍ରିୟା ଜାରି ରହିଛି ବୋଲି ଓଡ଼ିଶା ଲୋକ ସେବା ଆୟୋଗ(ଓପିଏସ୍ସି) ଅଧ୍ୟକ୍ଷ ସତ୍ୟଜିତ୍ ମହାନ୍ତି ମଙ୍ଗଳବାର ସୂଚନା ଦେଇଛନ୍ତି।
ଓପିଏସ୍ସି କାର୍ଯ୍ୟାଳୟରେ ଆୟୋଜିତ ଏକ ଖବରଦାତା ସମ୍ମିଳନୀରେ ଯୋଗଦେଇ ମହାନ୍ତି ଆସିଷ୍ଟାଣ୍ଟ ସେକ୍ସନ ଅଫିସର(ଏଏସ୍ଓ) ପରୀକ୍ଷାରେ ଅନିୟମିତତା ଅଭିଯୋଗ ସମ୍ପର୍କରେ ସ୍ପଷ୍ଟୀକରଣ ରଖିଛନ୍ତି। ଅତ୍ୟନ୍ତ ସ୍ବଚ୍ଛତାର ସହ ଏଏସ୍ଓ ପରୀକ୍ଷା ହୋଇଛି। ଉଚ୍ଚ ନ୍ୟାୟାଳୟଙ୍କ ନିର୍ଦ୍ଦେଶ ଅନୁଯାୟୀ, ଫାଇନାଲ ରେଜଲ୍ଟ ପରେ ମାର୍କଶିଟ୍ ଓ ଆନ୍ସର ଶିଟ୍ ଅପଲୋଡ୍ କରାଯିବ। କିଛି ପିଲାଙ୍କ ଅଭିଯୋଗ ଥିଲା କି ସେମାନଙ୍କ ଠାରୁ କମ୍ ମାର୍କ ରଖିଥିବା ପ୍ରାର୍ଥୀ ମଧ୍ୟ ଚୟନ ହୋଇଛନ୍ତି। ହେଲେ ବର୍ତ୍ତମାନ ପର୍ଯ୍ୟନ୍ତ ଓପିଏସ୍ସି ପକ୍ଷରୁ ମାର୍କ ଦିଆଯାଇ ନାହିଁ। ସେଥିପାଇଁ ତାହା କେତେ ସତ ତାହା ସନ୍ଦେହରେ। ହେଲେ ଯଦି ଏପରି ହୋଇଛି ତେବେ ଉକ୍ତ ପ୍ରାର୍ଥୀ କ୍ୱାଲିଫାଇଂ ମାର୍କ ରଖି ନ ଥିବେ। ସେଥିପାଇଁ ସେ ମେଧା ତାଲିକାରୁ ବାଦ୍ ପଡିଥିବେ। ଭିତ୍ତିହୀନ ଅନେକ ଅଭିଯୋଗ ହୋଇଥିଲା। ଟଙ୍କା କାରବାର ନେଇ ନିଯୁକ୍ତି ଦିଆଯାଉଥିବା ଅଭିଯୋଗକୁ ବି ଅଧ୍ୟକ୍ଷ ଖଣ୍ଡନ କରି କହିଛନ୍ତି,ଅସାଧୁ ବ୍ୟକ୍ତିଙ୍କ ଦ୍ୱାରା ପ୍ରଭାବିତ ନ ହେବା ପାଇଁ ୱେବସାଇଟ ଠାରୁ ଆରମ୍ଭକରି ଖବରକାଗଜଗୁଡ଼ିକରେ ଏନେଇ ବିଜ୍ଞପ୍ତି ପ୍ରକାଶ ପାଉଛି। କେବଳ ଏସ୍ଏସ୍ଓ ନୁହେଁ, ଓପିଏସ୍ସି ପକ୍ଷରୁ କରାଯାଉଥିବା ସମସ୍ତ ପରୀକ୍ଷାକୁ ଯୋଗ୍ୟତା ଆଧାରରେ ହିଁ ପ୍ରାର୍ଥୀ ଚୟନ କରାଯାଉଛି। ଯଦି ଏକ ଦିନ ମଜୁରିଆର ପୁଅ, ଖବରକାଗଜ ବିକ୍ରି କରୁଥିବା ବ୍ୟକ୍ତିଙ୍କ ଝିଅ ଓସିଏସ୍ ପାଇ ପାରୁଛନ୍ତିି, ତାହା କେବଳ ଯୋଗ୍ୟତା ଆଧାରରେ। ଓପିଏସ୍ସିର ସ୍ବଚ୍ଛ ପରୀକ୍ଷା ନେଇ ଏହାହିଁ ସବୁଠାରୁ ବଡ଼ ପ୍ରମାଣ ବୋଲି ମହାନ୍ତି କହିଛନ୍ତି।
