ଦୁବାଇ, ୨୮।୫(ପି.ଟି.)-ଛଅ ଥର ବିଶ୍ୱ ଚାମ୍ପିୟନ ଏମ୍. ସି. ମେରୀ କମ୍ (୫୧ କେଜି) ଓ ସାକ୍ଷୀ (୫୪ କେଜି) ଏସିଆନ ବକ୍ସିଂ ଚାମ୍ପିୟନଶିପ୍ର ଫାଇନାଲରେ ପ୍ରବେଶ କରିଛନ୍ତି। ଗୁରୁବାର ଅନୁଷ୍ଠିତ ସେମିଫାଇନାଲରେ ମେରୀ କମ୍ ୪-୧ରେ ମଙ୍ଗୋଲିଆର ଲୁସାଇଖାନ ଆଲଟାନସେସେଗଙ୍କୁ ହରାଇଥିବାବେଳେ ୨ ଥର ୟୁଥ୍ ବିଶ୍ୱ ଚାମ୍ପିୟନ ସାକ୍ଷୀ ଟପ୍ ସିଡ୍ କାଜାଖସ୍ତାନର ଦିନା ଝୋଲାମନଙ୍କୁ ୩-୨ରେ ପରାସ୍ତ କରିଛନ୍ତି। ତେବେ ମୋନିକା (୪୮ କେଜି) ଓ ଜସ୍ମିନ (୫୭ କେଜି) ସେମାନଙ୍କ ସେମିଫାଇନାଲ ଲଢ଼େଇ ହାରି ବ୍ରୋଞ୍ଜ ପଦକରେ ସନ୍ତୁଷ୍ଟ ହୋଇଛନ୍ତି। ମୋନିକା ୦-୫ରେ ଦ୍ୱିତୀୟ ସିଡ୍ କାଜାଖସ୍ତାନର ଆଲୁଆ ବାଲ୍କିବେକୋଭାଙ୍କଠାରୁ ଏବଂ ଜସ୍ମିନ ସମାନ ପଏଣ୍ଟରେ ଆଉ ଜଣେ କାଜାଖ ପ୍ରତିଯୋଗୀ ଭ୍ଲାଡିସ୍ଲାଭ କୁଖତାଙ୍କଠାରୁ ପରାଜିତ ହୋଇଥିଲେ। ମେରୀ କମ୍ ଫାଇନାଲରେ ୨ ଥର ବିଶ୍ୱ ଚାମ୍ପିୟନ କାଜାଖସ୍ତାନର ନଜିମ କାଜିବେଙ୍କୁ ଭେଟିବେ। ପୂର୍ବରୁ କେତେକ ଲଢ଼େଇରେ କାଜିବେଙ୍କୁ ହରାଇଥିବାରୁ ଦୃଢ଼ ଆତ୍ମବିଶ୍ୱାସରେ ଅଛନ୍ତି ୩୮ ବର୍ଷୀୟା ମେରୀ କମ୍। ସାକ୍ଷୀ ଫାଇନାଲରେ ଉଜବେକିସ୍ତାନର ସିତୋରା ଶୋଗ୍ଡାରୋଭାଙ୍କୁ ଭେଟିବେ। ବୁଧବାର ରାତିରେ ଅନୁଷ୍ଠିତ କ୍ୱାର୍ଟର ଫାଇନାଲରେ ଅଲିମ୍ପିକ୍ ଯୋଗ୍ୟତା ହାସଲକାରୀ ଆଶିଷ କୁମାର (୭୫ କେଜି) ୨-୩ରେ ଏସିଆନ ଗେମ୍ସ ସିଲ୍ଭର ମେଡାଲିଷ୍ଟ କାଜାଖସ୍ତାନର ଅବିଖାନ ଅମନକୁଲଙ୍କଠାରୁ ହାରିଥିଲେ। ନରେନ୍ଦରଙ୍କ ଅଭିଯାନ ମଧ୍ୟ କ୍ୱାର୍ଟର ଫାଇନାଲରୁ ଶେଷ ହୋଇଥିଲା।
