ନୂଆଦିଲ୍ଲୀ, ୨୭।୫(ପି.ଟି.)- ଭାରତୀୟ ପେସ୍ ଆକ୍ରମଣ ନ୍ୟୁଜିଲାଣ୍ଡ ସହ ସମକକ୍ଷ। ତେଣୁ ଆଗାମୀ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲରେ ଭାରତର ଦୁଇ ତାରକା ସ୍ପିନର ରବିଚନ୍ଦ୍ରନ ଅଶ୍ୱିନ ଓ ରବୀନ୍ଦ୍ର ଜାଡେଜାଙ୍କ ଉପରେ ନଜର ରହିବ ବୋଲି ନ୍ୟୁଜିଲାଣ୍ଡ ବ୍ୟାଟ୍ସମ୍ୟାନ ହେନରି ନିକୋଲ୍ସ ପ୍ରକାଶ କରିଛନ୍ତି। ବିଶ୍ୱ ଟେଷ୍ଟ ଚାମ୍ପିୟନଶିପ୍ର ପ୍ରଥମ ଟାଇଟଲ ପାଇଁ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ସାଉଥାମ୍ପଟନର ଏଜେସ ବାଓଲଠାରେ ମୁକାବିଲା ହେବ। ଇଂଲଣ୍ଡରେ ଯେତେଗୁଡ଼ିଏ ପିଚ୍ ଅଛି ଏଠାରେ ଟେଷ୍ଟ ମ୍ୟାଚ ସମୟରେ କ୍ୱଚିତ ସ୍ପିନରଙ୍କୁ ସହାୟତା ମିଳିବା ଦେଖା ଯାଇଥାଏ।
”ଭାରତର ପେସ୍ ଆକ୍ରମଣ ଖୁବ୍ ଶାଣିତ। ଏହି ଦଳରେ ଅଶ୍ୱିନ ଓ ଜାଡେଜାଙ୍କ ପରି ଅଭିଜ୍ଞ ସ୍ପିନର ମଧ୍ୟ ଅଛନ୍ତି। ଏମାନେ ବିଶ୍ୱର ବିଭିନ୍ନ ସ୍ଥାନରେ ସ୍ଥିର ପ୍ରଦର୍ଶନ ଦେଇ ଆସିଛନ୍ତି ଏବଂ ଆକ୍ରମଣରେ କ୍ୱାଲିଟି ଆଣିଛନ୍ତି“ ବୋଲି ନିକୋଲ୍ସ କହିଛନ୍ତି। ଯଦି କୌଣସି ଆହତ ସମସ୍ୟା ନ ରୁହେ ତେବେ ଭାରତର ପେସ୍ ତ୍ରୟ ଯଶପ୍ରୀତ୍ ବୁମ୍ରା, ଈଶାନ୍ତ ଶର୍ମା ଓ ମହମ୍ମଦ ସାମି ଜୁନ୍ ୧୮ରୁ ଆରମ୍ଭ ହେବାକୁ ଯାଉଥିବା ମୁକାବିଲାରେ ଚୂଡ଼ାନ୍ତ ଏକାଦଶରେ ସ୍ଥାନ ପାଇବା ଏକପ୍ରକାର ନିଶ୍ଚିତ। ”ଟ୍ରେଣ୍ଟ ବୋଲ୍ଟ, ଟିମ୍ ସୌଦୀ ଓ ନେଲ ଓ୍ବେଗନରଙ୍କୁ ନେଇ ଆମେ ଗର୍ବିତ ହେବାଭଳି ପ୍ରଦର୍ଶନ କରି ଆସିଛୁ। ମାତ୍ର ଏବେ ଭାରତର ବୁମ୍ରା, ଈଶାନ୍ତ ଏବଂ ସାମି ଆମ ପେସରଙ୍କ ସମକକ୍ଷ ପ୍ରଦର୍ଶନ କରି ନିଜ ଦକ୍ଷତା ପ୍ରଦର୍ଶନ କରିଛନ୍ତି। ତେଣୁ ଯଦି ଉଭୟ ଦଳରେ ଏପରି ଲାଇନ୍ଅପ୍ ରୁହେ ତେବେ ରୋମାଞ୍ଚକ ମୁକାବିଲା ଦେଖିବାକୁ ମିଳିବ। ଏହା କଷ୍ଟସାଧ୍ୟ ହେଲେ ହେଁ ଆମେ ଏଥିପାଇଁ ପ୍ରସ୍ତୁତ ବୋଲି ୩୭ ଟେଷ୍ଟ ମ୍ୟାଚରୁ ୪୩ରୁ ଊର୍ଦ୍ଧ୍ୱ ଆଭରେଜ ରଖିଥିବା ୨୯ ବର୍ଷୀୟ ନିକୋଲ୍ସ କହିଛନ୍ତି। ତେବେ ଆଗାମୀ ମୁକାବିଲା ନିରପେକ୍ଷ ଭେନ୍ୟୁରେ ହେବାକୁ ଯାଉଥିବାରୁ ଏଥିରେ ସ୍ପିନରଙ୍କ ପାଇଁ ମଧ୍ୟ କିଛି ସୁଯୋଗ ଥାଇପାରେ। ତେଣୁ ୟୁକେ ଆସିବା ପୂର୍ବରୁ ସେମାନେ ଏଥିପାଇଁ ଅଭ୍ୟାସ କରିଛନ୍ତି ବୋଲି ସେ ପ୍ରକାଶ କରିଛନ୍ତି।
ଗତଥର ଘରୋଇ ପରିବେଶରେ ଭାରତକୁ ୨-୦ରେ ସିରିଜ ମୂଳପୋଛ କରି ଜିତିଥିବା ନ୍ୟୁଜିଲାଣ୍ଡ ଦଳର ସଦସ୍ୟ ଥିଲେ ନିକୋଲ୍ସ । ତେଣୁ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲକୁ ତାଙ୍କ ଦଳ ଦୃଢ଼ ଆତ୍ମବିଶ୍ୱାସର ସହ ଖେଳିବାକୁ ଯିବ ବୋଲି ସେ କହିଛନ୍ତି। ”୨୦୧୯-୨୦ ସିଜନରେ ଆମେ ଏହି ଦଳକୁ ୨-୦ରେ ହରାଇଥିଲୁ। ଆଗାମୀ ମୁକାବିଲା ଏକ ନିରପେକ୍ଷ ଭେନ୍ୟୁରେ ହେବାକୁ ଯାଉଥିଲେ ହେଁ ଦଳଗତଭାବେ ଆମେ ପୂର୍ବ ସିରିଜ ପ୍ରଦର୍ଶନ ଆଧାରରେ ଦୃଢ଼ ଆତ୍ମବିଶ୍ୱାସରେ ରହିଛୁ। ନମ୍ବର ୧ ଏବଂ ୨ ଦଳ ମଧ୍ୟରେ ମୁକାବିଲା ଚ୍ୟାଲେଞ୍ଜପୂର୍ଣ୍ଣ ହେବା ସ୍ବାଭାବିକ“ ବୋଲି ସେ କହିଛନ୍ତି। ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ପୂର୍ବରୁ ନ୍ୟୁଜିଲାଣ୍ଡ ଘରୋଇ ଇଂଲଣ୍ଡ ଦଳ ବିପକ୍ଷରେ ୨ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବ।
