ତ୍ରିନିଦାଦ,୨୪।୭: ୱେଷ୍ଟଇଣ୍ଡିଜ ବିପକ୍ଷରେ ଖେଳାଯାଇଥିବା ଦ୍ୱିତୀୟ ଟେଷ୍ଟରେ ଭାରତୀୟ ସ୍ପିନର ଆର ଅଶ୍ୱିନ ଏବଂ ରବିନ୍ଦ୍ର ଜାଡେଜାଙ୍କ ଯୋଡି କମାଲ କରିଛନ୍ତି। ଟେଷ୍ଟ କ୍ରିକେଟରେ ୫୦୦ ଉଇକେଟ ନେଇ ଅଶ୍ୱିନ ଏବଂ ଜାଡେଜାଙ୍କ ଯୋଡି ଦ୍ୱିତୀୟ ଭାରତୀୟ ଯୋଡି ହୋଇପାରିଛନ୍ତି। ଏହାପୂର୍ବରୁ ଅନିଲ କୁମ୍ବଲେ ଏବଂ ହରଭଜନ ସିଂଙ୍କ ଯୋଡି ଏହି କୀର୍ତ୍ତିମାନ ହାସଲ କରିଥିଲେ।
ଭାରତ ଏବଂ ୱେଷ୍ଟଇଣ୍ଡିଜ ମଧ୍ୟରେ ଖେଳାଯାଉଥିବା ଦ୍ୱିତୀୟ ଟେଷ୍ଟର ଶେଷ ଇନିଂସରେ ଚତୁର୍ଥ ଦିନର ଶେଷ ପର୍ଯ୍ୟନ୍ତ ଆର ଅଶ୍ୱିନ ୨ ଉଇକେଟ ନେଇଥିଲେ। ୱେଷ୍ଟଇଣ୍ଡିଜ ଦଳ ୩୬୫ ରନ ପିଛା କରୁଛି। ୱେଷ୍ଟଇଣ୍ଡିଜ ଅଧିନାୟକ କ୍ରେଗ ବ୍ରାଥୱାଇଟ ଏବଂ କିର୍କ ମ୍ୟାକେଞ୍ଜିଙ୍କ ଉଇକେଟ ନେବା ପରେ ଅଶ୍ୱିନ ରବିନ୍ଦ୍ର ଜାଡେଜାଙ୍କ ସହ ଯୋଡି ଭାବରେ ୫୦୦ ଉଇକେଟ ସମାପ୍ତ କରିଥିଲେ। ଏଥିମଧ୍ୟରୁ ଅଶ୍ୱିନ ୨୭୪ ଉଇକେଟ ନେଇଥିବାବେଳେ ରବିନ୍ଦ୍ର ଜାଡେଜା ୨୬୬ ଉଇକେଟ୍ ନେଇଥିଲେ।
ଅନିଲ କୁମ୍ବଲେ ଏବଂ ହରଭଜନ ସିଂଙ୍କ ଯୋଡି ଏକାଠି ଖେଳିବାବେଳେ ୫୦୧ ଟେଷ୍ଟ ଉଇକେଟ ନେଇଥିଲେ। ଏଥିରେ ଅନିଲ କୁମ୍ବଲେ ୨୮୧ ଉଇକେଟ ନେଇଥିବାବେଳେ ହରଭଜନ ସିଂ ୨୨୦ ଉଇକେଟ ନେଇଥିଲେ। କୁମ୍ବଲେ ଏବଂ ହରଭଜନ ସିଂଙ୍କ ଯୋଡି ୫୪ତମ ଟେଷ୍ଟରେ ୫୦୧ ଉଇକେଟ ଛୁଇଁଥିବାବେଳେ ଅଶ୍ୱିନ ଏବଂ ଜାଡେଜାଙ୍କ ଯୋଡି ୪୯ତମ ଟେଷ୍ଟରେ ୫୦୦ ଉଇକେଟ ଅଙ୍କ ଛୁଇଁଛନ୍ତି।
