କେନ୍ଦ୍ରାପଡା, ୪ା୨ (ଜଗନ୍ନାଥ ଧଳ)- କେନ୍ଦ୍ରାପଡା ଜିଲା ପାଟକୁରା ବିଧାୟକ ଅରବିନ୍ଦ ମହାପାତ୍ରଙ୍କୁ ବିଜେଡି ରାଜ୍ୟ ସଭାପତି ନବୀନ ପଟ୍ଟନାୟକ ଗତ ଜାନୁଆରୀ ୧୫ରୁ ଦଳର ସଦସ୍ୟତାରୁ ନିଲମ୍ବନ କରିଥିଲେ । ଏହି ନିଲମ୍ବନ ଘଟଣାକୁ ବିଧାୟକ ମହାପାତ୍ରଙ୍କ ସମର୍ଥକମାନେ ମାନିବାକୁ ଏବେବି ପ୍ରସ୍ତୁତ ନାହାନ୍ତି । ଏହାର ପୁର୍ନବିଚାର କରାଯାଇ ତାଙ୍କୁ ଦଳକୁ ଫେରାଇ ଆଣିବା ପାଇଁ ଜିଦ ବଢ଼ିଚାଲିଛି । ଫଳରେ ପାଟକୁରା ବିଜେଡି ଏବେ ଦୁଇଭାଗ ହୋଇଥିବା ପରି ଘଟଣା ଦେଖିବାକୁ ମିଳୁଛି ।
ବିଧାୟକଙ୍କ ସମର୍ଥକମାନେ ପୁଣି ଥରେ ଚଣ୍ଡିଖୋଲ ପାରାଦ୍ୱୀପ ଜାତୀୟ ରାଜପଥର କେନ୍ଦ୍ରପଡା ସହର ନିକଟ ଶାମସୁନ୍ଦରପୁରସ୍ଥିତ ଏକ ହୋଟେଲରେ ବନ୍ଧୁ ମିଳନ ବ୍ୟାନରେ ଏକାଠି ହୋଇଛି । ଏଥିରେ ଦଳୀୟ ସଦସ୍ୟତା ହରାଇଥିବା ଗରଦପୁର ବ୍ଲକ ଅଧ୍ୟକ୍ଷ ଅଭୟ ମହାରାଜଙ୍କ ସମେତ ନିର୍ବାଚନ ମଣ୍ଡଳୀ ଅନ୍ତର୍ଗତ ୫୨ ପଂଚାୟତର ୬୦ରୁ ଉର୍ଦ୍ଧ ଲୋକ ପ୍ରତିନିଧି ଓ ପୂର୍ବତନ ଲୋକ ପ୍ରତିନିଧି ସାମିଲ ହୋଇଥିଲେ । ଏହି ବୈଠକରେ ପାଟକୁରା ନିର୍ବାଚନ ମଣ୍ଡଳୀରେ ବିଜେଡି ସଂଗଠନର ସୁଦୃଢ଼ତା ପାଇଁ ବିଧାୟକ ମହାପାତ୍ରଙ୍କ ନିଲମ୍ବନ ପ୍ରତ୍ୟାହାର ପାଇଁ ପୁର୍ନବାର ରାଜ୍ୟ ସଭାପତିଙ୍କୁ ସ୍ମାରକ ପତ୍ର ଦିଆଯିବ ବୋଲି ନିଷ୍ପତ୍ତି ହୋଇଛି । ଏସମ୍ପର୍କରେ ବୈଠକରେ ସାମିଲ ହୋଇଥିବା ପୂର୍ବତନ ବ୍ଲକ ଅଧ୍ୟକ୍ଷ ବାସୁଦେବ ବେହେରା, ଦିଲିପ ସାହୁ, ଦଳୀୟ କର୍ମକର୍ତା ତଥା ଲୋକପ୍ରତିନିଧି ଶୈଳନ୍ଦ୍ର ମହାନ୍ତି, ସରୋଜକାନ୍ତ ନାୟକ, ମହନ୍ଦ୍ର ସିଂହ, ଯୋଗାନନ୍ଦ ମହାନ୍ତି, ମନୋରଞ୍ଜନ ଉପାଧ୍ୟାୟ, ସୁଧାଂଶୁଶେଖର ରାୟ ପ୍ରମୁଖ କହିଛନ୍ତିଯେ, ନିର୍ବାଚନ ସମୟରେ ବିଧାୟକ ମହାପାତ୍ରଙ୍କୁ ଦଳରେ ନିଆଯାଇ ଦଳୀୟ ଟିକେଟ ଦିଆ ଯାଇଥିଲା ।
ବିଧାୟକ ଦଳୀୟ ସଂଗଠନକୁ ସୁଦୃଢ଼ କରିବା ସହିତ ଆଞ୍ଚଳିକ ଉନ୍ନୟନ କାର୍ଯ୍ୟକୁ ଅତ୍ୟନ୍ତ ନିଷ୍ଠାର ସହ ତୁଲାଇ ଆସୁଛନ୍ତି । ତାଙ୍କର ପ୍ରତିନିଧିତ୍ୱ ନିର୍ବାଚନ ମଣ୍ଡଳୀ ପାଇଁ ଏକ ଆବଶ୍ୟକତା । ଦଳର ଭବିଷ୍ୟତ ପାଇଁ ନିଲମ୍ବନ ଆଦେଶ ପ୍ରତ୍ୟାହାର ପାଇଁ ପୁଣି ଥରେ ରାଜ୍ୟ ସଭାପତି ପଟ୍ଟନାୟକଙ୍କୁ ସ୍ମାରକ ପତ୍ର ଦିଆଯିବ ବୋଲି ସେମାନେ କହିଥିଲେ । ସେହିପରି ବନ୍ଧୁମିଳନର ଆବାହାକ ଗରଦପୁର ବ୍ଲକ ଅଧ୍ୟକ୍ଷ ମହାରାଜ କହିଛନ୍ତିଯେ ବିଧାୟକ ଙ୍କ ସପକ୍ଷରେ ସ୍ୱର ଉଠାଇବାରୁ ଦଳରୁ ନିଲମ୍ବିତ ହୋଇଛନ୍ତି ।
