ଭୁବନେଶ୍ୱର, ୭।୯(ବ୍ୟୁରୋ): ରାଜ୍ୟରେ କୋଭିଡ୍ ମୃତ୍ୟୁକୁ ନେଇ ସବୁବେଳେ ଦ୍ୱନ୍ଦ୍ୱ ଲାଗି ରହିଛି। ରାଜ୍ୟ ସରକାର ଦେଉଥିବା ତଥ୍ୟ ଠିକ୍ ନୁହେଁ ବୋଲି ବିରୋଧୀ ଅଭିଯୋଗ କରିଆସୁଛନ୍ତି। ତେବେ ସରକାର ଦୈନିକ ଯେଉଁ ତଥ୍ୟ ଦେଉଛନ୍ତି ତା’ଠାରୁ ଢେର ଅଧିକ ମଶାଣିରେ ଦାହ କରାଯାଉଛି ବୋଲି ଉଭୟ ଭାଜପା ଏବଂ କଂଗ୍ରେସ ସବୁବେଳେ ଦାବି କରିଆସୁଛନ୍ତି। ଏହାରି ଭିତରେ ସରକାରୀ ତଥ୍ୟ ଅନୁଯାୟୀ, ରାଜ୍ୟରେ ୨୦୨୧ ଜୁନ୍ ସୁଦ୍ଧା ୮୦୨୮ ଜଣ କୋଭିଡ୍ରେ ମୃତ୍ୟୁବରଣ କରିଥିବା ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସ ସୋମବାର ବିଧାନସଭାରେ ସୂଚନା ଦେଇଛନ୍ତି।
ବିଧାୟକ ନିତ୍ୟାନନ୍ଦ ଗଣ୍ଡଙ୍କ ଏକ ପ୍ରଶ୍ନର ଉତ୍ତରରେ ମନ୍ତ୍ରୀ ଦାସ କହିଛନ୍ତି, ୩୦ ଜିଲା ମଧ୍ୟରୁ ଖୋର୍ଦ୍ଧାରେ ସର୍ବାଧିକ ୧୪୬୦ ଜଣ ମୃତ୍ୟୁବରଣ କରିଛନ୍ତି। ଏହାପରେ କଟକରେ ସର୍ବାଧିକ ୮୦୫ ଜଣଙ୍କ ମୃତ୍ୟୁ ଘଟିଛି। ସେହି ଅନୁସାରେ, ଅନୁଗୋଳରେ ୩୭୬, ବରଗଡ ୩୩୬, ବାଲେଶ୍ୱର ୨୭୭, ଭଦ୍ରକ ୧୩୯, ବଲାଙ୍ଗୀର ୧୨୮, ବୌଦ୍ଧ ୧୧୦, ଦେଓଗଡ ୫୦, ଢେଙ୍କାନାଳ ୨୩୯, ଗଜପତି ୮୨, ଗଞ୍ଜାମ ୪୬୯, ଜଗତ୍ସିଂହପୁର ୨୯୩, ଯାଜପୁର ୧୫୯, ଝାରସୁଗୁଡା ୧୭୫, କଳାହାଣ୍ଡି ୨୦୭, କନ୍ଧମାଳ ୮୨, କେନ୍ଦ୍ରାପଡା ୨୪୧, କେନ୍ଦୁଝର ୧୬୯, କୋରାପୁଟ ୭୭, ମାଲକାନଗିରି ୪୬, ମୟୂରଭଞ୍ଜ ୨୭୦, ନବରଙ୍ଗପୁର ୭୩, ନୟାଗଡ ୨୦୫, ନୂଆପଡ଼ା ୮୪, ପୁରୀ ୪୩୬, ରାୟଗଡା ୧୬୮, ସମ୍ବଲପୁର ୨୪୨, ସୁବର୍ଣ୍ଣପୁର ୫୮ ଏବଂ ସୁନ୍ଦରଗଡରେ ୫୭୨ ଜଣଙ୍କ ମୃତ୍ୟୁ ଘଟିଥିବା ସ୍ବାସ୍ଥ୍ୟମନ୍ତ୍ରୀ ଉତ୍ତରରେ ଦର୍ଶାଇଛନ୍ତି। ସେ ଆହୁରି କହିଛନ୍ତି, କୋଭିଡ୍ରେ ମୃତବ୍ୟକ୍ତିଙ୍କ ମୃତ୍ୟୁ ପ୍ରମାଣପତ୍ର ପଞ୍ଜୀକରଣ ପରେ ପ୍ରଦାନ କରାଯାଉଛି। ଜନ୍ମ ଓ ମୃତ୍ୟୁ ପଞ୍ଜୀକରଣ ଅଧିନିୟମ ୧୯୬୯ର ଧାରା ୧୭(୧) ଅନୁଯାୟୀ ମୃତ୍ୟୁ ପ୍ରମାଣପତ୍ରରେ ମୃତ୍ୟୁର କାରଣ ସମ୍ବନ୍ଧୀୟ ସବିଶେଷ ବିବରଣୀ ରହିବାର ପ୍ରାବଧାନ ନ ଥିବା ସେ କହିଛନ୍ତି।
ଅନ୍ୟପଟେ ୨୦୨୧ ଅଗଷ୍ଟ ଶେଷ ସୁଦ୍ଧା ରାଜ୍ୟ ସରକାର ୧୦୪୦ କୋଟି ୧୯ ଲକ୍ଷ ୨୭ ହଜାର ୬୦୫ ଟଙ୍କା କୋଭିଡ୍ ମୁକାବିଲା ନେଇ ଖର୍ଚ୍ଚ କରିଛନ୍ତି। ସେଥିରୁ କେନ୍ଦ୍ର ସରକାର ମୋଟ ୩୮ କୋଟି ୮୬ ଲକ୍ଷ ଟଙ୍କା ପ୍ରଦାନ କରିଥିବା ମନ୍ତ୍ରୀ ଦାସ ବିଧାନସଭାରେ ବିଧାୟକ ତାରାପ୍ରସାଦ ବାହିନୀପତି ପଚାରିଥିବା ଏକ ପ୍ରଶ୍ନର ଉତ୍ତରରେ କହିଛନ୍ତି। ସେହିପରି କୋରାପୁଟ ଜିଲା ବିଧାୟକମାନଙ୍କ ପାଣ୍ଠିରୁ ୭୭ ଲକ୍ଷ ୩୮ ହଜାର ୪୨ଟ ଟଙ୍କା ଖର୍ଚ୍ଚ ହୋଇଥିବା ମନ୍ତ୍ରୀ ଦାସ ସୂଚନା ଦେଇଛନ୍ତି।
