ଦୁବାଇ, ୧୦ା୩ (ପି.ଟି.)- ଇଂଲଣ୍ଡ ବିପକ୍ଷ ୪ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ପ୍ରଭାବୀ ପ୍ରଦର୍ଶନ ପାଇଁ ଭାରତର ଷ୍ଟାର ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ ମଙ୍ଗଳବାର ଆଇସିସି ପୁରୁଷ ପ୍ଲେୟର ଅଫ୍ ଦି ମନ୍ଥ୍ ବିବେଚିତ ହୋଇଛନ୍ତି। ଏହି ସିରିଜରେ ବିଜୟ ହାସଲ କରି ଭାରତ ବିଶ୍ୱ ଟେଷ୍ଟ ଚାମ୍ପିୟନଶିପ୍ର ଫାଇନାଲରେ ପ୍ରବେଶ କରିିଛି। ଇଂଲଣ୍ଡର ଟାମି ବିମଣ୍ଟ ମହିଳା ପ୍ଲେୟର ଅଫ୍ ଦି ଇୟର ବିବେଚିତ ହୋଇଛନ୍ତି। ସିରିଜରେ ଅଶ୍ୱିନ ତିନୋଟି ଟେଷ୍ଟ ମ୍ୟାଚରେ ଖେଳିଥିଲେ। ଚେନ୍ନାଇଠାରେ ଭାରତର ଦ୍ୱିତୀୟ ଟେଷ୍ଟ ବିଜୟରେ ଦ୍ୱିତୀୟ ଇନିଂସରେ ସେ୧୦୬ ରନ କରିଥିଲେ। ଅହମଦାବାଦରେ ତୃତୀୟ ଟେଷ୍ଟ ବିଜୟ ବେଳେ ସେ ତାଙ୍କର ୪୦୦ ଟେଷ୍ଟ ଉଇକେଟ ପୂରଣ କରିଥିଲେ। ଫେବୃୟାରୀରେ ଇଂଲଣ୍ଡ ବିପକ୍ଷରେ ଅଶ୍ୱିନ ଶତକ ହାସଲ କରିବା ବ୍ୟତୀତ ୨୪ଟି ଉଇକେଟ ମଧ୍ୟ ନେଇଥିଲେ। ୪ ମ୍ୟାଚ ବିଶିଷ୍ଟ ସିରିଜକୁ ଭାରତ ୩-୧ରେ ଜିତି ଜୁନ୍ରେ ସାଉଥାମ୍ପଟନରେ ନ୍ୟୁଜିଲାଣ୍ଡ ବିପକ୍ଷରେ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ଖେଳିବା ଲାଗି ଯୋଗ୍ୟତା ଅର୍ଜନ କରିଛି। ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ପକ୍ଷରୁ ଏକ ବିବୃତିରେ କୁହାଯାଇଛି ସିରିଜରେ ମୋଟ ୧୭୬ରନ ସଂଗ୍ରହ କରି୨୪ ଉଇକେଟ ନେଇଥିବାରୁ ପୁରୁଷ ବିଭାଗରେ ଅଶ୍ୱିନ ସମସ୍ତଙ୍କର ପସନ୍ଦ ରହିଥିଲେ। ସମର୍ଥକଙ୍କଠାରୁ ମଧ୍ୟ ସେ ସର୍ବାଧିକ ଭୋଟ ପାଇଥିଲେ। ପୁରୁଷ ବିଭାଗରେ ପ୍ଲେୟର ଅଫ୍ ଦି ମନ୍ଥ ପୁରସ୍କାର ଦୌଡ଼ରେ ଥିବା ଅନ୍ୟ ଖେଳାଳିମାନଙ୍କ ମଧ୍ୟରେ ଥିଲେ ଇଂଲଣ୍ଡ ଟେଷ୍ଟ ଅଧିନାୟକ ଜୋ ରୁଟ୍। ସେ ଭାରତ ବିପକ୍ଷରେ ୩ଟି ଟେଷ୍ଟ ଖେଳି ୩୩୩ ରନ ସଂଗ୍ରହ କରିବା ସହ ୬ଟି ଉଇକେଟ ଅକ୍ତିଆର କରିଥିଲେ। ସେହିପରି ଓ୍ବେଷ୍ଟଇଣ୍ଡିଜର ଟେଷ୍ଟ ପଦାର୍ପଣକାରୀ ଖେଳାଳି କାଇଲ ମେୟର୍ସ ମଧ୍ୟ ଏହି ପୁରସ୍କାର ପାଇଁ ସୁପାରିସ ହୋଇଥିଲା। ସେ ବାଂଲାଦେଶ ବିପକ୍ଷ ପ୍ରଥମ ଟେଷ୍ଟରେ ୩୯୫ରନ ସଫଳ ଚେଜ୍ରେ ମ୍ୟାଚ ବିଜୟୀ ୨୧୦ରନ କରିଥିଲେ।
ବିମଣ୍ଟ ଫେବୃୟାରୀରେ ନ୍ୟୁଜିଲାଣ୍ଡ ବିପକ୍ଷରେ ୩ ଅନ୍ତର୍ଜାତୀୟ ଦିନିକିଆ ଖେଳିଥିଲେ। ସେ ପ୍ରତିଟି ମ୍ୟାଚରେ ୫୦ରୁ ଅଧିକ ରନ ସଂଗ୍ରହ କରିଥିଲେ। ତାଙ୍କର ମୋଟ ରନ ସଂଖ୍ୟା ୨୩୧ ରହିଥିଲା। ଆଇସିସି ଭୋଟିଂ ଏକାଡେମୀରୁ ପ୍ରତିନିଧିତ୍ୱ କରୁଥିବା ଇଆନ ବିଶପ କହିଛନ୍ତି, ଇଂଲଣ୍ଡ ବିପକ୍ଷ ଗୁରୁତ୍ୱପୂର୍ଣ୍ଣ ସିରିଜରେ ଅଶ୍ୱିନ ଭଲ ବୋଲିଂ କରିଥିଲେ। ନିୟମିତ ଉଇକେଟ ନେବା ସହ ଦ୍ୱିତୀୟ ଟେଷ୍ଟରେ ଶତକ ହାସଲ କରିଥିଲେ, ଯେଉଁ ସମୟରେ ଇଂଲଣ୍ଡ ମ୍ୟାଚକୁ ପ୍ରତ୍ୟାବର୍ତ୍ତନ କରିବା ଲାଗି ଚେଷ୍ଟା କରୁଥିଲା। ଅନ୍ୟପକ୍ଷରେ ଜବରଦସ୍ତ ଫର୍ମରେ ରହିଥିବା ବିମଣ୍ଟ ଯେଉଁ ତିନୋଟି ଅର୍ଦ୍ଧଶତକ ହାସଲ କରିଥିଲେ ତନ୍ମଧ୍ୟରୁ ଦୁଇଟି ଦଳକୁ ଜିତାଇବାରେ ସହାୟକ ହୋଇଥିଲା ବୋଲି ବିଶପ କହିଛନ୍ତି।
