ଅହମ୍ମଦାବାଦ,୪।୩ : ଇଂଲଣ୍ଡ ବିପକ୍ଷ ଦ୍ୱିତୀୟ ଓ ତୃତୀୟ ଟେଷ୍ଟ ଭଳି ଚତୁର୍ଥ ମ୍ୟାଚ୍ରେ ମଧ୍ୟ ଭାରତୀୟ ଦଳର ଦୁଇ ସ୍ପିନର ରବିଚନ୍ଦ୍ରନ ଅଶ୍ୱିନ ଓ ଅକ୍ଷର ପଟଲଙ୍କ ଯୋଡ଼ିର ଯାଦୁ ଦେଖିବାକୁ ମିଳିଛି। ଏଠାରେ ଗୁରୁବାରଠାରୁ ଆରମ୍ଭ ହୋଇଥିବା ଚତୁର୍ଥ ଟେଷ୍ଟର ପ୍ରଥମ ଦିନ ଦୁହେଁ ହାତେଇଛନ୍ତି ୭ ଉଇକେଟ। ଏହି ଦୁଇ ସ୍ପିନର ଓ ମହମ୍ମଦ ସିରାଜଙ୍କ ଦମ୍ରେ ଇଂଲଣ୍ଡକୁ ମାତ୍ର ୨୦୫ ରନ୍ରେ ସୀମିତ ରଖିବାକୁ ସକ୍ଷମ ହୋଇଛି ଭାରତୀୟ ଦଳ। ଜବାବରେ ଟିମ୍ ଇଣ୍ଡିଆ ପ୍ରଥମ ଦିନ ଶେଷ ପର୍ଯ୍ୟନ୍ତ ବ୍ୟାଟିଂ କରି ୧ ଉଇକେଟ କ୍ଷତିରେ ୨୪ ରନ୍ କରିଛି। ଦଳକୁ ପ୍ରଥମ ଇନିଂସରେ ଅଗ୍ରଣୀ ହାସଲ କରିବାକୁ ହେଲେ ବଳକା ୯ ଉଇକେଟରେ ୧୮୧ ରନ୍ ଦରକାର।
ସିରିଜ୍ର ଅନ୍ତିମ ଦୁଇ ମ୍ୟାଚ୍ ଭଳି ପିଚ୍ରେ ଟର୍ନିଂ ଓ ବାଉନ୍ସ ଥିଲା। ହେଲେ ବେନ ଷ୍ଟୋକ୍ସ (୫୫), ଡାନିଏଲ ଲରେନ୍ସ (୪୬), ଓଲି ପୋପ (୨୯) ଓ ଜନ୍ନି ବେଆରଷ୍ଟୋର (୨୮) କିଛି ମାତ୍ରରେ ଭାରତୀୟ ବୋଲରଙ୍କୁ ସମ୍ମୁଖୀନ ହେବାରେ ସଫଳ ହୋଇଥିଲେ। ହେଲେ ଅନ୍ୟ ବ୍ୟାଟ୍ସମ୍ୟାନଙ୍କ ବିଫଳତା ଯୋଗୁ ୨୦୫ ରନ୍ରେ ସୀମିତ ରହିଥିଲା ଭ୍ରମଣକାରୀ ଇଂଲଣ୍ଡ। ଭାରତ ପାଇଁ ଅକ୍ଷର ୪, ଅଶ୍ୱିନ ୩, ସିରାଜ ୨ ଓ ଓ୍ବାଶିଂଟନ ସୁନ୍ଦର ୧ ଉଇକେଟ ହାତେଇଥିଲେ। ଏହାପରେ ପ୍ରଥମ ଓଭରରେ ହିଁ ଖାତା ଖୋଲିବା ପୂର୍ବରୁ ଶୁବମାନ ଗିଲଙ୍କୁ ଆଉଟ୍ କରିଥିଲେ ଜମି ଆଣ୍ଡରସନ। ତାଙ୍କ ଉଇକେଟ ପଡ଼ିବା ପରେ ରୋହିତ ଶର୍ମା ଓ ଚେତ୍ତେଶ୍ୱର ପୂଜାରା ଭ୍ରମଣକାରୀ ବୋଲରଙ୍କୁ ଆଉ ଦେଇ ନ ଥିଲେ ଉଇକେଟ ନେବାର ସୁଯୋଗ। ଫଳରେ ପ୍ରଥମ ଇନିଂସରେ ମାତ୍ର ୧୨ ଓଭର ଖେଳିଥିବା ଭାରତ ୧ ଉଇକେଟ ହରାଇ ୨୪ ରନ୍ କରିଛି। ରୋହିତ ୮ ଓ ପୂଜାରା ୧୫ ରନ୍ କରି ଅପରାଜିତ ଅଛନ୍ତି।
