ରଘୁନାଥପୁର,୨୭।୬ (ରାଜେନ୍ଦ୍ର ନାରାୟଣ ସିଂହ): ୫-ଟି ସଚିବ ଭି.କେ ପାଣିଆନ ଆସନ୍ତା ଜୁନ ୨୯ ଓ ୩୦ରେ ଜଗତ୍ସିଂହପୁର ଜିଲା ଗସ୍ତରେ ଆସିବାର କାର୍ଯ୍ୟକ୍ରମ ରହିଛି। ଏନେଇ ଜୋରଦାର ପ୍ରସ୍ତୁତି ଆରମ୍ଭ ହୋଇଛି। ୫-ଟିରେ ଅନ୍ତର୍ଭୁକ୍ତ ହୋଇଥିବା ରଘୁନାଥପୁର ଗୋଷ୍ଠିସ୍ବାସ୍ଥ୍ୟ କେନ୍ଦ୍ରରେ ନବୀକରଣ କାର୍ଯ୍ୟ ଚାଲିଛି। ମୌସୁମୀ ବର୍ଷା ସତ୍ତ୍ୱେ ପ୍ରଥମ ପର୍ଯ୍ୟାୟରେ ସ୍ବାସ୍ଥ୍ୟକେନ୍ଦ୍ର ଭିତରେ ଥିବା ୩ ଷ୍ଟାଫ କ୍ୱାର୍ଟରକୁ ଭଙ୍ଗାଯାଇ କାର୍ଯ୍ୟ ଆରମ୍ଭ ହୋଇଛି।
ଭଙ୍ଗାଯାଇଥିବା ପୁରୁଣା କ୍ୱାର୍ଟରରୁ ବାହାରିଥିବା ଆଜବେଷ୍ଟସର ପତ୍ତା ମିଳୁନି। ଏ ସମ୍ପର୍କରେ ଠିକାଦାରଙ୍କ ପକ୍ଷରୁ ନିୟୋଜିତ ଲୋକଙ୍କୁ ପଚାରିଲେ ସବୁ ଆଜବେଷ୍ଟସ୍କୁ ଭାଙ୍ଗି ଦିଆଯାଇଥିବା କୁହାଯାଉଛି। ଉକ୍ତ କ୍ୱାର୍ଟରରେ କର୍ମଚାରୀମାନେ ରହୁଥିଲେ। ଭଙ୍ଗା ହେବାର ଦୁଇଦିନ ପୂର୍ବରୁ ସେମାନଙ୍କୁ ଅନ୍ୟତ୍ର ସ୍ଥାନାନ୍ତରିତ କରାଯାଇଥିଲା। ଉକ୍ତ କ୍ୱାର୍ଟରରେ ପ୍ରାୟ ୫୦ ପିସ ଭଲ ଆଜବେଷ୍ଟ ଥିଲା। ଏହାକୁ ଭାଙ୍ଗି ଦିଆଯାଇଛି ନା ହଡ଼ପ କରାଯାଇଛି ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଠିକାଦାରଙ୍କ ଖାମଖିଆଲ ନୀତି ଯୋଗୁ ଉକ୍ତ କ୍ୱାର୍ଟରରୁ ବାହାରିଥିବା କବାଟ, ଝରକା ଖୋଲା ଆକାଶ ତଳେ ଗଦାହୋଇ ବର୍ଷାରେ ଭିଜୁଛି। ସେହିପରି ଆଜବେଷ୍ଟସ୍ ତଳୁ ବାହାରିଥିବା ଅନେକ ମୂଲ୍ୟବାନ କାଠ ମିଳୁ ନଥିବାବେଳେ ଆଉ କିଛି କାଠକୁ ଶ୍ରମିକମାନେ ଜାଳେଣି ରୂପେ ବ୍ୟବହାର କରୁଥିବା ଅଭିଯୋଗ ହେଉଛି। ନୂତନ ଗୃହ ନିର୍ମାଣ କାର୍ଯ୍ୟକୁ ଗୁରୁତ୍ୱ ଦିଆଯାଉଥିବାବେଳେ ପୁରୁଣା କ୍ୱାର୍ଟରରୁ ବାହାରିଥିବା ଲକ୍ଷାଧିକ ଟଙ୍କାର ସରକାରୀ ସମ୍ପତ୍ତିକୁ ଅଣଦେଖା କରାଯାଉଛି। ଏ ସମ୍ପର୍କରେ ମେଡିକାଲ ସୁପରିଣ୍ଟେଣ୍ଡେଣ୍ଟ ଡ. ସୁକାନ୍ତ କୁମାର ଦଳେଇଙ୍କୁ ପଚାରିବାରୁ ଉକ୍ତ କ୍ୱାର୍ଟରରୁ ବାହାରିଥିବା ଆଜବେଷ୍ଟସ, କାଠ ଓ କବାଟ ଓ ଝରକା ଇତ୍ୟାଦିକୁ ଏପର୍ଯ୍ୟନ୍ତ ମେଡିକାଲକୁ ହସ୍ତାନ୍ତର କରାଯାଇନାହିଁ ବୋଲି ଡା ଦଳେଇ ପ୍ରକାଶ କରିଛନ୍ତି। ସ୍ବାସ୍ଥ୍ୟକେନ୍ଦ୍ର ନବୀକରଣ କାର୍ଯ୍ୟ ପାଇଁ ୨.୧ କୋଟି ଟଙ୍କା ବ୍ୟୟବରାଦ ରହିଛି। ମାଣପୁର ଗଡମା ପୂର୍ତ୍ତ ବିଭାଗ ଯନ୍ତ୍ରୀ ବେଦବ୍ୟାସ ସ୍ବାଇଁ ଏହାର ନିର୍ମାଣ ଦାୟିତ୍ୱରେ ରହିଛନ୍ତି। ଯନ୍ତ୍ରୀ ସ୍ବାଇଁ କହିଛନ୍ତି, ପୁରୁଣା କ୍ୱାର୍ଟରରୁ ବାହାରିଥିବା ସମସ୍ତ ସାମଗ୍ରୀ ଠିକାଦାର ତାଙ୍କ ଦାୟିତ୍ୱରେ ରଖିଥିବେ। ୫-ଟି ସଚିବ ନିଜେ ଏହାର ଅନୁଧ୍ୟାନ କରିବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି।
